ཟླ་བ7པའི་ཚེས18ཉིན།སྐབས་བརྒྱད་པའི་རྒྱལ་ཡོངས་མི་རིགས་ཚོང་རྫས་ཉོ་ཚོང་སྟོན་ཚོགས་དེ་ནང་སོག་གི་ཧུའུ་ཧོ་ཧའོ་ཐེ་གྲོང་ཁྱེར་གྱི་རྒྱལ་སྤྱིའི་སྟོན་ཚོགས་ལྟེ་གནས་སུ་གཟབ་རྒྱས་ངང་འཚོག་འགོ་ཚུགས།རང་ཁུལ་གྱི་ཁེ་ལས་ཐེངས་དང་པོར་མི་རིགས་ཚོང་རྫས་ཉོ་ཚོང་སྟོན་ཚོགས་སུ་ཞུགས་ནས་ཚང་མའི་ཡིད་དབང་འཕྲོག་པ་རེད།
ཤེས་རྟོགས་བྱུང་བར་གཞིགས་ན་ཐེངས་འདིར་རང་ཁུལ་གྱིས་མི་རིགས་ཚོང་རྫས་ཁེ་ལས11སྒྲིག་འཛུགས་བྱས་ནས་སྟོན་ཚོགས་སུ་ཞུགས་ཏེ་ཞིང་ཆེན་ཡོངས་ཀྱི་ས་ཁུལ་དང་གྲོང་ཁྱེར།ཁུལ་བཅས་ཀྱི་ཨང་དང་པོའི་གྲས་སུ་སླེབས་པ་རེད།སྟོན་ཚོགས་སུ་གནག་ཕྱུགས་ཀྱི་ཐོན་རྫས་རིགས་དང་།ནས་ཀྱི་ཐོན་རྫས་རིགས།བོད་སྨན་གྱི་ཐོན་རྫས་རིགས།བོད་ཕག་གི་ཐོན་རྫས་རིགས།རིག་གནས་ཀྱི་ཐོན་རྫས་རིགས་སོགས་སྣ་ཁ་བརྒྱ་ལས་བརྒལ་བ་བཤམས་ཡོད།འགྲེམས་སྟོན་བྱས་པའི་ཐོན་རྫས་ལ་ས་ཁོངས་རིག་གནས་ཀྱི་ཁྱད་ཆོས་ལྡན་ཞིང་ཐེངས་དང་པོར་དར་མདོའི་མཛའ་གཞས་དང་ཁམས་པ་བ་སོགས་ཀྱི་ཟོང་རྟགས་དངོས་རྫས་དྲིལ་བསྒྲགས་བྱས་པ་རེད།སྟོན་ཚོགས་འགོ་ཚུགས་པའི་ཉིན་མོར་མི་སྟོང་ལྷག་དཀར་མཛེས་ཁུལ་གྱི་ཐོན་རྫས་འགྲེམས་སྟོན་བྱེད་ཡུལ་དུ་ལྟད་མོ་ལྟ་བ་དང་ཚོང་པ་བཅུ་ལྷག་གིས་དཀར་མཛེས་ཁུལ་གྱི་ཐོན་རྫས་ལ་དགའ་ཞེན་ཆེན་པོ་བྱས་པ་རེད།