ཞི་ཅིན་ཕིང་།ལི་ཁེ་ཆང་།ལིའུ་ཡུན་ཧྲན།ཝང་ཆི་ཧྲན།ཀྲང་ཀའོ་ལི་ཚོགས་འདུར་ཕེབས་ནས་རྟེན་འབྲེལ་ཞུ།　ཡུས་ཀྲེང་ཧྲེང་གིས་སྲིད་གྲོས་རྒྱུན་ལས་ཨུ་ཡོན་ལྷན་ཁང་གི་ལས་ཀའི་སྙན་སེང་ཞུས།ཁྲེན་ཞའོ་ཀོང་གིས་གྲོས་གཞི་ལས་ཀའི་གནས་ཚུལ་གྱི་སྙན་སེང་ཞུས།ཏུའུ་ཆིན་ལིང་གིས་ཚོགས་ཆེན་གྱི་གཙོ་འགན་བཞེས།
　　ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ3པའི་ཚེས3ཉིན་འབྱོར་བའི་གཏམ་གསར།གོང་ཚེས་ཉིན་གྱི་ཕྱི་དྲོར།ཀྲུང་གོ་མི་དམངས་ཆབ་སྲིད་གྲོས་མོལ་ཚོགས་འདུའི་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཞི་པ་པེ་ཅིན་མི་དམངས་ཚོགས་ཁང་ཆེན་པོའི་ནང་འཚོག་འགོ་ཚུགས་པ་རེད།ཕྱིན་ཆད་ཀྱི་ཉིན་བཅུ་ལྷག་གི་ནང་སྲིད་གྲོས་ཨུ་ཡོན2100ལྷག་གིས་ལོ་ལྔའི་འཆར་གཞི་བཅུ་གསུམ་པའི་འཆར་འགོད་རྩ་གནད་ལ་དང་།འབྲེལ་ཡོད་སྙན་སེང་ལ་གཞིགས་ནས་འགན་ནུས་ལག་ལེན་ནན་ཏན་བྱས་ནས་ཧུར་ཐག་གིས་ཐབས་འདོན་ཇུས་འདོན་བྱས་ཏེ་ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཐུབ་རྒྱུ་དང་།ཀྲུང་ཧྭ་མི་རིགས་ཀྱི་རླབས་ཆེན་བསྐྱར་དར་ཡོང་བར་བྱས་རྗེས་གསར་པ་དེ་བས་ཆེན་པོ་གཞག་རྒྱུ་རེད།
　　རྒྱལ་ཡོངས་སྲིད་གྲོས་ཀྱི་ཀྲུའུ་ཞི་ཡུས་ཀྲེང་ཧྲེང་།རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཏུའུ་ཆིན་ལིང།ཧན་ཆི་ཏེ།འཕགས་པ་ལྷ་དགེ་ལེགས་རྣམ་རྒྱལ།ཏུང་ཇན་ཧྭ།ཝན་ཀང་།ལིན་ཝུན་དབྱི།ལའོ་ཧྥུ་ཧའོ།ཧའོ་ཧུའུ་ཧྭ།ཀྲང་ཆིན་ལིན།ལི་ཧའེ་ཧྥེང་།ཁྲེན་ཡོན།ལུའུ་ཀྲན་ཀུང་།ཀྲོའུ་ཞའོ་ཁྲོན།ཝང་ཅ་རུའེ།ཝང་ཀྲེང་ཝེ།མར་པིའོ།ཆིས་ཞུས་ཁྲུན།ཁྲེན་ཞའོ་ཀོང་།མར་ཕའེ་ཧྭ།ལིའུ་ཞའོ་ཧྥེང་།ཝང་ཆིན་མིང་བཅས་ཀྲུའུ་ཞི་སྟེགས་བུའི་མདུན་གྲལ་དུ་བཞུགས་པ་རེད།
