ཀྲུང་གོ་བོད་ཀྱི་དྲ་བའི་འཕྲིན། ཟླ1ཚེས5ཉིན་གློག་འཕྲིན་འབྱོར་གསལ།དུས་ཡུན་རིང་པོའི་ནང་རང་བྱུང་ཆ་རྐྱེན་སོགས་ཀྱིས་རྐྱེན་པས།ནག་ཆུ་ས་ཁུལ་གྱི་འབྲོག་པའི་ཆེད་ལས་མཉམ་ལས་རྩ་འཛུགས་ཀྱི་གཞི་ཁྱོན་ཆུང་བ་དང་།དཔལ་འབྱོར་ཕན་འབྲས་དམའ་བ།གཉེར་སྐྱོང་དོ་དམ་ཚད་ལྡན་མེད་པ་འཕེལ་རྒྱས་ཀྱི་རིམ་པ་དམའ་བའི་དུས་མཚམས་སུ་གནས་པ།འབྲོག་ལས་རྩ་འཛུགས་ཅན་གྱི་ཚད་གཞི་སྔར་བཞིན་དམའ་པོ་ཡོད་པས།ས་ཁུལ་དེ་གའི་འབྲོག་ལས་ཐོན་ལས་ཅན་འཕེལ་རྒྱས་ལ་འཕྲད་པའི་དཀའ་གནད་དང་འགྲན་སློང་གལ་ཆེན་ཞིག་ཏུ་གྱུར་ཡོད་པར་བརྟེན2015ལོ་ནས་བཟུང་།ནག་ཆུ་ས་ཁུལ་གྱིས་འབྲོག་པའི་ཆེད་ལས་མཉམ་ལས་རྩ་འཛུགས་སྟོབས་ཆེར་གཏོང་བའི་འདུ་འགོད་ལག་བསྟར་བྱས་ཏེ་རྒྱབ་སྐྱོར་བྱེད་ཤུགས་ཆེར་གཏོང་དང་།འཁོར་སྐྱོད་ཚད་ལྡན།མཉམ་གཉེར་འཕེལ་རྒྱས་སོགས་བྱས་ནས་འབྲོག་པའི་ཆེད་ལས་མཉམ་ལས་རྩ་འཛུགས་ཀྱི་འཕེལ་རྒྱས་ནུས་པ་ཆེ་རུ་བཏང་སྟེ་འབྲོག་པར་འབབ་འཕར་དང་འབྲོག་ལས་ལ་ཐོན་འཕར་ཡོང་རྒྱུར་ཁྲིད་སྟོན་བྱས་ཡོད་པ་རེད།
གསར་འགོད་པར་ཤེས་རྟོགས་བྱུང་བར་གཞིགས་ན།ནག་ཆུ་ས་ཁུལ་གྱི་འབྲོག་པའི་ཆེད་ལས་མཉམ་ལས་རྩ་འཛུགས་མང་ཆེ་བར་མ་དངུལ་མི་འདང་བའི་རྐྱེན་གྱིས་སྔར་བས་འཕེལ་རྒྱས་སྟོབས་ཆེར་འགྲོ་བའི་འཇུར་མིག་ཏུ་གྱུར་བར་བརྟེན་ནག་ཆུ་ས་ཁུལ་གྱིས་འབྲེལ་ཡོད་སྲིད་ཇུས་བཏོན་ནས་ཆ་རྐྱེན་འཛོམས་པའི་འབྲོག་པའི་ཆེད་ལས་མཉམ་ལས་རྩ་འཛུགས་ལ་རྒྱབ་སྐྱོར་བྱེད་ཤུགས་ཆེ་རུ་བཏང་སྟེ་སྲིད་གཞུང་གིས་རོགས་སྐྱོར་སྐུལ་འདེད་དང་།སྲིད་ཇུས་ཀྱིས་རྒྱབ་སྐྱོར་སྐུལ་ཁྲིད།ཐོན་ལས་ལས་འཆར་འགོད་སྐུལ་སྤེལ།ཞབས་ཞུར་དོ་དམ་སྐུལ་གཏོང་བཅས་བྱ་རྒྱུ་མཐའ་འཁྱོངས་བྱས་ཏེ་སྲིད་ཇུས་དང་།མ་དངུལ།ལག་རྩལ་སོགས་ལ་ཕྱོགས་ཡོངས་ནས་རྒྱབ་སྐྱོར་བྱས་པ་དང་མ་དངུལ་གྱི་རྒྱབ་སྐྱོར་བྱེད་པའི་ཕན་པ་ཐོབ་ཁྱོན་ཆེ་རུ་བཏང་བ་དང་།མ་དངུལ་གྱི་རྒྱབ་སྐྱོར་བྱེད་ཚད་འོས་འཚམ་ངང་མཐོ་རུ་བཏང་བ།ཚད་ལྡན་དང་ཡོངས་བསྒྲགས་ཀྱི་དོ་དམ་ལམ་ལུགས་བཙུགས་ནས་ནོར་སྲིད་ཀྱི་རྣམ་གྲངས་མ་དངུལ་དེ་ཆ་རྐྱེན་འཛོམས་པའི་མཉམ་ལས་རྩ་འཛུགས་ལ་ཐད་ཀར་བཏང་ཡོད།
དེ་དང་ཆབས་ཅིག་ད་ཡོད་འཕེལ་རྒྱས་ཀྱི་དུས་བབ་ལེགས་པ་དང་གཏིང་ཤུགས་ཆེ་བའི་མཉམ་ལས་རྩ་འཛུགས་ལ་གཙོ་གནད་ཐོག་རྒྱབ་སྐྱོར་བྱས་ཏེ་ལས་སྣོན་དང་ཐུམ་སྒྲིལ་ཞིབ་ཚགས་རྒྱག་པའི་ལམ་བུའི་ཐོག་བསྐྱོད་དེ་མཐོར་འདེགས་ཧུར་ཐག་བཏང་ནས་ཁེ་ལས་ཆུང་གྲས་སུ་གྱུར་པ་བྱས་པ་དང་།འབྲོག་པའི་ཆེད་ལས་མཉམ་ལས་རྩ་འཛུགས་ཀྱི་དཔེ་སྟོན་གཏོད་པའི་འདུ་འགོད་ལག་བསྟར་བྱས་ཏེ་དཔེ་སྟོན་མཉམ་ལས་རྩ་འཛུགས་ཀྱི་གཏན་འཁེལ་དོ་དམ་བྱ་ཐབས་བཟོས་པ།རྫོང་རེར་ལོ་རེར་དཔེ་སྟོན་མཉམ་ལས་རྩ་འཛུགས་གཉིས་ནས་གསུམ་བར་སྐྱེད་སྲིང་བྱས་ཏེ་ས་ཁུལ་དེ་ཡོངས་སུ་ལོ་རེར་ཁེ་སྤོགས་སྒོར་ཁྲི150ཡན་ལྡན་པའི་གཞི་ཁྱོན་ཆེ་ཙམ་དང་།སྐུལ་ཁྲིད་ནུས་པ་ཆེ་བ།ཕན་འབྲས་མངོན་གསལ་དོད་པ་བཅས་ཀྱི་འབྲོག་པའི་ཆེད་ལས་མཉམ་ལས་རྩ་འཛུགས40མང་དུ་བཏང་ནས་ཕྱུགས་ཟོག་ཐོན་རྫས40%མཉམ་ལས་རྩ་འཛུགས་བརྒྱུད་ཐོན་སྐྱེད་དང་ཕྱིར་ཚོང་བྱས་པ་རེད།
