ཀྲུང་གོ་བོད་ཀྱི་དྲ་བའི་འཕྲིན། ཉེ་སྔོན། 2016ལོའིCCTVཀྲུང་གོའི་ཕུལ་བྱུང་སློབ་མ“རེ་བའི་སྐར་མ”དབྱིན་ཡིག་བརྗིད་ཉམས་འགྲན་ཚོགས་ལས་ཡུལ་ཤུལ་འགྲན་ཁུལ་གྱི་རྟིང་རྩོད་འགྲན་ཚོགས་ཆེན་མོ་དེ་ཡུལ་ཤུལ་གྲོང་ཁྱེར་རྒྱང་སྒྲོག་བརྙན་འཕྲིན་ཁང་གི་འཁྲབ་སྟོན་ཚོམས་ཆེན་དུ་ཚོགས།

CCTVཀྲུང་གོའི་ཕུལ་བྱུང་སློབ་མ“རེ་བའི་སྐར་མའི”དབྱིན་ཡིག་བརྗིད་ཉམས་འགྲན་ཚོགས་ནི་ཀྲུང་དབྱང་དྲིལ་སྒྲོག་པུའུ་དང་རྒྱལ་ཁབ་རྒྱང་སྒྲོག་བརྙན་འཕྲིན་སྤྱི་ཁྱབ་ཅུའུ་གཉིས་ཀྱིས་ཆོག་མཆན་ཐོབ་ཅིང་། ཀྲུང་དབྱང་བརྙན་འཕྲིན་ཁང་གིས་གཙོ་སྒྲུབ་བྱས་པའི་རྒྱལ་ཡོངས་ལ་ཁ་ཕྱོགས་པའི་གཞི་རྒྱ་ཆེ་བའི་གློག་བརྙན་དབྱིན་ཡིག་འགྲན་སྡུར་ཞིག་ཡིན་ལ། ཀྲུང་གོ་ནས་གཞི་ཁྱོན་དང་ཤུགས་རྐྱེན་ནུས་པ་ཆེས་ཆེ་བའི་ཕྱི་སྐད་འགྲན་སྡུར་ཞིག་ཀྱང་ཡིན། འགྲན་ཚོགས་འདི2000ལོ་ནས་བཟུང་ལོ་རེར་ཐེངས་རེ་ཚོགས་བཞིན་ཡོད་པ་དང་། ད་བར་ཐེངས་བཅུ་དྲུག་ལྷག་ལ་ལེགས་འགྲུབ་བྱུང་ཞིང་། མི་བྱེ་བ་བརྒྱད་ལྷག་ལ་ཡར་སྐུལ་གྱི་ཤུགས་རྐྱེན་ཐེབས་ཡོད། འགྲན་སྡུར་འདི་ཉིད2015ལོའི་ཟླ12པའི་ཚེས25ཉིན་དངོས་སུ་ཚོགས་hགོ་བརྩམས་ཤིང་། སྐབས་དེར་བསྡོམས་པས་སློབ་མ་སུམ་བརྒྱ་དང་ཉེར་གཅིག་ཡུལ་ཤུལ་འགྲན་ཁུལ་གྱི་འགྲན་སྡུར་ཁྲོད་དུ་ཞུགས་ཡོད་པ་དང་། ཐོག་མའི་འགྲན་སྡུར་དང་བསྐྱར་འགྲན་སོགས་བརྒྱུད་དེ་འགྲན་ཞུགས་སློབ་མ་ཉེར་བདུན་དངོས་སུ་རྟིང་རྩོད་འགྲན་སྡུར་ཁྲོད་དུ་བདམས་ཐོན་བྱུང་ཡོད།

འགྲན་ཞུགས་པ་དེ་དག་ཁྲོད་ཀྱི་སློབ་མ་ཆུང་ཆུང་རིག་འཛིན་མཚོ་མོ་ནི་ཆེས་དམིགས་བསལ་གྱི་འགྲན་ཞུགས་པ་ཞིག་སྟེ། ཁོ་མོས2015ལོར་རྒྱལ་ཡོངས་དབྱིན་ཡིག་འགྲན་སྡུར་ཁྲོད་ཕུལ་བྱུང་བདམས་ཐོན་པ20ཡི་གྲལ་དུ་ཚུད་ཅིང་། 2015ལོའིCCTVཀྲུང་གོའི་སློབ་མ་བཟང་པོ“རེ་བའི་སྐར་མ”དབྱིན་ཡིག་བརྗིད་ཉམས་ཞེས་པའི་མཚོ་སྔོན་འགྲན་ཁུལ་འགྲན་སྡུར་ཁྲོད་བྱ་དགའ་ཨང་དང་པོ་ཐོབ་པ་དང་། ད་ཐེངས2016ལོའིCCTVཀྲུང་གོའི་ཕུལ་བྱུང་སློབ་མ“རེ་བའི་སྐར་མ”དབྱིན་ཡིག་བརྗིད་ཉམས་འགྲན་ཚོགས་ཡུལ་ཤུལ་འགྲན་ཁུལ་གྱི་རྟིང་རྩོད་འགྲན་བསྡུར་དུའང་བྱ་དགའ་ཨང་དང་པོ་ཐོབ།།