ཏང་དང་རྒྱལ་ཁབ་ཀྱི་འགོ་ཁྲིད་ཞི་ཅིན་ཕིང་།ལི་ཁེ་ཆང་།ལིའུ་ཡུན་ཧྲན།ཝང་ཆི་ཧྲན།ཀྲང་ཀའོ་ལི་ཚོགས་འདུར་ཕེབས་ནས་རྟེན་འབྲེལ་ཞུ།　　　
　　རྒྱལ་ཡོངས་སྲིད་གྲོས་སྐབས་བཅུ་གཉིས་པའི་གྲོས་ཚོགས་ཐེངས་བཞི་པའི་ནང་ཞུགས་དགོས་པའི་ཨུ་ཡོན2214ཡིན་པ་དང་།དངོས་སུ་ཞུགས་པའི་ཨུ་ཡོན2136ཡོད་པས་གཏན་འཁེལ་མི་གྲངས་དང་མཐུན་པ་རེད།ཕྱི་དྲོའི་ཆུ་ཚོད3པའི་ཐོག་ཚོགས་ཆེན་འཚོག་འགོ་ཚུགས་པ་རེད།ཚོགས་ཆེན་གྱིས་དང་ཐོག་སྲིད་གྲོས་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཞི་པའི་གྲོས་རིམ་ལ་གྲོས་ཞིབ་བྱས་ནས་གྲོས་འཆམ་བྱུང་བ་རེད།
　　ཡུས་ཀྲེང་ཧྲེང་གིས་སྲིད་གྲོས་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་གི་ཚབ་མཛད་ནས་ཚོགས་ཆེན་ལ་ལས་ཀའི་སྙན་སེང་ཞུས་པ་རེད།
　　ཡུས་ཀྲེང་ཧྲེང་གིས་ཕྱོགས་བརྒྱད་ཀྱི་ཐད་ནས་འདས་པའི་ལོ་གཅིག་གི་མི་དམངས་སྲིད་གྲོས་ཀྱི་ལས་ཀར་ཕྱོགས་བསྡོམས་མཛད།ཁོང་གིས་གསུངས་དོན།2015ལོ་ནི་ཁྱོན་ཡོངས་ནས་བཅོས་བསྒྱུར་ཟབ་སྤེལ་བྱས་པའི་འགག་རྩའི་ལོ་ཡིན་ལ།ཁྱོན་ཡོངས་ནས་བཅའ་ཁྲིམས་ལྟར་རྒྱལ་ཁབ་སྐྱོང་བའི་ལོ་དང་པོའང་ཡིན།མི་དམངས་སྲིད་གྲོས་ཀྱི་བྱ་གཞག་གསར་གཏོད་མཆོང་སྐྱོད་དང་གསར་སྐྲུན་འཕེལ་རྒྱས་གཏོང་བའི་གལ་ཆེ་བའི་ལོ་ཡང་ཡིན་པ་རེད།བློ་མཐུན་ཞི་ཅིན་ཕིང་གིས་སྤྱི་ཁྱབ་ཧྲུའུ་ཅི་མཛད་པའི་ཀྲུང་གུང་ཀྲུང་དབྱང་གིས་སྲིད་གྲོས་ལས་ཀར་མཐོང་ཆེན་བླ་ན་མེད་པར་མཛད་ནས་སྔར་ལྷག་གིས་མི་དམངས་སྲིད་གྲོས་ཀྱི་ཆབ་སྲིད་དང་བསམ་བློ།རྩ་འཛུགས་ལ་འགོ་ཁྲིད་བྱེད་ཤུགས་ཆེ་རུ་བཏང་ནས་ཀྲུང་དབྱང་ཆབ་སྲིད་ཅུས་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཀྱིས་སྲིད་གྲོས་ལས་ཀར་ཞིབ་འཇུག་ཐེངས་མང་པོ་བྱས་ཡོད།ཀྲུང་གུང་ཀྲུང་དབྱང་གིས་སྤྱི་ཚོགས་རིང་ལུགས་ཀྱི་གྲོས་མོལ་དམངས་གཙོ་འཛུགས་སྐྱོང་བྱེད་ཤུགས་ཆེ་རུ་གཏང་རྒྱུའི་བསམ་འཆར་དང་མི་དམངས་ཆབ་སྲིད་གྲོས་མོལ་དམངས་གཙོ་འཛུགས་སྐྱོང་བྱེད་ཤུགས་ཆེ་རུ་གཏང་རྒྱུའི་ལག་ལེན་བསམ་འཆར་དངོས་སུ་བཏོན་ཡོད་པ་རེད།ཀྲུང་དབྱང་གི་འཐབ་ཕྱོགས་གཅིག་གྱུར་ལས་ཀའི་གྲོས་ཚོགས་འཚོགས་ནས《ཀྲུང་གོ་གུང་ཁྲན་ཏང་གི་འཐབ་ཕྱོགས་གཅིག་གྱུར་ལས་ཀའི་སྲོལ་ཡིག（ཚོད་ལྟའི་ལག་ལེན།）》ཁྱབ་བསྒྲགས་ལག་ལེན་བྱས་ཏེ་མི་དམངས་སྲིད་གྲོས་ཀྱི་བྱ་གཞག་འཕེལ་རྒྱས་གཏོང་བར་གལ་ཆེ་བའི་བཀོད་སྒྲིག་རབ་དང་རིམ་པ་བྱས་ཡོད་པ་རེད།ཀྲུང་གུང་ཀྲུང་དབྱང་གིས་སྲ་བརྟན་གྱིས་འགོ་ཁྲིད་གནང་འོགསྲིད་གྲོས་རྒྱལ་ཡོངས་ཨུ་ཡོན་ལྷན་ཁང་དང་དེའི་རྒྱུན་ལས་ཨུ་ཡོན་ལྷན་ཁང་གིས་ཀྲུང་དབྱང་གི་གལ་ཆེ་བའི་ཐབས་ཇུས་བཀོད་སྒྲིག་ལག་ལེན་ཟབ་མོ་བྱས་པ་དང་།ཡོངས་ཁྱབ་ཏུ་མི་དམངས་སྲིད་གྲོས་ནང་ཞུགས་པའི་ཏང་ཤོག་ཚོགས་པ་སོ་སོ་དང་།མི་རིགས་དང་ལས་རིགས་སོ་སོའི་མི་སྣར་མཐུན་སྒྲིལ་བྱས་ཏེ་རྒྱལ་གཅེས་རིང་ལུགས་དང་སྤྱི་ཚོགས་རིང་ལུགས་ཀྱི་དར་ཆ་མཐོན་པོར་བསྒྲེངས་ནས་མཐུན་སྒྲིལ་དང་དམངས་གཙོའི་བརྗོད་བྱ་ཆེན་པོ་གཉིས་རྒྱུན་འཁྱོངས་བྱས་ཏེ་ཕྱོགས་ལྔ་གཞི་གཅིག་ཏུ་གྱུར་པའི་སྤྱི་ཡོངས་ཀྱི་བཀོད་སྒྲིག་བྱས་ཚུལ་དང་།ཁྱོན་ཡོངས་བཞིའི་འཐབ་ཇུས་བཀོད་སྒྲིག་བྱས་ཚུལ་ལ་དམིགས་ནས་འགན་ནུས་ལག་ལེན་ནན་ཏན་བྱས་ཏེ་ལས་ཀ་གསར་སྐྲུན་ལ་སྐུལ་འདེད་དང་།རང་ཉིད་འཛུགས་སྐྱོང་བྱེད་ཤུགས་ཆེ་རུ་བཏང་ནས་མི་དམངས་སྲིད་གྲོས་ཀྱི་བྱ་གཞག་ལ་འཕེལ་རྒྱས་གསར་པ་དང་རྣམ་པ་གསར་པ་གསར་སྐྲུན་བྱེད་པའི་གནས་ཚུལ་མངོན་འགྱུར་བྱུང་ཡོད་པ་རེད།
