ཞིན་ཧྭ་གསར་འགྱུར་ཁང་པེ་ཅིན་ནས་ཉེ་ཆར་འབྱོར་བའི་གཏམ་གསར།ལོ་ལྔའི་འཆར་གཞི་བཅུ་གསུམ་པའི་གྲོས་གཞི་ལས་བསྟན་དོན།སྲིད་གཞུང་གིས་རིན་གོང་ལ་ཇུས་གཏོགས་བྱེད་ཤུགས་ཆུང་དུ་གཏོང་བ་དང་།ཁྱོན་ཡོངས་ནས་འགྲན་རྩོད་རང་བཞིན་ཁྱབ་ཁོངས་ཀྱི་ཚོང་ཟོག་དང་ཞབས་ཕྱིའི་རིན་གོང་ལྷུག་ཏུ་གཏོང་བ།གློག་ཤུགས་དང་།རྡོ་སྣུམ།རང་བྱུང་སྲོལ་རླངས།འགྲིམ་འགྲུལ་སྐྱེལ་འདྲེན།གློག་འཕྲིན་སོགས་ཁྱབ་ཁོངས་ཀྱི་འགྲན་རྩོད་རང་བཞིན་གྱི་གནད་འགག་ཐུག་སའི་རིན་གོང་ལྷུག་ཏུ་གཏང་དགོས།
　　ནི་ནིང་གི་ཟླ་བ10པའི་ཚེས15ཉིན་ཁྱབ་བསྒྲགས་བྱས་པའི《ཀྲུང་གུང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་རིན་གོང་ནང་རྐྱེན་བཅོས་བསྒྱུར་ལ་སྐུལ་འདེད་གཏང་རྒྱུའི་སྐོར་གྱི་བསམ་འཆར་དུ་མ》ལྟར།2017ལོར་རང་རྒྱལ་གྱི་འགྲན་རྩོད་རང་བཞིན་གྱི་ཁྱབ་ཁོངས་དང་གནད་འགག་ཐུག་སའི་རིན་གོང་གཞི་རྩའི་ཐོག་ལྷུག་ཏུ་གཏང་དགོས།སྲིད་གཞུང་གིས་རིན་གོང་གཏན་འཁེལ་བྱས་པའི་གཞི་ཁྱོན་དེ་གཙོ་བོར་གལ་ཆེ་བའི་གཞུང་སྤྱོད་བྱ་གཞག་དང་།སྤྱི་ཕན་རང་བཞིན་གྱི་ཞབས་ཕྱི།དྲྭ་སྦྲེལ་ཅན་གྱི་རང་བྱུང་སྒེར་སྡེམ་བྱེད་པའི་གནད་འགག་ཐུག་ས་བཅས་གཏན་འཁེལ་བྱ་དགོས།2020ལོར་ཚོང་རས་རིན་གོང་གཏན་འཁེལ་བྱས་པའི་ནང་རྐྱེན་གཞི་རྩའི་ཐོག་འཐུས་ཚང་ཡོང་བ་དང་།ཚན་རིག་དང་།ཚད་ལྡན།དྭངས་གསལ་བཅས་ཀྱི་རང་བཞིན་ལྡན་པའི་རིན་གོང་ལ་ལྟ་སྐུལ་དོ་དམ་བྱ་རྒྱུའི་ལམ་ལུགས་དང་སྒེར་སྡེམ་ལ་ངོ་རྒོལ་བྱེད་པའི་ཁྲིམས་འཛིན་མ་ལག་གཞི་རྩའི་ཐོག་འཛུགས་དགོས་ཤིང་།རིན་གོང་གི་ཚོད་འཛིན་ནང་རྐྱེན་གཞི་རྩའི་ཐོག་འཐུས་སྒོ་ཚང་དུ་གཏང་དགོས།
　　མིག་སྔའི་བར།རང་རྒྱལ་གྱི་བརྒྱ་ཆ97ཡན་ཆད་ཀྱི་ཚོང་ཟོག་དང་ཞབས་ཕྱིའི་རིན་གོང་དེ་ཚོང་རས་གཏན་འཁེལ་བྱས་ཏེ་ཆགས་ཡོད་མོད།འོན་ཀྱང་གལ་ཆེན་གྱི་ཁྱབ་ཁོངས་དང་གནད་འགག་ཐུག་སའི་རིན་གོང་གི་བཅོས་བསྒྱུར་དེ་ད་རུང་གཏིང་ཟབ་ཏུ་གཏང་དགོས།ལོ་ལྔའི་འཆར་གཞི་བཅུ་གསུམ་པའི་གྲོས་གཞི་ལས་གསལ་པོར་བསྟན་དོན།ནུས་ཁུངས་དང་།འགྲིམ་འགྲུལ་སྐྱེལ་འདྲེན།གློག་འཕྲིན་སོགས་ཁྱབ་ཁོངས་ཀྱི་འགྲན་རྩོད་རང་བཞིན་གྱི་གནད་འགག་ཐུག་སའི་རིན་གོང་ལྷུག་ཏུ་གཏང་དགོས་པར་སྤྱི་ཚོགས་ཀྱིས་རྒྱ་ཁྱབ་ཏུ་དོ་སྣང་བྱས་པ་དང་བྱེད་བཞིན་འདུག
　　རིན་གོང་གི་སྲིད་ཇུས་ནི་སྤྱི་ཁོག་ཐོག་ཚོད་འཛིན་བྱེད་པར་ཤུགས་བརྒྱབ་པ་དང་ལེགས་བཅོས་བྱེད་པའི་གལ་ཆེན་གྱི་ཐབས་ཤེས་ཡིན་པ།རིན་གོང་ཚོད་འཛིན་བྱེད་པར་ཤུགས་བརྒྱབ་པ་དང་ལེགས་བཅོས་བྱས་པར་བརྒྱུད།སྲིད་གཞུང་གི་ནུས་པ་དེ་བས་ཡག་པོས་འདོན་སྤེལ་བྱ་དགོས་ཤིང་།གཞན་ནས་རིན་གོང་བཅོས་བསྒྱུར་བྱེད་པ་དེ་མང་ཚོགས་ཀྱི་འཚོ་བ་དང་འབྲེལ་བ་དམ་ཟབ་ཡོད་པས།རིན་གོང་བཅོས་བསྒྱུར་བྱེད་པའི་རྐྱེན་གྱིས་ཡོང་འབབ་དམའ་བའི་ཚོགས་སྤྱིའི་གཞི་རྩའི་འཚོ་བར་གནོད་སྐྱེལ་མི་ཉན་བའོ།།