ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། གསར་འགོད་པས་རང་བྱུང་ཐོན་ཁུངས་པུའུ་ནས་རྒྱུས་ལོན་པ་ལྟར་ན། མིག་སྔའི་བར་ཞིང་ཆེན་རིམ་པ་དང་ཞིན་ཅང་ཐོན་སྐྱེད་འཛུགས་སྐྲུན་དམག་དཔུང་གི་རྒྱལ་ཁོངས་བར་སྟོང་འཆར་འགོད་ཚང་མ་བཟོས་ནས་ལེགས་འགྲུབ་བྱུང་བ་དང་འབྲེལ་རྒྱལ་སྲིད་སྤྱི་ཁྱབ་ཁང་ལ་སྙན་སེང་ཡང་ཞུས་ཡོད། ཅང་སུའུ་དང་ཀོང་ཏུང་། ཉིང་ཞ་སོགས་ཞིང་ཆེན་རིམ་པའི་འཆར་འགོད22རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་ནས་ལག་བསྟར་བྱས།

    རང་བྱུང་ཐོན་ཁུངས་པུའི་བར་སྟོང་འཆར་འགོད་ཅུའུ་ཡི་འབྲེལ་ཡོད་འགན་འཁུར་བས་ངོ་སྤྲོད་བྱས་པ་ལྟར་ན། གྲོང་ཁྱེར་དང་རྫོང་གི་རྒྱལ་ཁོངས་བར་སྟོང་གི་སྤྱིའི་འཆར་འགོད་ཚང་མ་བཟོས་ནས་དུས་ཚོད་དམ་འཛིན་གྱིས་གོ་རིམ་ལྟར་སྙན་སེང་ཞུ་བཞིན་ཡོད། དེའི་ནང་ཞིང་ཆེན་རིམ་པའི་རྒྱལ་ཁོངས་བར་སྟོང་འཆར་འགོད་ལ་ཆོག་མཆན་སྤྲད་པའི་ཞིང་ཆེན22ནང་ཅང་སུའུ་དང་ཀོང་ཏུང་། ཉིང་ཞ། ཧྲན་ཏུང་། ཧའེ་ནན། ཧྲན་ཞི། ཅང་ཞི། ཀོང་ཞི། ཧུའུ་ནན། ཧོ་པེ། ཨན་ཧུའེ་བཅས་ཞིང་ཆེན(རང་སྐྱོང་ལྗོངས)11གིས་གྲོང་ཁྱེར་རིམ་པའི་རྒྱལ་ཁོངས་བར་སྟོང་གི་སྤྱིའི་འཆར་འགོད་ཁག117ལ་ཆོག་མཆན་སྤྲད་པ་དེས་རྒྱལ་ཡོངས་ཀྱི་གྲོང་ཁྱེར་རིམ་པའི་འཆར་འགོད་བསྡོམས་འབོར་གྱི་གསུམ་ཆ་གཅིག་ཙམ་བཟུང་བ་དང་། ཅང་སུའུ་དང་ཀོང་ཏུང་། ཉིང་ཞ། ཧའེ་ནན། ཧྲན་ཏུང་། ཧོ་པེ། ཅང་ཞི་བཅས་ཞིང་ཆེན(རང་སྐྱོང་ལྗོངས)7གྱིས་རྫོང་རིམ་པའི་རྒྱལ་ཁོངས་བར་སྟོང་གི་སྤྱིའི་འཆར་འགོད236ལ་ཆོག་མཆན་སྤྲད་པ་དེས་རྒྱལ་ཡོངས་ཀྱི་རྫོང་རིམ་པའི་འཆར་འགོད་བསྡོམས་འབོར་གྱི་10%ཙམ་ཟིན་ཡོད།

    ངོ་སྤྲོད་བྱས་པ་ལྟར་ན། ས་ཁོངས་ཀྱི་རྒྱལ་ཁོངས་བར་སྟོང་འཆར་འགོད་བཟོ་བའི་ལག་བསྟར་ལ་མགྱོགས་མྱུར་ངང་སྐུལ་འདེད་གཏོང་བཞིན་ཡོད། མིག་སྔར་འབབ་རྒྱུད་རང་བཞིན་གྱི་རྒྱལ་ཁབ་རིམ་པའི་རྒྱལ་ཁོངས་བར་སྟོང་གི་ཆེད་དོན་འཆར་འགོད་ཐོག་མ་སྟེ《འབྲི་ཆུའི་དཔལ་འབྱོར་ཁུལ་སྟེ་འབྲི་ཆུའི་འབབ་རྒྱུད་ཀྱི་རྒྱལ་ཁོངས་བར་སྟོང་འཆར་འགོད(2021ལོ་ནས2035ལོ་བར)》དེ་རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་ནས་ལག་བསྟར་བྱས། པེ་ཅིན་དང་ཐེན་ཅིན། ཧོ་པེ་བཅས་དང་། ཁྲེང་ཏུའུ་དང་ཁྲུང་ཆིང་ས་ཁུལ་གྱི་གྲོང་ཁྱེར་གཉིས་ཀྱི་དཔལ་འབྱོར་ཁུལ་དང་རྨ་ཆུའི་འབབ་རྒྱུད། འབྲི་ཆུའི་ཟུར་གསུམ་གླིང་བཅས་ཀྱི་རྒྱལ་ཁོངས་བར་སྟོང་འཆར་འགོད་ཀྱང་དུས་ཚོད་དམ་འཛིན་བྱས་ཏེ་བཟོ་འགོད་དང་སྙན་ཞུ་འབུལ་བཞིན་པའི་སྒང་ཡིན།།