ཞིན་ཧྭ་གསར་འགྱུར་ཁང་ལན་གྲུ་ནས་ཟླ་བ3པའི་ཚེས13་ཉིན་འབྱོར་བའི་གཏམ་གསར། ད་ལོ་ནས་བཟུང་ཀན་སུའུ་ཡི་ཞིང་པའི་གླ་པར་སྡོད་ཁང་གི་སྤྱི་པའི་གསོག་དངུལ་ཡོད་པ་རེད། སྡོད་ཁང་ལྷག་མ་འཚོང་ཐུབ་ཆེད། ཀན་སུའུ་ཡིས་ཞིང་པའི་གླ་པ་རྣམས་སྡོད་ཁང་གི་སྤྱི་པའི་གསོག་དངུལ་གྱི་ཁེབས་པའི་གཞི་ཁྱོན་དུ་བཅུག་སྟེ་ཞིང་པའི་གླ་པ་དང་ཉོ་མོས་ཡོད་པའི་ཞིང་པས་གྲོང་ཁྱེར་དུ་སྡོད་ཁང་ཉོས་པར་རྒྱབ་སྐྱོར་བྱས་པ་རེད།

　སྡོད་ཁང་གི་སྤྱི་པའི་གསོག་དངུལ་འཇལ་པའི་ཞིང་པའི་གླ་པར་ཀན་སུའུ་ཡིས་དེ་ཚོས་སྤྱི་པའི་གསོག་དངུལ་གྱི་དངུལ་བུན་སྤྱད་དེ་སྤྱིར་བཏང་གི་སྡོད་ཁང་ཉོས་པར་རྒྱབ་སྐྱོར་བྱས་ཤིང་། ཀན་སུའུ་ཞིང་ཆེན་སྲིད་གཞུང་གིས་དངུལ་ཁང་དང་དངུལ་རྩའི་ལས་ཁུངས་ལ་ཞིང་སྡེ་ཡུལ་མི་སྒེར་གྱིས་སྡོད་ཁང་ཉོ་སའི་དངུལ་བུན་བྱེད་སྒོ་ཧུར་ཐག་སྤེལ་ནས་ཞིང་པ་གྲོང་ཁྱེར་དུ་ཡོང་ནས་སྡོད་ཁང་ཉོས་པར་རྒྱབ་སྐྱོར་བྱ་དགོས་པ་དང་། དུས་མཚུངས་སུ་ཆ་རྐྱེན་ཡོད་པའི་རྫོང་དང་གྲོང་ཁྱེར་ཆུས་བཅས་རིམ་པ་སོ་སོའི་སྲིད་གཞུང་ལ་ཞིང་པའི་གླ་པ་དང་ཉོ་མོས་ཡོད་པའི་ཞིང་པ་གྲོང་ཁྱེར་དུ་ཡོང་ནས་སྡོད་ཁང་ཉོས་པར་སྲིད་ཇུས་ཐད་ཀྱི་རྒྱབ་སྐྱོར་བྱ་དགོས་པའི་བླང་བྱ་བཏོན།

　ཞིང་པའི་གླ་པས་གྲོང་ཁྱེར་དུ་ཡོང་ནས་སྡོད་ཁང་ཉོས་རྗེས་ཀྱི་སེམས་ཁྲལ་སེལ་ཆེད། ཀན་སུའུ་ཞིང་ཆེན་གྱིས་ད་རུང་འབྲེལ་ཡོད་སྲིད་ཇུས་བཏོན་ནས་གྲོང་ཁྱེར་དུ་ཡོང་བའི་ཞིང་པ་དང་དེ་ཚོའི་བུ་ཕྲུག་རྣམས་ལས་ཞུགས་དང་།སློབ་གསོ། སྨན་བཅོས་བཅས་སྤྱི་པའི་ཞབས་ཞུར་འདྲ་མཉམ་དུ་ལོངས་སུ་སྤྱོད་པར་འགན་སྲུང་བྱས་ཏེ། ཞིང་པའི་གླ་པ་དང་ཉོ་མོས་ཡོད་པའི་ཞིང་པ་གྲོང་ཁྱེར་དུ་ཡོང་ནས་སྡོད་ཁང་ཉོས་པར་ཆ་རྐྱེན་བསྐྲུན་ཡོད།།