ཞིན་ཧྭ་གསར་འགྱུར་ཁང་ནས་ཉེ་ཆར་འབྱོར་བའི་གཏམ་གསར།  དེ་སྔོན་འབྲུ་རིགས་འདེབས་མཁན་ཞིང་པར་སྤྲད་པའི་ལོ་ཏོག་གི་ས་བོན་བཟང་པོ་ཉོ་སའི་ཁ་གསབ་དང་། འབྲུ་རིགས་འདེབས་མཁན་ཞིང་པར་ཐད་ཀར་སྤྲོད་པའི་ཁ་གསབ།  ཞིང་ལས་དངོས་རྫས་ཉོ་བར་སྤྲད་པའི་ཕྱོགས་བསྡུས་ཁ་གསབ་བཅས་ཁ་གསབ་རིགས་གསུམ་དེ2016ལོར་ཞིང་ལས་ལ་རྒྱབ་སྐྱོར་དང་སྲུང་སྐྱོང་བྱེད་པའི་ཁ་གསབ་ཅེས་སུ་མཉམ་དུ་བསྡུད་རྒྱུ།  ཟླ་བ4པའི་ཚེས25ཉིན་ནོར་སྲིད་པུའུ་དང་ཞིང་ལས་པུའུ་ཡིས་ཡིག་ཆ་བཏང་སྟེ་ད་ལོར་རྒྱལ་ཡོངས་སུ་ཁྱོན་ཡོངས་ནས་ཞིང་ལས་ཐད་ཀྱི་ཁ་གསབ་རྣམ་གྲངས་གསུམ་གྱི་བཅོས་བསྒྱུར་ལས་ཀར་སྤེལ་ནས་ཞིང་ལས་ཀྱི་ཁ་གསབ་མ་དངུལ་གྱི་ཕན་ནུས་དེ་བས་ཆེན་པོ་འདོན་སྤེལ་བྱེད་དུ་འཇུག་དགོས་ཞེས་ཁྱབ་བསྒྲགས་བྱས།
  ཐེངས་འདིར་བཅོས་བསྒྱུར་བྱས་རྗེས་བརྒྱ་ཆ80ཡི་ཞིང་ལས་དངོས་རྫས་ཀྱི་ཕྱོགས་བསྡུས་ཁ་གསབ་གསོག་དངུལ་དང་།  འབྲུ་རིགས་འདེབས་མཁན་ཞིང་པར་ཐད་ཀར་སྤྲད་པའི་ཁ་གསབ་མ་དངུལ།  ལོ་ཏོག་གི་ས་བོན་བཟང་པོ་ཉོ་སའི་ཁ་གསབ་མ་དངུལ་བཅས་བསྣན་ནས་རྨོ་ཞིང་གི་ཞིང་ཤུགས་སྲུང་སྐྱོང་བྱེད་པར་སྤྱད་རྒྱུ་རེད།  སྡེ་ཚན་གཉིས་ཀྱིས་མ་དངུལ་ཁག་དེའི་ཁ་གསབ་སྤྲད་རྒྱུའི་ཡུལ་རྩ་དོན་ཐོག་བཤད་ན་རྨོ་ཞིང་གི་འགན་གཙང་ལེན་བྱེད་དབང་དབང་བའི་ཞིང་པ་ཡིན་ལ་ཕྱུགས་འབྲོག་གི་གསོ་སྤེལ་ར་བ་བྱས་ཏེ་བེད་སྤྱོད་བྱས་པའི་རྨོ་ཞིང་དང་ནགས་ས།  འབྲུ་རིགས་འདེབས་ཞིང་ཕྱོགས་ངོས་དེ་སྒྲིག་ཆས་ཞིང་ལས་ཀྱི་སྤྱོད་ཞིང་དུ་གྱུར་བ་དང་། ཞིང་ལས་མིན་པའི་རྨོ་ཞིང་བཟུང་བ་སོགས་རྨོ་ཞིང་གི་སྤྱོད་སྒོ་འགྱུར་ལྡོག་བྱས་པའི་རྨོ་ཞིང་ལ་ཡང་ཁ་གསབ་མ་དངུལ་སྤྲད་རྒྱུ་མེད་ཅེས་གསལ་པོར་བཏོན།  