ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ3པའི་ཚེས22ཉིན་འབྱོར་བའི་གཏམ་གསར། རྒྱལ་ཁབ་བཟའ་བཅའ་དང་སྨན་རྫས་ལྟ་སྐུལ་དོ་དམ་སྤྱི་ཁྱབ་ཅུས་ནས་ཤེས་རྟོགས་བྱུང་བར་གཞིགས་ན། བཟའ་བཅའ་དང་སྨན་རྫས་ལྟ་སྐུལ་དོ་དམ་སྤྱི་ཁྱབ་ཅུས་ཀྱིས་ཧྲན་ཏུང་ཅི་ནན་གྱི་ཁྲིམས་འགལ་ངང་རིམས་འགོག་སྨན་ཁབ་གཉེར་སྐྱོང་གི་གྱོད་གཞིའི་བཤེར་ཉར་བྱས་པའི་སྨན་རྫས་ཀྱི་གྲངས་གཞིར་དབྱེ་ཞིབ་བྱས་རྗེས་རིམས་འགོག་སྨན་ཁབ་བྲིན་ཚོང་ཐབས་ལམ་རྫུན་བཟོ་བྱས་པ་དང་འབྲེལ་བ་ཡོད་པའི་སྨན་རྫས་སྡེབ་ཚོང་ཁེ་ལས9ཡོད་པ་ཤེས་རྟོགས་བྱུང་ཞིང་། བཟའ་བཅའ་དང་སྨན་རྫས་ལྟ་སྐུལ་དོ་དམ་སྤྱི་ཁྱབ་ཅུས་ཀྱིས་འབྲེལ་ཡོད་ས་གནས་ཀྱི་བཟའ་བཅའ་དང་སྨན་རྫས་ལྟ་སྐུལ་དོ་དམ་ཅུས་ལ་རྩད་གཅོད་མཐར་ཕྱིན་བྱས་ཏེ་ཟླ་བ3པའི་ཚེས25ཉིན་གོང་དུ་བརྟག་དཔྱད་བྱས་འབྲས་གོང་ཞུ་བྱ་དགོས་པ་དང་འབྲེལ་སྤྱི་ཁྱབ་ཅུས་ཀྱིས་སྤྱི་ཚོགས་ཐོག་གཅིག་གྱུར་ཡོངས་བསྒྲགས་བྱ་དགོས་པའི་བླང་བྱ་བཏོན།ཤེས་རྟོགས་བྱུང་བར་གཞིགས་ན། སྨན་རྫས་སྡེབ་ཚོང་ཁེ་ལས9དེ་དག་ནི་ཧོ་པེ་ཞིང་ཆེན་འཕྲོད་བསྟེན་སྔོན་འགོག་སྐྱེ་དངོས་ཐོན་རྫས་མཁོ་འདོན་ལྟེ་གནས་དང་། ཧུའུ་ནན་ཧྭ་དབྱི་སྐྱེ་དངོས་ཐོན་རྫས་ཚད་ཡོད་སྤྱི་གཉེར་ཁང་།ཧྲའན་ཞི་དབྱི་ཁང་ཀྲུང་ཧྲེང་སྨན་རྫས་སྐྱེ་དངོས་ཚད་ཡོད་སྤྱི་གཉེར་ཁང་དང་། ཧྲན་ཏུང་ཀྲའོ་ཤིན་སྐྱེ་དངོས་ཚད་ཡོད་སྤྱི་གཉེར་ཁང་། ཧྲན་ཏུང་ཧྲི་ཅེ་སྐྱེ་དངོས་སྨན་རྫས་ལས་རིགས་ཚད་ཡོད་སྤྱི་གཉེར་ཁང་། ཀྲེང་ཀྲོའུ་པང་ཀྲེང་སྨན་རྫས་ཚད་ཡོད་སྤྱི་གཉེར་ཁང་། ཅི་ལིན་ཧྲང་ཡོད་སྐྱེ་དངོས་ཐོན་རྫས་ཚད་ཡོད་སྤྱི་གཉེར་ཁང་། ཅི་ཉིང་ཕུའུ་ཐའེ་སྨན་རྫས་ཚད་ཡོད་སྤྱི་གཉེར་ཁང་། ཧྲའན་ཞི་དབྱི་ཝེ་ཏ་ཁང་སྐྱེ་དངོས་ཚད་ཡོད་སྤྱི་གཉེར་ཁང་བཅས་ཡིན་པ་རེད།བཟའ་བཅའ་དང་སྨན་རྫས་ལྟ་སྐུལ་དོ་དམ་སྤྱི་ཁྱབ་ཅུས་ཀྱིས་འབྲེལ་ཡོད་ས་གནས་ཀྱི་བཟའ་བཅའ་དང་སྨན་རྫས་ལྟ་སྐུལ་དོ་དམ་ཅུས་ལ་སྨན་རྫས་སྡེབ་ཚོང་ཁེ་ལས9ལ་ལམ་སང་བརྟག་དཔྱད་བྱས་ཏེ་རྫུན་བཟོའི་ཐོན་རྫས་ས་གནས་གང་དུ་བྲིན་ཚོང་བྱས་པ་དང་རྩད་གཅོད་མཐར་ཕྱིན་བྱས་ཏེ་ཁྲིམས་འགལ་སྒྲིག་འགལ་གྱི་བྱ་སྤྱོད་བརྟག་དཔྱད་ཐུབ་ཚེ་གྱོད་དོན་ཐོ་འགོད་བྱས་ནས་ཞིབ་གཅོད་ནན་པོ་བྱ་དགོས་པ་དང་། ཁེ་ལས་གཞན་དང་འབྲེལ་བ་ཡོད་ཚེ་ངེས་པར་དུ་རྩད་གཅོད་མཐར་ཕྱིན་པ་བྱ་དགོས། བརྟག་དཔྱད་བྱས་འབྲས་དེ2016ལོའི་ཟླ་བ3པའི་ཚེས25ཉིན་གོང་བཟའ་བཅའ་དང་སྨན་རྫས་ལྟ་སྐུལ་དོ་དམ་སྤྱི་ཁྱབ་ཅུས་ལ་གོང་ཞུ་བྱ་དགོས་པ་དང་འབྲེལ་སྤྱི་ཚོགས་ཐོག་ཡོངས་བསྒྲགས་ཀྱང་བྱ་དགོས་པའི་བླང་བྱ་བཏོན་པ་རེད།།