ཞིན་ཧྭ་གསར་འགྱུར་ཁང་ཟི་ལིང་ནས་འབྱོར་བའི་གཏམ་གསར། ཀན་སུའུ་གསར་འགྱུར་དྲ་བའི་ཐོག་གནས་ཚུལ་སྤེལ་བར་གཞིགས་ན། དགུན་དུས་ནི་ཞིང་པ་དལ་ཤོས་ཀྱི་དུས་ཡིན་ནའང་ཀན་ལྷོ་བོད་རིགས་རང་སྐྱོང་ཁུལ་འབྲུག་ཆུ་རྫོང་གིས་ཁོང་ཚོ་དལ་པོར་མ་བཞག་པར་ལས་བྱེད་པ་དང་མང་ཚོགས་ཚང་མ་དབུལ་སྐྱོར་གནད་སྨིན་དང་དབུལ་སྒྲོལ་གནད་སྨིན་ལ་གཞོལ་དུ་བཅུག གྲོང་ཚོར་བཅའ་སྡོད་རོགས་སྐྱོར་ལས་དོན་རུ་ཁག་དང་། ཤང་དང་གྲོང་རྡལ། གྲོང་ཚོ་བཅས་ཀྱི་ལས་བྱེད་པ་གྲོང་ཚོ་དང་དུད་ཁྱིམ་དུ་བསྐྱོད་དེ་དུད་ཚང་དབུལ་པོར་དབུལ་སྐྱོར་གནད་སྨིན་དང་དབུལ་སྒྲོལ་གནད་སྨིན་གྱི་སྲིད་ཇུས་དྲིལ་བསྒྲགས་བྱས་པ་དང་ངལ་རྩོལ་རྩལ་ནུས་གསོ་སྦྱོང་གི་ལས་དོན་སྤེལ་བ་རེད།
　ཤེས་རྟོགས་བྱས་པར་གཞིགས་ན། འབྲུག་ཆུ་རྫོང་གིས་དགུན་ཁ་ཤར་བ་ནས་བཟུང་ཤང་རེ་རེ་དང་གྲོང་ཚོ་རེ་རེ་བཞིན་གྲལ་བཤེར་རྣམ་པའི་གསོ་སྦྱོང་བྱས་པ་དང་འབྲེལ། ལག་རྩལ་ཆེད་ལས་ཀྱི་བསླབ་པ་རྒན་གྲས་གདན་དྲངས་ནས་གཅིག་སྡུད་ཐོག་འཛིན་གྲྭ་གཉེར་བ་དང་། ལས་ཡུལ་དངོས་སུ་མཛུབ་ཁྲིད་བྱེད་པ། ལག་རྩལ་དང་ཞབས་ཞུ་ཟུང་འབྲེལ་སོགས་ཀྱི་བྱེད་ཐབས་སྤྱད་དེ་ཞིང་ཁ་དང་མུ་ཁའི་ནང་གསོ་སྦྱོང་བྱེད་པ་དང་། གསོ་སྦྱོང་གི་ནང་དོན་ཐོན་ལས་ཀྱི་འཐབ་ས་དང་པོར་སྣུར་སྲིང་བྱེད་པ། དགུན་འདེབས་ཀྱི་པད་ཁའི་ནད་འབུ་འགོག་བཅོས་ལ་གཙོ་གནད་དམ་འཛིན་བྱེད་པ། ཉི་འོད་དྲོད་ཁང་ནང་ཀྭ་དང་སྔོ་ཚལ་རིགས་འདེབས་གསོ་བྱེད་པ། འབྲས་ཤིང་ཡལ་བཞུར་རྒྱག་སྟངས་སོགས་ཀྱི་ནང་དོན་གསོ་སྦྱོང་བྱས་པ་རེད།
ན་ནིང་འབྲུག་ཆུ་རྫོང་གིས་མི་གྲངས་ཁྲི1.21ལ་རིགས་མི་འདྲ་བའི་གསོ་སྦྱོང་དང་མི2504ལ་རྩལ་ནུས་དཔྱད་སྡོམ་བྱས་པ་རེད། འདི་ལོར་མི2100ཙམ་ལ་རྩལ་ནུས་གསོ་སྦྱོང་དང་མི་ཐེངས5321ལ་ཉེར་སྤྱོད་ལག་རྩལ་གསོ་སྦྱོང་བྱ་རྩིས་ཡོད་པ་རེད།