བཅོས་བསྒྱུར་བྱས་རྗེས་བརྒྱ་ཆ20ཡི་ཞིང་ལས་དངོས་རྫས་ཀྱི་ཕྱོགས་བསྡུས་ཁ་གསབ་གསོག་དངུལ་དང་།  འབྲུ་རིགས་འདེབས་མཁན་ཞིང་དུད་ཆེན་མོར་སྤྲོད་པའི་ཁ་གསབ་ཚོད་ལྟ་མ་དངུལ།  ཞིང་ལས་ཀྱི་ཁ་གསབ་རྣམ་གྲངས་གསུམ་གྱི་ཐད་བསྣན་པའི་མ་དངུལ་བཅས་གཅིག་སྡོམ་བྱས་ཏེ་འབྲུ་རིགས་གཞི་ཁྱོན་འོས་པ་བདག་གཉེར་བྱེད་པར་རྒྱབ་སྐྱོར་བྱ་རྒྱུ་རེད།  སྡེ་ཚན་གཉིས་ཀྱིས་ཁ་གསབ་ཀྱི་མ་དངུལ་ཁག་དེ་རྩ་དོན་ཐོག2016ལོའི་གཞི་ཁྱོན་གྱིས་གཞི་གྲངས་བྱས་ཏེ་ལོ་རེར་ཞིང་ལས་ལ་རྒྱབ་སྐྱོར་དང་སྲུང་སྐྱོང་བྱེད་པའི་ཁ་གསབ་མ་དངུལ་ནས་འཐེན་ནས་བཀོད་སྒྲིག་བྱ་རྒྱུ།  རྒྱབ་སྐྱོར་བྱ་རྒྱུའི་ཡུལ་གཙོ་བོ་ནི་འབྲུ་རིགས་འདེབས་འཛུགས་བྱེད་མཁན་དུད་ཆེན་དང་།  ཁྱིམ་ཚང་གི་ཞིང་ར།  ཞིང་པའི་མཉམ་ལས་ཁང་།  ཞིང་ལས་སྤྱི་ཚོགས་ཅན་གྱི་ཞབས་འདེགས་རྩ་འཛུགས་སོགས་རྣམ་པ་གསར་པའི་བདག་གཉེར་བྱེད་མཁན་གཙོ་བོ་བསྐྱངས་ཏེ་སུས་འབྲུ་རིགས་མང་པོར་འདེབས་ན་དེར་དང་ཐོག་རྒྱབ་སྐྱོར་བྱེད་པར་མཚོན་ཞེས་གསལ་པོ་བཏོན།
  མིག་སྔར། ཀྲུང་དབྱང་ནོར་སྲིད་ཀྱིས2016ལོར་རྨོ་ཞིང་ཞིང་ཤུགས་ལ་སྲུང་སྐྱོང་བྱེད་པའི་ཞིང་ལས་རྒྱབ་སྐྱོར་དང་སྲུང་སྐྱོང་གི་ཁ་གསབ་མ་དངུལ་ཐམས་ཅད་སྔར་སྣུར་བཏང་ཡོད།  སྡེ་ཚན་གཉིས་ཀྱིས་ས་གནས་སོ་སོར་ལག་ལེན་གྱི་འཆར་འགོད་མགྱོགས་པོར་བཟོ་འགོད་བྱས་ཏེ་ཟླ་བ6པའི་ཚེས30ཉིན་གྱི་སྔོན་དུ་ཁ་གསབ་མ་དངུལ་ཐམས་ཅད་ཞིང་པའི་ལག་ཐོག་སྤྲོད་དགོས་པའི་བླང་བྱ་བཏོན།