ཞིང་ལས་པུའུ་སོགས་སྡེ་ཚན་དགུ་ཡིས《ས་ཁུལ་དབུལ་པོས་ཁྱད་ལྡན་ཐོན་ལས་འཕེལ་རྒྱས་བཏང་ནས་དབུལ་སྐྱོར་གནད་སྨིན་ལ་སྐུལ་འདེད་གཏོང་བའི་མཛུབ་སྟོན་བསམ་འཆར》མཉམ་འབྲེལ་ཐོག་པར་འགྲེམས་བྱས།

2016-06-05

ཤིན་ཧྭ་གསར་འགྱུར་ཁང་པེ་ཅིན་ནས་ཉེ་ཆར་འབྱོར་བའི་གཏམ་གསར། ཁྱད་ལྡན་ཐོན་ལས་འཕེལ་རྒྱས་གཏང་རྒྱུ་ནི་ས་ཁུལ་དབུལ་པོས་རང་ངོས་འཕེལ་རྒྱས་གཏོང་ནུས་ཆེ་རུ་གཏོང་བའི་གཞི་རྩའི་བྱེད་ཐབས་ཤིག་ཡིན་པ་རེད། ཉེ་ཆར། ཞིང་ལས་པུའུ་སོགས་སྡེ་ཚན་དགུ་ཡིས《ས་ཁུལ་དབུལ་པོས་ཁྱད་ལྡན་ཐོན་ལས་འཕེལ་རྒྱས་བཏང་ནས་དབུལ་སྐྱོར་གནད་སྨིན་ལ་སྐུལ་འདེད་གཏོང་བའི་མཛུབ་སྟོན་བསམ་འཆར》མཉམ་འབྲེལ་ཐོག་པར་འགྲེམས་བྱས་པ་རེད།
བསམ་འཆར་གྱི་ནང་། རྫོང་དབུལ་པོའི་ཐོན་ཁུངས་ཀྱི་ལྷན་སྐྱེས་རིག་ནུས་དང་། ཐོན་ལས་ཀྱི་གནས་ཚུལ། ཁྲོམ་རའི་བར་མཐོངས། ཁོར་ཡུག་གི་ཤོང་ཚད། སྐུལ་ཁྲིད་ཀྱི་ནུས་པ་གསར་པ་གཙོ་བོ་དང་ཐོན་ལས་ཁྱབ་ཁྱོན་བཅས་ལ་ཚན་རིག་དང་མཐུན་པའི་ངང་དབྱེ་ཞིབ་བྱས་ཏེ་རང་ངོས་འཕེལ་རྒྱས་དང་འཚམ་པའི་ཁྱད་ཆོས་ལྡན་་པའི་ཐོན་ལས་ཡག་པོ་གདམ་དགོས། ཁྱད་ལྡན་ཐོན་ཟོག་ལས་སྣོན་ལས་རིགས་འཕེལ་རྒྱས་ཧུར་ཐག་གཏོང་བ་དང་། ཐོན་ལས་ཀྱི་ནུས་པ་སྣ་ཚོགས་ཆེ་རུ་གཏོང་བ། སྤྲོ་གསེང་ཞིང་ལས་དང་གྲོང་གསེབ་ཀྱི་ཡུལ་སྐོར་དང་ནགས་ཁྲོད་ཡུལ་སྐོར་འཕེལ་རྒྱས་གཏོང་ཤུགས་ཆེ་རུ་གཏོང་བ་བཅས་བྱས་ནས་དུད་ཚང་དབུལ་པོའི་ལས་ཞུགས་འབབ་འཕར་གྱི་ཐབས་ལམ་རྒྱ་ཆེར་གཏང་དགོས་པའི་ནན་པོར་བསྟན་ཡོད་པ་རེད།
