ཙུང་ལི་ལི་ཁེ་ཆང་གིས་མིང་རྟགས་བཀོད་དེ་མཆན་བཀོད་མཛུབ་སྟོན་གནང་བ་ལྟར། རྒྱལ་སྲིད་སྤྱི་ཁྱབ་ཁང་གིས་ཉེ་དུས་པར་དུ་བསྐྲུན་པའི《རྒྱ་ལུགས་སྨན་རིག་འཕེལ་རྒྱས་གཏོང་བའི་འཐབ་ཇུས་འཆར་འགོད་རྩ་གནད（2016ལོ་ནས2030ལོའི་བར）》（འོག་ཏུ་རྩ་གནད་ཅེས་བསྡུས་པ）ཐོག་འབྱུང་འགྱུར་གྱི་ལོ15ཡི་རིང་རང་རྒྱལ་གྱི་རྒྱ་ལུགས་སྨན་རིག་འཕེལ་རྒྱས་གཏོང་བའི་བྱེད་ཕྱོགས་དང་ལས་ཀའི་གཙོ་གནད་གསལ་པོ་བཏོན་ཡོད་ལ། དུས་རིམ་གསར་པར་རང་རྒྱལ་གྱི་རྒྱ་ལུགས་སྨན་རིག་གི་བྱ་གཞག་འཕེལ་རྒྱས་ཡོང་བར་སྐུལ་འདེད་གཏོང་བའི་རྩ་འཛིན་རང་བཞིན་ལྡན་པའི་ཡིག་ཆ་ཡིན།
　　《རྩ་གནད》ནང་ཕྱིན་ཆད་ཀྱི་དུས་རིམ་ནང་རྒྱ་ལུགས་སྨན་རིག་འཕེལ་རྒྱས་གཏང་དགོས་པའི་ལས་འགན་གཙོ་བོ་གསལ་པོ་བསྟན་ཡོད་པ་སྟེ།
　　གཅིག་ནི་རྒྱ་ལུགས་སྨན་རིག་གི་སྨན་བཅོས་ཞབས་ཞུ་བྱེད་ནུས་ཆེ་རུ་ཏན་ཏིག་གཏང་དགོས་ཤིང་། གྲོང་ཁྱེར་དང་གྲོང་གསེབ་ཏུ་ཁྱབ་པའི་རྒྱ་ལུགས་སྨན་རིག་སྨན་བཅོས་ཀྱི་ཞབས་ཞུ་དྲ་བ་འཐུས་སྒོ་ཚང་དུ་གཏང་དགོས། རྒྱ་ལུགས་སྨན་རིག་དང་ཕྱི་ལུགས་སྨན་རིག་བར་ཟུང་འབྲེལ་བྱེད་པ་དང་མི་རིགས་སྨན་རིག་འཕེལ་རྒྱས་ཡོང་བར་སྐུལ་འདེད་གཏང་དགོས། རྒྱ་ལུགས་སྨན་རིག་གི་ཞབས་ཕྱི་ཞུ་ཁྱོན་རྒྱ་སྐྱེད་གཏོང་ཞིང་། འཕྲིན་སྦྲེལ་དྲ་བ་དང་རྒྱ་ལུགས་སྨན་རིག་གི་སྨན་བཅོས་བྱ་གཞག་མཉམ་པོ་གོང་འཕེལ་ཡོང་བར་སྐུལ་འདེད་གཏང་དགོས།
　　གཉིས་ནི་ཤུགས་ཆེན་པོས་རྒྱ་ལུགས་སྨན་རིག་གི་ལུས་ཟུངས་གསོ་བ་དང་ལུས་ཁམས་བདེ་སྲུང་གི་ཞབས་ཞུ་ལས་རིགས་འཕེལ་རྒྱས་གཏང་དགོས་ཤིང་། ཞབས་ཞུ་མ་ལག་མགྱོགས་པོ་བསྐྲུན་དགོས། ཞབས་ཞུ་བྱེད་ནུས་ཆེ་རུ་གཏང་དགོས། རྒྱ་ལུགས་སྨན་རིག་དང་བདེ་ཐང་རྒན་གསོའི་བར་དང་། ཡུལ་སྐོར་ཐོན་ལས་བར་མཉམ་འདྲེས་འཕེལ་རྒྱས་ཡོང་བར་སྐུལ་འདེད་གཏང་དགོས།
