ཞིན་ཧྭ་གསར་འགྱུར་ཁང་ཁྲེང་ཏུའུ་ནས་ཉེ་ཆར་འབྱོར་བའི་གཏམ་གསར།  སི་ཁྲོན་ཞིང་ཆེན་སྲིད་གཞུང་གཞུང་ལས་ཐིང་ནས་ཤེས་རྟོགས་བྱུང་བར་གཞིགས་ན།  སི་ཁྲོན་ཞིང་ཆེན་གྱིས་ཉེ་དུས་ཚད་གཞི་མཐོན་པའི་ས་ཞིང་བསྐྲུན་རྒྱུའི་ལས་ཀར་ཤུགས་སྣོན་པའི་སྐོར་གྱི་བརྡ་ཐོ་གསར་དུ་བཏོན་ནས་ལོ་ལྔའི་འཆར་གཞི་བཅུ་གསུམ་པའི་སྐབས་སུ་སི་ཁྲོན་གྱིས་ཚད་གཞི་མཐོན་པོའི་ས་ཞིང་མུའུ་ཁྲི2000བསྐྲུན་རྒྱུ་དང་ཆ་སྙོམས་ལོ་རེར་མུའུ་ཁྲི400བསྐྲུན་རྒྱུ་ཡིན་པར་མ་ཟད།  ད་དུང་སྒྲིག་སྦྱོར་གྱིས་ཞིང་ཁའི་ཆུ་བེད་ལས་གཞི་འཛུགས་སྐྲུན་བྱ་རྒྱུ་དང་།དེའི་ནང་སི་ཁྲོན་ཞིང་ཆེན་ཞིང་ལས་གསར་སྦོལ་གཞུང་ལས་ཁང་གིས་འགོ་ཁྲིད་དེ་འཕེལ་རྒྱས་བཅོས་བསྒྱུར་དང་། ནོར་སྲིད། ཞིང་ལས།  ཆུ་བེད་སོགས་སྡེ་ཚན་དང་མཉམ་དུ་ལོ་རེར་ཚད་གཞི་མཐོན་པོའི་ས་ཞིང་མུའུ་ཁྲི200བསྐྲུན་རྒྱུ་དང་།  རྒྱལ་ས་ཐོན་ཁུངས་ཐིང་གིས་འགོ་ཁྲིད་བྱས་ཏེ་ལོ་རེར་ཚད་གཞི་མཐོན་པོའི་ས་ཞིང་མུའུ་ཁྲི200བསྐྲུན་རྒྱུ་རེད།
  ཤེས་རྟོགས་བྱུང་བར་གཞིགས་ན། སི་ཁྲོན་ཞིང་ཆེན་གྱིས་ཚད་གཞི་མཐོན་པོའི་ས་ཞིང་བསྐྲུན་པ་དེ་ཆུ་ལ་བརྟེན་ནས་ས་ཞིང་གཏན་འཁེལ་དང་།  ཆུ་ལ་བརྟེན་ནས་ཐོན་ཚད་གཏན་འཁེལ་བྱེད་པའི་རྩ་དོན་ལྟར།  ཚད་གཞི་མཐོན་པོའི་ས་ཞིང་འཆར་འགོད་ས་ཁོངས་ལ་དམིགས་ཏེ་སྔོན་དུ་ཆུ་བེད་ལས་གཞི་བཀོད་སྒྲིག་བྱེད་པ་དང་། ཆུ་བེད་ཆུ་གཏོང་ས་ཁོངས་ཀྱི་སྒྲིག་སྦྱོར་ལས་གཞི་དང་།  ཞིང་ཁའི་ཆུ་བེད་འཛུགས་སྐྲུན་ལས་གཞི་ཆུང་གྲས།  ཆུ་བོ་ཆུང་ཆུང་གི་བཅོས་སྐྱོང་།  ཆུ་བསྲིའི་ཆུ་གཏོང་བ་སོགས་ཀྱི་ལས་གྲྭ་དང་ཚད་གཞི་མཐོན་པོའི་ས་ཞིང་བསྐྲུན་རྒྱུའི་བར་ཟུང་འབྲེལ་དམ་ཟབ་དང་། སྒྲིག་སྦྱོར་གྱིས་འཛུགས་སྐྲུན།  ཆུའི་ཐོན་ཁུངས་འགན་སྲུང་དང་ཆུ་གཏོང་བའི་ཐད་དོན་འཁྱོལ་བྱ་རྒྱུའི་གནད་དོན་ཐག་གཅོད་ནན་པོར་བྱས་ཏེ།  ཚད་གཞི་མཐོན་པོའི་ས་ཞིང་ལ་ཐན་པ་ཆེ་ན་ཆུ་གཏོང་ཐུབ་པ་དང་ཆར་ཞོད་ཆེ་ན་ཆུ་ཕྱིར་གཏོང་ཐུབ་པར་ཁག་ཐེག་ནན་པོ་བྱ་རྒྱུ།།