རྒྱབ་སྐྱོར་བྱེད་ཤུགས་ཆེ་རུ་གཏོང་བ་ཕུད་ནག་ཆུ་ས་ཁུལ་གྱིས་ད་དུང་འབྲོག་པའི་ཆེད་ལས་མཉམ་ལས་རྩ་འཛུགས་ལ་ཁྲིད་སྟོན་ཧུར་ཐག་བྱས་ཏེ་མཉམ་གཉེར་འཕེལ་རྒྱས་མངོན་འགྱུར་ཐུབ་པ་བྱས་ནས་རྩ་འཛུགས་ཅན་གྱི་ཚད་གཞི་སྔར་བས་མཐོ་རུ་བཏང་སྟེ་ཐུན་མོང་ཐོག་འཕེལ་རྒྱས་དང་ཐུན་མོང་ཐོག་འཕེལ་རྒྱས་འགྲོ་རྒྱུ་མངོན་འགྱུར་ཡོང་བ་བྱས་ཡོད།གནས་ཡུལ་ཉེ་བ་དང་།གཉེར་སྐྱོང་ནང་དོན་གཅིག་མཚུངས་སམ་ཡང་ན་ཕན་ཚུན་གསབ་རེས་བྱ་རུང་བའི་མཉམ་ལས་རྩ་འཛུགས་མཉམ་གཉེར་བྱ་རྒྱུར་སྐུལ་མ་བཏང་བ་བརྒྱུད།མ་དངུལ་གཏོང་སྐབས།དེ་བས་གཙོ་གནད་ལྡན་པ་དང་།ལག་རྩལ་གྱི་ཞབས་ཞུ་བྱེད་སྐབས།ཕན་ཚུན་རྒྱབ་སྐྱོར་བྱས་ནས་ཐོན་སྐྱེད་ལས་སྣོན་སྒྲིག་ཆས་ཐུན་མོང་ཐོག་ནང་འདྲེན་དང་མ་གནས་གྲོན་ཆུང་དང་འགྲན་རྩོད་ཆུང་དུ་བཏང་སྟེ་རང་ཉིད་ཀྱི་སྤུས་རྟགས་བཏོད་ནས་ཐོན་རྫས་ཀྱི་ཟུར་སྣོན་རིན་ཐང་དང་ཁྲོམ་རའི་འགྲན་རྩོད་ནུས་པ་མཐོ་རུ་བཏང་ཡོད་པ་རེད།
ནག་ཆུ་ས་ཁུལ་གྱིས་ད་དུང་མཉམ་ལས་རྩ་འཛུགས་ཀྱི་འཁོར་སྐྱོད་སྔར་བས་ཚད་ལྡན་བཟོས་པ་དང་ཆབས་ཅིག་གཉེར་སྐྱོང་ཤེས་ལྡན་པ་གསོ་སྐྱོང་བྱེད་ཤུགས་ཆེ་རུ་བཏང་ཞིང་།2015ལོ་ནས་བཟུང་ནག་ཆུ་ས་ཁུལ་གྱིས་འབྲོག་པའི་ཆེད་ལས་མཉམ་ལས་རྩ་འཛུགས་གཞི་ཁྱོན་ཆེ་རུ་གཏོང་བའི་ལས་དོན་ཕྱོགས་ཡོངས་ནས་སྤེལ་ཏེ་དོ་དམ་གྱི་ཉམས་མྱོང་དང་གཉེར་སྐྱོང་གི་ནུས་པ་མི་འདང་བའི་མཉམ་ལས་རྩ་འཛུགས་ཀྱི་འགན་འཁུར་བ་འགན་བ་བསྐྱར་འདེམས་བྱས་པ་དང་།དོ་དམ་མི་སྣའི་གསོ་སྦྱོང་ལ་ཤུགས་སྣོན་བརྒྱབ་ནས་ཞིང་འབྲོག་པར་རྩལ་ནུས་གསོ་སྐྱོང་དང་ཕྱི་ལ་སློབ་སྦྱོང་རྟོག་ཞིབ་སོགས་བྱེད་པར་ཁྲིད་དེ་ལོ་གསུམ་རེར་མཉམ་ལས་རྩ་འཛུགས་ཀྱི་དོ་དམ་མི་སྣར་རེས་སྐོར་གསོ་སྦྱོང་ཐེངས་གཅིག་བྱ་རྒྱུའི་བརྩོན་ལེན་བྱེད་ཀྱི་ཡོད། །