ཕན་ཅེ་ཝུན་གྱིས་འཛམ་གླིང་འདི་ཕན་ཚུན་རྟེན་ཅིང་འབྲེལ་འབྱུང་དུ་གྲུབ་ཡོད་པར་ཤེས་རྒྱུ་ནི་རང་གཞན་འཕེལ་རྒྱས་གཏོང་ཐབས་ཡག་ཤོས་དེ་ཡིན་ཞེས་གསུངས།

2016-05-19

མཉམ་འབྲེལ་རྒྱལ་ཚོགས་ཀྱི་གཞུང་ཕྱོགས་པོད་ཕྲན་གྱི་ཐོག་བཀོད་པའི་གནས་ཚུལ་ལ་གཞིགས་ན། སྤྱི་ཟླ5ཚེས14ཉིན། ལུགས་རྙིང་ཟླ་བ་བཞི་པའི་ཚེས་བརྒྱད་དེ་སྟོན་པ་སྐུ་འཁྲུངས་པའི་དུས་ཚིགས་ཀྱི་ཉིན་མོར་མཉམ་འབྲེལ་རྒྱལ་ཚོགས་ཀྱི་གཞུང་ཕྱོགས་པོད་ཕྲན་ཐོག་སྟོན་པའི་འཁྲུངས་སྐར་ལ་བརྩི་སྲུང་རྣམ་པ་སྟོན་ཆེད་<<མཉམ་འབྲེལ་རྒྱལ་ཚོགས་དང་ནང་ཆོས>>ཞེས་པའི་ཁ་བྱང་ཅན་བསྟུད་མར་ཚན་པ་བཞི་སྤེལ་ཡོད་པ་རེད། དེར་པོད་ཕྲན་ཐོག་དཔྱད་མཆན་འདེབས་མཁན་དག་གིས་དགའ་བསུ་ཆེན་པོ་བྱས་པར་མ་ཟད། དུས་རབས་འདིར་ནང་ཆོས་ནི་ནུབ་ཕྱོགས་སྤྱི་ཚོགས་སུ་ཆེས་རྒྱུག་ཆེ་ཤོས་ཀྱི་ཆོས་ལུགས་དེ་ཆགས་ཡོད་པ་རེད་ཅེས་པ་ལ་སོགས་པའི་དཔྱད་མཆན་སྤེལ་ཡོད།མཉམ་འབྲེལ་རྒྱལ་ཚོགས་ཀྱི་དྲུང་སྤྱི་ཆེན་མོ་ཕན་ཅེ་ཝུན་གྱིས་ཀྱང་ཡུལ་དུས་མི་འདྲ་བའི་ནང་དུ་ནང་བསྟན་ཐད་བཏོན་པའི་ལྟ་ཚུལ་གསུངས་ཡོད། ༢༠༠༨ལོར་དྲུང་སྤྱི་ཕན་ཅེ་ཝུན་སྟོན་པའི་འཁྲུངས་གནས་བལ་ཡུལ་ལུམྦི་ནིར་མཇལ་སྐོར་དུ་ཕེབས་སྐབས་བཤད་དོན། སྟོན་པ་བཅོམ་ལྡན་འདས་ཀྱིས་རང་ཅག་ལ་བསྩལ་བའི་རྒྱ་ཆེ་ལ་གཏིང་ཟབ་པའི་ཆོས་ཀྱི་ཕུང་པོ་དེ་ཉིད་ཀྱིས་དུས་རབས་འདིར་ཕྲད་དང་འཕྲད་བཞིན་པའི་ཚབས་ཆེན་གྱི་གནས་ཚུལ་འདི་དག་ཐག་གཅོད་བྱེད་པ་ལ་ལམ་སྟོན་གནང་ཐུབ། ནང་བསྟན་གྱི་ཀུན་ལ་བྱམས་པའི་རིན་ཐང་ལྟ་བ་ལ་བརྟེན་ནས་དཀའ་ངལ་ཅན་གྱི་མི་དང་འགྲོགས་འདྲིས་བྱས་ཏེ། མི་ཚང་མ་དེ་བས་སྙིང་རྗེ་ལྡན་པ་དང་དེ་བས་ཡ་རབས་དྲང་བདེན་ཡོང་བའི་ཐད་ལེགས་སྐྱེས་འབུལ་དགོས་ཞེས་གསུངས།ཕན་ཅེ་ཝུན་གྱིས་ནང་ཆོས་དང་མཉམ་འབྲེལ་རྒྱལ་ཚོགས་གཉིས་ལ་ཐུན་མོང་གི་དམིགས་ཡུལ་ཞིག་ཡོད་པ་ནི་མི་ཚང་མས་ཞི་བདེ་དང་འགྲོ་བ་མིའི་ཐོབ་ཐང་སོགས་ལོངས་སུ་སྤྱོད་ཐུབ་པར་བྱ་རྒྱུ་དེ་རེད།ནང་ཆོས་ལས་ང་ཚོར་དགེ་ཕན་ཧ་ཅང་མང་པོ་ཐོབ་ཐུབ། སངས་རྒྱས་ཀྱི་དགོངས་པ་ནི་སེམས་ཅན་སྐྱོབ་པ་ལ་སྔོན་དུ་རང་གིས་ཆོས་ཉམས་ལེན་བྱ་དགོས་པ་དེ་རེད། ཁོང་གི་ཡང་དག་ལ་གནད་འཕིགས་པའི་ལྟ་ཚུལ་དེས་གོ་ལ་ཧྲིལ་པོ་ལེགས་བཅོས་གཏོང་ཐབས་དང་དེའི་སྡོད་དམངས་ཀྱི་བསམ་པ་ཡར་ཐོན་ཡོང་ཆེད་ལམ་ཁ་གསལ་པོར་བསྟན་ཡོད། རང་གཅེས་སྐྱོང་བྱ་བར་གཞན་ལ་ཕན་སེམས་འཆང་དགོས། དེའི་རྒྱུ་མཚན་ཡང་ང་ཚོ་ཚང་མའི་ལས་དབང་ནི་གཅིག་ལ་གཅིག་བརྟེན་དུ་འབྲེལ་ཡོད་པས་རེད་ལ། དེ་ནི་ནང་བསྟན་གྱི་རྩ་བའི་དགོངས་དོན་ཡིན་པར་མ་ཟད། འཛམ་གླིང་གི་ཆོས་ལུགས་ཡོད་དོ་ཅོག་གི་དགོངས་དོན་ཡང་རེད། འཛམ་གླིང་འདི་ཕན་ཚུན་རྟེན་ཅིང་འབྲེལ་འབྱུང་དུ་གྲུབ་ཡོད་པར་ཤེས་རྒྱུ་ནི་རང་གཞན་འཕེལ་རྒྱས་གཏོང་ཐབས་ཡག་ཤོས་དེ་ཡིན་ཞེས་གསུངས་པ་རེད།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10