ཞིབ་ཕྲའི་དམིགས་ཚད་ཐད་བསམ་འཆར་གྱི་ནང་། 2020ལོར་སླེབས་སྐབས་རྫོང་དབུལ་པོས་མི་འབོར་དབུལ་པོ་ཞུགས་ཚད་མཐོ་བའི་ཁྱད་ལྡན་ཐོན་ལས་རྟེན་གཞི་ཁག་ཅིག་བསྐྲུན་རྒྱུར་རོགས་སྐྱོར་བྱེད་པ་དང་། དུད་ཚང་དབུལ་པོར་དབུལ་སྒྲོལ་སྣེ་ཁྲིད་ཀྱི་ནུས་པ་ཆེ་བའི་ཁྱད་ལྡན་ཐོན་ལས་ལས་སྣོན་དང་ཞབས་ཞུའི་རྟེན་གཞི་སྐྲུན་ཐུབ་པ་བྱས་ནས་ཁྱད་ལྡན་ཐོན་ལས་ཀྱི་མ་ལག་རགས་ཙམ་ཆགས་པ་བྱེད་པ་དང་། ཤང་གྲོང་དབུལ་པོ་དང་གྲོང་ཚོ་དབུལ་པོའི་ཁྱད་ལྡན་ཐོན་ལས་མངོན་གསལ་དོད་པོ་ཡོང་བ་བྱས་ནས་ཁྱད་ལྡན་ཐོན་ལས་ཀྱི་འཕར་ཐང་མངོན་གསལ་མཐོ་རུ་གཏོང་བ། དུད་ཚང་དབུལ་པོས་གོ་ཆོད་ལག་རྩལ་རེ་ཟུང་ཤེས་པ་བྱས་པ་ནས་རང་ངོས་འཕེལ་རྒྱས་གཏོང་བའི་ནུས་པ་ཆེ་རུ་མངོན་གསལ་གཏང་དགོས་ཞེས་བཏོན་ཡོད་པ་རེད།
ད་དུང་བསམ་འཆར་ནང་ཁེ་ཕན་སྦྲེལ་མཐུད་ཀྱི་ལམ་སྲོལ་འཐུས་སྒོ་ཚང་དུ་གཏང་དགོས་པ་དང་། མ་རྐང་མཉམ་ལས་དང་། གྲོང་གསེབ་ཀྱི་ས་ཞིང་འགན་གཙང་དབང་ཆ། ཞིང་པའི་སྡོད་ཁང་དང་རྒྱུ་ནོར་བདག་དབང་སོགས་གོང་ཚད་ཕབ་ནས་མ་རྐང་ནང་ཞུགས་པའི་ལས་དོན་སྤེལ་རྒྱུར་སྐུལ་ལྕག་བྱས་ཏེ་མཉམ་སྡེབ་དཔལ་འབྱོར་རྩ་འཛུགས་ཀྱི་ཁོངས་མིར་མཉམ་སྡེབ་ཁེ་ཕན་གྱི་བགོ་བཤའ་རྒྱག་དབང་ཡོད་པ་བྱེད་པ་དང་། འབྲེལ་ཡོད་ནོར་སྲིད་མ་དངུལ་སྤྱོད་ཡུལ་ལ་འགྱུར་ལྡོག་མི་འགྲོ་བའི་གནས་ཚུལ་འོག་སྒྲིག་བཀོད་ཞིང་ལས་དང་། གསོ་ཚགས། འོད་ཤུགས། ཆུ་གློག གྲོང་གསེབ་ཀྱི་ཡུལ་སྐོར་སོགས་ཀྱི་ལས་གཞི་ཆགས་རྒྱུར་མ་དངུལ་གཏང་དགོས་པ་དང་ཆ་རྐྱེན་འཛོམས་རིགས་ཀྱིས་རྐང་བསྟུན་གྲངས་བཅད་ནང་གྲོང་ཚོ་དབུལ་པོ་དང་དུད་ཚང་དབུལ་པོར་ཁེ་ཕན་ཐོབ་པ་བྱེད་དགོས་པའི་བླང་བྱ་བཏོན་ཡོད་པ་རེད།།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10