　　ཡུས་ཀྲེང་ཧྲེང་གིས་བསྟན་དོན།2016ལོ་ནི་ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་ཐུབ་རྒྱུའི་རྒྱལ་ཁ་ཕུ་ཐག་ཆོད་པའི་དུས་རིམ་གྱི་འགོ་ཚུགས་པའི་ལོ་ཡིན་ལ།སྒྲིག་གཞི་རང་བཞིན་གྱི་བཅོས་བསྒྱུར་ལ་སྐུལ་འདེད་གཏོང་བའི་འགག་སྒྲོལ་གྱི་ལོ་ཡང་ཡིན་པ་རེད།མི་དམངས་སྲིད་གྲོས་ལས་ཀའི་སྤྱི་ཡོངས་ཀྱི་བླང་བྱ་ནི་ཁྱོན་ཡོངས་ནས་ཀྲུང་གོ་གུང་ཁྲན་ཏང་གི་ཚོགས་ཆེན་བཅོ་བརྒྱད་པ་དང་།སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་བཞི་པ།ལྔ་པའི་སྙིང་དོན་ལག་ལེན་མཐར་ཕྱིན་བྱ་རྒྱུ་དང་།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་སྙིང་དོན་སློབ་སྦྱོང་དང་ལག་ལེན་མཐར་ཕྱིན་ཟབ་མོ་བྱ་རྒྱུ།ཀྲུང་གུང་ཀྲུང་དབྱང་གི་སྤྱི་ཚོགས་རིང་ལུགས་ཀྱི་གྲོས་མོལ་དམངས་གཙོ་འཕེལ་རྒྱས་གཏང་རྒྱུའི་སྐོར་གྱི་གལ་ཆེ་བའི་ཐབས་ཇུས་བཀོད་སྒྲིག་དོན་འཁྱོལ་མཐར་ཕྱིན་ནན་ཏན་བྱ་རྒྱུ་དང་།ཕྱོགས་ལྔ་གཞི་གཅིག་ཏུ་གྱུར་པའི་སྤྱི་ཡོངས་ཀྱི་བཀོད་སྒྲིག་བྱས་ཚུལ་དང་ཁྱོན་ཡོངས་བཞིའི་ཐབས་ཇུས་བཀོད་སྒྲིག་བྱས་ཚུལ་གྱི་བླང་བྱ་ལྟར།ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་རྒྱུན་འཁྱོངས་དང་འཕེལ་རྒྱས་གཏང་རྒྱུ་དེ་ཐུན་མོང་གི་བསམ་བློ་ཆབ་སྲིད་ཀྱི་རྨང་གཞི་སྲ་བརྟན་གཏོང་སའི་གཙོ་གནད་དུ་བཞག་སྟེ་ལོ་ལྔའི་འཆར་གཞི་བཅུ་གསུམ་པའི་འཆར་འགོད་ལ་དམིགས་ནས་ཐབས་འདོན་ཇུས་འདོན་བྱ་རྒྱུ་དེ་ལས་ཀའི་གཙོ་ཕྱོགས་བྱས་ཏེ།གནད་དོན་ཁྲིད་ཕྱོགས་དམིགས་སུ་ཐོན་པ་དང་མི་འདང་སའི་འདུ་ཤེས་ཇེ་དྲག་ཏུ་བཏང་ནས་ཤུགས་ཆེན་པོས་གྲོས་མོལ་སྲིད་གླེང་གི་ཕན་ནུས་ཇེ་དྲག་ཏུ་གཏོང་བ་དང་།ཤུགས་ཆེན་པོས་དམངས་གཙོ་ལྟ་སྐུལ་གྱི་འགན་ནུས་ཇེ་དྲག་ཏུ་གཏོང་བ།ཤུགས་ཆེན་པོས་མཐུན་སྒྲིལ་དང་མཛའ་མཐུན་གྱི་ལས་ཀ་ཡག་པོ་སྒྲུབ་པ་དང་།ཤུགས་ཆེན་པོས་བརྟག་དཔྱད་ཞིབ་འཇུག་གི་ཆུ་ཚད་མཐོ་རུ་གཏོང་བ་བཅས་བྱས་ཏེ་ལོ་ལྔའི་འཆར་གཞི་བཅུ་གསུམ་པའི་དུས་རིམ་ནང་འཕེལ་རྒྱས་གཏོང་བར་འགོ་ཡག་པོ་ཞིག་ཚུགས་པར་དགེ་མཚན་ལྡན་པའི་བྱས་རྗེས་གཞག་དགོས།
