ཞིན་ཧྭ་གསར་འགྱུར་ཁང་ལྷ་ས་ནས་ཟླ་བ12པའི་ཚེས15ཉིན་འབྱོར་བའི་གཏམ་གསར། བོད་ལྗོངས་ཀྱི་བོད་སྨན་ཐོན་རྫས་རིན་ཐང་བསྡོམས་འབོར་སྒོར་དུང་ཕྱུར13ལས་བརྒལ་ཞིང་། བོད་སྨན་ཁེ་ལས་ཚན་པའི་གཞི་ཁྱོན་ཞིག་རིམ་བཞིན་ཆགས་ཏེ། བོད་སྨན་མ་ལག་གཞི་རྩའི་ངང་གྲུབ་པ་དང་། བོད་སྨན་འགའ་མཐོ་སྒང་ནས་ཕྱི་ཕྱོགས་སུ་བྲིན་ཞིང་ནང་ལོགས་ས་ཁུལ་གྱི་ནད་པས་བརྩི་མཐོང་བྱས་པ་རེད།

　བོད་ཀྱི་གསོ་བ་རིག་པ་ནི་མིག་སྔར་ཀྲུང་གོ་རྒྱལ་ཁབ་ཀྱི་ཆེས་ཆ་ཚང་བ་དང་ཆེས་ཤུགས་རྐྱེན་ལྡན་པའི་མི་རིགས་ཀྱི་སྨན་ཞིག་ཡིན། ཉེ་བའི་ལོ་ཤས་རིང་། བོད་ལྗོངས་ཀྱིས་བསམ་ཕྱོགས་ཆེན་མོ་དང་འཐབ་ཇུས་ཆེན་མོས་སྤྱི་ཡོངས་ནས་བོད་ཀྱི་གསོ་རིག་བྱ་གཞག་དེ་མཆོང་བརྒལ་འཕེལ་རྒྱས་གཏོང་བ་བཏོན་ཞིང་། ལྷག་པར་དུ་ཁྲོམ་རའི་ནུས་ཤུགས་ལ་བརྟེན་པ་དང་བོད་སྨན་ཐོན་ལས་ཀྱི་འཆར་འགོད་སྒྲིག་པ་དང་། བོད་སྨན་ཐོན་ལས་ཀྱི་ཆགས་ཚུལ་ལེགས་སྒྲིག་བྱེད་པ། བོད་སྨན་ཁེ་ལས་ལེགས་བསྒྱུར་རིམ་སྤར་ལ་སྣེ་ཁྲིད་ཤུགས་ཆེན་བྱེད་པ། བོད་སྨན་ཁེ་ལས་ལ་མ་དངུལ་བསྡུ་གཏོང་གི་ཁོར་ཡུག་ལེགས་སུ་གཏོང་བ་དང་བོད་སྨན་ཐོན་ལས་ཀྱི་འཕེལ་རྒྱས་ཆེན་མོ་ལ་སྐུལའདེད་བཅས་བྱས་ནས་རིམ་བཞིན་གཞི་ཁྱོན་ལྡན་པའི་བོད་སྨན་ཁེ་ལས་ཚན་པ་ཞིག་གྲུབ་པ་རེད།

　གསར་འགོད་པས་བོད་རང་སྐྱོང་ལྗོངས་འཕྲོད་བསྟེན་དང་འཆར་ལྡན་བུ་བཙའ་ཨུ་ཡོན་ལྷན་ཁང་ནས་ཤེས་རྟོགས་བྱུང་དོན། མིག་སྔར་བོད་ལྗོངས་ཁུལ་ཡོངས་ཀྱི་བོད་སྨན་ཐོན་སྐྱེད་ཁེ་ལས་བྱེད་མཁན18ཡོད་ཅིང་། ཆ་སྙོམས་རྒྱལ་ཁབGMPཡིས(སྨན་རྫས་ཐོན་སྐྱེད་ཀྱི་སྤུས་ཀའི་དོ་དམ་ཚད་གཞི)ངོས་འཛིན་བྱས་ཡོད། དེའི་ནང་ཆོས་སྒྲོན་བོད་སྨན་དང་བོད་ལྗོངས་སྨན་ལས་སོགས་བོད་སྨན་ཚོང་རར་བཏོན་པའི་སྤྱི་གཉེར་ཁང་ཚུད་པ་རེད།