ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ12པའི་ཚེས15ཉིན་འབྱོར་བའི་གཏམ་གསར། ཚོང་དོན་པུའུ་ཡིས་ཕྱི་ཕྱོགས་ལ་མ་དངུལ་གཏོང་བ་དང་དཔལ་འབྱོར་མཉམ་སྒྲུབ་སིའི་འགན་འཁུར་བས་གོང་ཚེས་ཉིན་ངོ་སྤྲོད་བྱས་དོན། ད་ལོའི་སྔོན་ཀྱི་ཟླ་བ11ལ་རང་རྒྱལ་གྱིས་དངུལ་རྩ་མིན་པའི་རིགས་ཀྱི་ཕྱི་ཕྱོགས་ལ་ཐད་ཀར་མ་དངུལ་ཨ་སྒོར་དུང་ཕྱུར1041.3བཏང་བས་ན་ལོའི་དུས་མཉམ་དང་བསྡུར་ན་བརྒྱ་ཆ16འཕར་བ་རེད།

　འགན་འཁུར་བ་དེས་བཤད་དོན། རང་རྒྱལ་གྱིས་ཕྱི་ཕྱོགས་ལ་ཐད་ཀར་མ་དངུལ་གཏོང་འཇོག་བྱེད་པ་དེ་ཧ་ལམ་རྒྱལ་དམངས་དཔལ་འབྱོར་ཀྱི་ལས་རིགས་ཚང་མ་དང་འབྲེལ་བ་ཡོད། བཟོ་སྐྲུན་ལས་རིགས་ལ་མ་དངུལ་ཨ་སྒོར་དུང་ཕྱུར118བཏང་བས་ན་ལོའི་དུས་མཉམ་དང་བསྡུར་ན་བརྒྱ་ཆ95.4འཕར་ཞིང་། སྒྲིག་ཆས་བཟོ་སྐྲུན་ལས་རིགས་ལ་མ་དངུལ་ཨ་སྒོར་དུང་ཕྱུར58.9བཏང་བས་ན་ལོའི་དུས་མཉམ་དང་བསྡུར་ན་བརྒྱ་ཆ117.3འཕར་བ་རེད།

　རང་རྒྱལ་གྱི་བཟོ་ལས་ཅན་གྱི་ཆུ་ཚད་ཉིན་བཞིན་འཛོམས་པ་དང་འཕེལ་རྒྱས་ཁྲོད་རྒྱལ་ཁབ་བཟོ་ལས་ཅན་འཕེལ་རྒྱས་མགྱོགས་སུ་ཕྱིན་པ་དང་དར་རྒྱས་ཆེ་བའི་རྒྱལ་ཁབ་ཀྱིས་བསྐྱར་དུ་བཟོ་ལས་ཅན་བསྐྲུན་པ་དང་བསྟུན་ནས་ཀྲུང་གོའི་དཔལ་འབྱོར་དང་འཛམ་གླིང་གི་རྒྱལ་ཁབ་སོ་སོའི་དཔལ་འབྱོར་མཉམ་འདྲེས་སྔར་བས་དམ་ཟབ་ཕྱིན་ཞིང་། ཀྲུང་གོའི་མ་དངུལ་དང་ལག་རྩལ། སྒྲིག་ཆས་བཅས་དེ་བས་མང་བའི་སྒོ་ནས་རྒྱལ་སྤྱིའི་ཚོང་རར་ཞུགས་པ་རེད། ཚོང་དོན་པུའུ་ཡི་གཞི་གྲངས་ལས་མཚོན་དོན། སྔོན་གྱི་ཟླ་བ11ལ་རང་རྒྱལ་གྱི་རྒྱལ་སྤྱིའི་ཐོན་ནུས་མཉམ་ལས་ཀྱི་འཕར་ཚད་ཤུགས་ཆེ་བ་དང་སྒྲིག་ཆས་ཆེ་གྲས་ཆ་ཚང་ཕྱིར་གཏོང་བྱེད་ཚད་ན་ལོའི་དུས་མཉམ་དང་བསྡུར་ན་བརྒྱ་ཆ10འཕར་ཡོད། བཟོ་སྐྲུན་ལས་རིགས་ཐད་ཕྱི་ཕྱོགས་སུ་ཐད་ཀར་མ་འཇོག་ཨ་སྒོར་དུང་ཕྱུར118བཏང་ཡོད་ཅིང་ན་ལོའི་དུས་མཉམ་དང་བསྡུར་ན་བརྒྱ་ཆ95.4འཕར་བས་དུས་མཉམ་ཕྱི་ཕྱོགས་ལ་ཐད་ཀར་མ་དངུལ་གཏོང་འཇོག་བྱེད་པའི་མ་དངུལ་སྡོམ་འབོར་གྱི་བརྒྱ་ཆ11.33ཟིན་པ་རེད།