　　གསུམ་ནི་ཁྱོན་ཡོངས་ནས་རྒྱ་ལུགས་སྨན་རིག་གི་རིག་པའི་གཞུང་ལུགས་ཀྱི་བྱེད་ཐབས་རྒྱུན་འཛིན་ཡག་པོ་བྱ་དགོས་ཤིང་། རྒྱ་ལུགས་སྨན་རིག་གི་སྲོལ་རྒྱུན་ཤེས་བྱ་སྲུང་སྐྱོང་བྱེད་པ་དང་ལག་རྩལ་སྔོག་འདོན་བྱེད་པར་ཤུགས་བརྒྱག་དགོས། རྒྱ་ལུགས་སྨན་རིག་རྒྱུན་འཛིན་བྱ་རྒྱུའི་སློབ་གསོར་ཤུགས་བརྒྱག་དགོས།
　　བཞི་ནི་ཤུགས་ཆེན་པོས་རྒྱ་ལུགས་སྨན་རིག་གསར་སྐྲུན་བྱེད་པར་སྐུལ་འདེད་གཏང་དགོས་ཤིང་། རྩད་ཆོད་དཀའ་བའི་ནད་ཚབས་ཆེན་པོ་དང་འགོས་ནད་ཚབས་ཆེན་པོ་མཉམ་ལས་འགག་སྒྲོལ་བྱེད་པར་ཤུགས་བརྒྱབ་སྟེ། གལ་ཆེ་བའི་རྒྱ་ལུགས་སྨན་རིག་གི་སྨན་རྫས་གསར་པའི་གསར་སྐྲུན་ནང་རྐྱེན་གོང་འཕེལ་གསར་པ་ཡོང་བར་སྐུལ་འདེད་གཏང་དགོས།
　　ལྔ་ནི་ཁྱོན་ཡོངས་ནས་རྒྱ་ལུགས་སྨན་རིག་གི་ཐོན་ལས་འཕེལ་རྒྱས་གཏོང་བའི་ཆུ་ཚད་མཐོ་རུ་གཏང་དགོས། རྒྱ་ལུགས་སྨན་རིག་གི་ཐོན་ཁུངས་སྲུང་སྐྱོང་དང་བེད་སྤྱོད་བྱེད་པར་ཤུགས་བརྒྱག་དགོས། རྒྱ་ལུགས་སྨན་རིག་གི་སྨན་རྫས་ཚད་ལྡན་ཅན་དུ་འདེབས་འཛུགས་དང་གསོ་སྤེལ་བྱེད་པར་སྐུལ་འདེད་གཏང་དགོས། རྒྱ་ལུགས་སྨན་རིག་བཟོ་ལས་ཀྱི་ཐོན་ལས་སྒྱུར་བ་དང་རིམ་པ་སྤར་བར་སྐུལ་འདེད་བཏང་སྟེ་དེང་རབས་ཀྱི་རྒྱ་ལུགས་གསོ་རིག་སྨན་རྫས་ཀྱི་འཁོར་སྐྱོད་མ་ལག་འཛུགས་སྐྱོང་བྱ་དགོས།
　　དྲུག་ནི་ཤུགས་ཆེན་པོས་རྒྱ་ལུགས་སྨན་རིག་གི་རིག་གནས་དར་སྤེལ་གཏང་དགོས་ཤིང་། རྒྱ་ལུགས་སྨན་རིག་གི་རིག་གནས་ཐོན་ལས་འཕེལ་རྒྱས་གཏང་དགོས།
　　བདུན་ནི་རྒྱ་ལུགས་སྨན་རིག་ཕྱི་རྒྱལ་དུ་འཕེལ་རྒྱས་གཏོང་བར་སྐུལ་འདེད་ཧུར་ཐག་གཏང་དགོས་ཤིང་། ཕྱིར་སྤེལ་རེས་དང་མཉམ་ལས་བྱེད་ཤུགས་ཆེ་རུ་གཏང་དགོས། རྒྱ་ལུགས་སྨན་རིག་གི་རྒྱལ་ཕྱིའི་ཕྱོགས་ཀྱི་ཉོ་འཚོང་བྱེད་ཁྱོན་རྒྱ་སྐྱེད་གཏང་དགོས་སོ།།