ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གྲོས་ཚོགས་ཐེངས་ང་དྲུག་པ་དེ་ཟླ་བཅུ་གཅིག་པའི་ཚེས་གཉིས་ཉིན་གྱི་ཕྱི་དྲོར་མི་དམངས་ཚོགས་ཁང་ཆེན་མོའི་ནང་དུ་བསྡུས། ཨུ་ཡོན་ཀྲང་ཀྲང་ཏི་ཅང་གིས་གྲོས་ཚོགས་ལ་མགོ་འཛིན་མཛད།

གྲོས་ཚོགས་ནས་རྒྱལ་ཡོངས་དམངས་འཐུས་ཚོགས་ཆེན་བཅའ་ཁྲིམས་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་ཆའོ་ཞའོ་དབྱང་གིས་ཕུལ་བའི་ས་བོན་བཅའ་ཁྲིམས་བཟོ་བཅོས་ཀྱི་ཐེངས་གཉིས་པའི་གྲོས་ཞིབ་མ་ཡིག་གི་བཟོ་བཅོས་བསམ་འཆར་སྐོར་གྱི་སྙན་ཞུ་དང་། རྒྱལ་སྲིད་སྤྱི་ཁྱབ་ཁང་གིས་སྨན་རྫས་ཚོང་རར་སྤྲོད་ཆོག་པའི་མི་སྣའི་ལམ་ལུགས་ཚོད་ལྟ་དང་སྨན་རྫས་ཐོ་འགོད་དང་རིགས་བགར་བཅོས་སྒྱུར་ཚོད་ལྟའི་བྱ་བ་སྒྲུབ་པར་དབང་ཆར་གནང་བའི་སྐོར་གྱི་ཆོད་དོན་འཆར་ཟིན་གྱི་གྲོས་ཞིབ་མཇུག་འབྲས་ཀྱི་སྙན་ཞུར་ཉན།

གྲོས་ཚོགས་ནས་རྒྱལ་ཡོངས་དམངས་འཐུས་ཚོགས་ཆེན་ཕྱི་དོན་ཨུ་ཡོན་ལྷན་ཁང་གི་ཀྲུའུ་རིན་ཨུ་ཡོན་པོ་དབྱིན་གྱིས་ཕུལ་བའི་ཨེ་ཤ་ཡ་རྨང་གཞི་སྒྲིག་ཆས་དངུལ་གཏོང་དངུལ་ཁང་གི་གྲོས་མཐུན་གྲོས་ཞིབ་གནས་ཚུལ་དང་དེ་མིན་ཇུས་ཆོད་འཆར་ཟིན་འབྲི་རྩིས་ཡོད་པའི་མ་ཡིག་སྐོར་གྱི་ཡར་ཞུར་ཉན།

གྲོས་ཚོགས་ནས་རྒྱལ་ཡོངས་དམངས་འཐུས་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ཀྲང་གཞོན་པ་ཞོར་དུ་དྲུང་ཡིག་ཆེན་མོའི་འགན་ཁུར་མཁན་ཝང་ཁྲིན་གྱིས་ཕུལ་བའི་རྒྱལ་ཡོངས་དམངས་འཐུས་ཚོགས་ཆེན་ནང་སྲིད་ཁྲིམས་འཛིན་ཨུ་ཡོན་ལྷན་ཁང་དང་། ནོར་སྲིད་དཔལ་འབྱོར་ཨུ་ཡོན་ལྷན་ཁང་། ཞིང་ལས་དང་ཞིང་སྡེ་ཨུ་ཡོན་ལྷན་ཁང་བཅས་ཆེད་དོན་ཨུ་ཡོན་ལྷན་ཁང་གསུམ་གྱི་འཐུས་མིའི་གྲོས་དོན་གྲོས་ཞིབ་མཇུག་འབྲས་སྙན་ཞུར་གྲོས་ཞིབ་བྱས་པའི་གནས་ཚུལ་སྐོར་གྱི་ཡར་ཞུར་ཉན་ཞིང་། འཐུས་མི་ཁ་ཤས་ཀྱི་འཐུས་མིའི་ཐོབ་ཐང་སྙན་ཞུ་དང་བསྐོ་འཐེན་གྲོས་གཞིར་གྲོས་ཞིབ་བྱས་པའི་གནས་ཚུལ་སྐོར་གྱི་ཡར་ཞུར་ཉན།

ཨུ་ཡོན་ཀྲང་གྲོས་ཚོགས་ནས་རྒྱུན་ལས་ཨུ་ཡོན་ལྷན་ཁང་གྲོས་ཚོགས་ཀྱི་གྲོས་ཞིབ་བསམ་འཆར་ལྟར། གོང་གི་གྲོས་དོན་དང་འཆར་ཟིན་ལ་སྔར་ལས་གྲོས་ཞིབ་བཟོ་བཅོས་བྱས་རྗེས། ཨུ་ཡོན་ཀྲང་གྲོས་ཚོགས་ཐེངས་ང་བདུན་པར་སྤྲད་དེ་རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་བདུན་པ་གྲོལ་བའི་ཚོགས་ཆེན་ལ་སྤྲོད་རྒྱུ་ཡིན་མིན་ལ་བརྡས་ཐག་གཅོད་དུ་འཇུག་དགོས་པའི་རེ་བ་བཏོན།  །