　　ཡུས་ཀྲེང་ཧྲེང་གིས་ནན་གསུང་གནང་དོན།སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཀྲུང་དབྱང་འཐབ་ཕྱོགས་གཅིག་གྱུར་ལས་ཀའི་གྲོས་ཚོགས་ཐོག་གནང་བའི་གསུང་བཤད་གལ་ཆེན་དང《ཀྲུང་གོ་གུང་ཁྲན་ཏང་གི་འཐབ་ཕྱོགས་གཅིག་གྱུར་ལས་ཀའི་སྲོལ་ཡིག（ཚོད་ལྟའི་ལག་ལེན།）》ནང་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་གཏང་རྒྱུའི་ཁྱོན་ཡོངས་ལ་དམིགས་ནས་འཐབ་ཕྱོགས་གཅིག་གྱུར་སྲ་བརྟན་དང་འཕེལ་རྒྱས་གཏང་རྒྱུའི་གནད་དོན་གལ་ཆེན་རབ་དང་རིམ་པར་དབྱེ་ཞིབ་ཟབ་མོ་དང་ཚན་རིག་དང་མཐུན་པའི་ལན་བུ་བཏབ་ཡོད་པས་འཐབ་ཕྱོགས་གཅིག་གྱུར་བྱ་གཞག་འཕེལ་རྒྱས་གཏོང་བར་ཁྲིད་སྟོན་བྱེད་སའི་རྩ་དོན་རང་བཞིན་གྱི་ཡིག་ཆ་ཞིག་ཡིན་པ་རེད།མི་དམངས་སྲིད་གྲོས་དེ་རྒྱལ་གཅེས་འཐབ་ཕྱོགས་གཅིག་གྱུར་གྱི་གྲུབ་ཆ་ཡིན་པར་བརྟེན།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་གྱི་སྙིང་དོན་སློབ་སྦྱོང་དང་ལག་ལེན་མཐར་ཕྱིན་ཟབ་མོ་བྱ་དགོས་པ་དང་།མཐུན་སྒྲིལ་དང་དམངས་གཙོའི་བརྗོད་བྱ་གཙོ་བོ་ཆེན་པོ་གཉིས་རྒྱུན་འཁྱོངས་བྱ་དགོས།ཆབ་སྲིད་གྲོས་མོལ་དང་།དམངས་གཙོ་ལྟ་སྐུལ།སྲིད་ཞུགས་སྲིད་གླེང་གི་འགན་ནུས་ལག་ལེན་ཏན་ཏིག་བྱ་དགོས།ནན་ཏན་གྱིས་འབྲེལ་བ་མཐུན་སྦྱོར་ཡག་པོ་དང་།བསམ་ཚུལ་གསལ་པོ་བྱས་ཏེ་ཐུན་མོང་གི་ངོས་འཛིན་ཆགས་པར་སྐུལ་སྤེལ།མཐུན་སྒྲིལ་ལ་ཤུགས་སྣོན་བརྒྱག་རྒྱུའི་ལས་ཀ་ཡག་པོ་བསྒྲུབས་ཏེ།ལོ་བརྒྱ་གཉིས་ཀྱི་འབད་འཐབ་དམིགས་འབེན་དང་ཀྲུང་ཧྭ་མི་རིགས་རླབས་ཆེན་བསྐྱར་དར་ཡོང་བའི་ཀྲུང་གོའི་ཕུགས་འདུན་མངོན་འགྱུར་ཡོང་བའི་སྟོབས་ལྡན་གྱི་ནུས་ཤུགས་འགྲིལ་གང་ཐུབ་བྱ་དགོས།
