ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཡོངས་ནང་ཕྱོགས་ཉོ་ཚོང་འཁོར་རྒྱུག་དེང་རབས་ཅན་དུ་བསྒྱུར་བར་སྐུལ་འདེད་གཏོང་བའི་བརྙན་འཕྲིན་ཁ་པར་གྲོས་ཚོགས་ཟླ་བཅུ་གཅིག་པའི་ཚེས་གཉིས་ཉིན་པེ་ཅིན་ནས་བསྡུས། ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་དེར་མཆན་བཀོད་མཛུབ་སྟོན་གལ་ཆེན་གནང་། མཆན་བཀོད་མཛུབ་སྟོན་ནང་བཀོད་དོན། ནང་ཕྱོགས་ཉོ་ཚོང་འཁོར་རྒྱུག་དེང་རབས་ཅན་དུ་བསྒྱུར་བར་མྱུར་དུ་སྐུལ་འདེད་གཏོང་བ་དེ་ཐོན་སྐྱེད་དང་འཛད་སྤྱོད་གཉིས་འབྲེལ་མཐུད་བྱེད་པ་དང་། རྒྱལ་ནང་གི་ཕན་ཡོད་དགོས་མཁོ་རྒྱ་བསྐྱེད་པ། མི་དམངས་ཀྱི་འཚོ་བའི་སྤུས་ཚད་མཐོར་འདེགས་སུ་གཏོང་བ་བཅས་ཐད་ལ་དོན་སྙིང་གལ་ཆེན་ལྡན་པས། ས་གནས་སོ་སོ་དང་འབྲེལ་ཡོད་ལས་ཁུངས་སོ་སོས་རྒྱལ་སྲིད་སྤྱི་ཁྱབ་ཁང་གི་འཐབ་ཇུས་དང་བཀོད་སྒྲིག་ལྟར། སྟོབས་ཤུགས་ཡོད་རྒུ་བཏོན་ནས་བཅོས་སྒྱུར་གསར་སྐྲུན་བྱེད་པ་དང་། རྒྱབ་སྐྱོར་སྲིད་ཇུས་འཐུས་ཚང་དུ་བཏང་སྟེ། རྒྱལ་ཡོངས་གཅིག་གྱུར་གྱི་ཚོང་ར་ཆེན་པོ་འཛུགས་སྐྲུན་བྱེད་པའི་བར་ཆད་སྔར་ལས་གཙང་སེལ་བྱེད་དགོས་ལ། དམངས་ཡོངས་ཀྱི་ལས་སྤེལ་གསར་སྐྲུན་ལ་སྔར་ལས་སྐུལ་འདེད་གཏོང་བ་དང་། འཁོར་རྒྱུག་ལས་རིགས་གསར་བ་འཛུགས་སྐྲུན་བྱེད་པར་སྐུལ་མ་གཏོང་དགོས་པར་མ་ཟད། ལྟ་སྐུལ་དོ་དམ་གྱི་ནུས་པ་དང་ཞབས་ཕྱིའི་ཆུ་ཚད་སྔར་ལས་ཇེ་ཆེར་གཏོང་བ་དང་། འཁོར་རྒྱུག་སྒྲིག་ལམ་ཚད་ལྡན་དུ་གཏོང་བ། ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་བསྐྲུན་ཏེ། དེང་རབས་འཁོར་རྒྱུག་ལས་རིགས་དེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ཐོན་ལག་གལ་ཆེན་ཞིག་ཏུ་བསྒྱུར་ནས། འབྱོར་འབྲིང་སྤྱི་ཚོགས་ཁྱོན་ཡོངས་ནས་འགྲུབ་པར་བྱེད་པར་བྱས་རྗེས་གསར་བ་འཇོག་དགོས་ཟེར།

ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ག་ཞོན་པ་ཝང་ཡང་གྲོས་ཚོགས་སུ་ཞུགས་པར་མ་ཟད་གཏམ་བཤད།  །