　　སྲིད་གྲོས་སྐབས་བཅུ་གཉིས་པའི་རྒྱལ་ཡོངས་ཨུ་ཡོན་ལྷན་ཁང་རྒྱུན་ལས་ཨུ་ཡོན་ལྷན་ཁང་གི་བཀའ་མངག་ལྟར།རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་ཁྲེན་ཞའོ་ཀོང་གིས་ཚོགས་ཆེན་ཐོག་སྲིད་གྲོས་སྐབས་བཅུ་གཉིས་པའི་གྲོས་ཚོགས་ཐེངས་གསུམ་པ་འཚོགས་ཚུན་གྱི་གྲོས་གཞི་ལས་ཀའི་གནས་ཚུལ་སྙན་སེང་ཞུས་པ་རེད།སྲིད་གྲོས་སྐབས་བཅུ་གཉིས་པའི་གྲོས་ཚོགས་ཐེངས་གསུམ་པ་འཚོགས་ཚུན་སྲིད་གྲོས་ཨུ་ཡོན་དང་།སྲིད་གྲོས་ལས་ཀར་ཞུགས་པའི་སྡེ་ཚན་ཁག་དང་ཆེད་ལས་ཀྱི་ཨུ་ཡོན་ལྷན་ཁང་སོ་སོས་ཀྲུང་གོ་གུང་ཁྲན་ཏང་གི་ཚོགས་ཆེན་བཅོ་བརྒྱད་པ་དང་།སྐབས་བཅོ་བརྒྱད་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་དང་།བཞི་པ།ལྔ་པའི་སྙིང་དོན་ནན་ཏན་གྱིས་ལག་ལེག་མཐར་ཕྱིན་བྱས་ཡོད་ཅིང་།སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་སྙིང་དོན་སློབ་སྦྱོང་དང་ལག་ལེན་མཐར་ཕྱིན་བྱས་ཡོད།ལོ་ལྔའི་འཆར་གཞི་བཅུ་གསུམ་པ་བཟོ་འགོད་བྱེད་པར་དམ་པོར་དམིགས་ཏེ་གྲོས་གཞི་བཏོན་པ་བརྒྱུད་འགན་ནུས་ཧུར་ཐག་བསྒྲུབས་ཡོད།གྲོས་གཞི་ཁྱོན་བསྡོམས6012བཏོན་པ་དང་ཞིབ་བཤེར་བྱས་པར་བརྒྱུད།གྲོས་གཞི5027ཐོ་འགོད་བྱས་ཡོད།2016ལོའི་ཟླ་བ2པའི་ཚེས20ཉིན་གྱི་བར་གྲོས་གཞི་བརྒྱ་ཆ99.5སྒྲུབ་གཉེར་བྱས་ཡོད་པ་རེད།
　　ཀྲུང་གུང་ཀྲུང་དབྱང་དང་།རྒྱལ་ཡོངས་དམངས་ཆེན།རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་སྡེ་ཚན་གྱི་འགན་འཁུར་མི་སྣ་གདན་ཞུས་ལྟར་འགོ་ཚུགས་ཚོགས་འདུར་ཞུགས་ཡོད་ཅིང་།རྒྱལ་ཁབ་ཁག་གི་ཀྲུང་གོར་བཅའ་སྡོད་བྱེད་མཁན་གཞུང་ཚབ་ཚོ་གདན་ཞུས་ལྟར་འགོ་ཚུགས་ཚོགས་འདུར་ཟུར་ཞུགས་བྱས་ཡོད།།