ཞི་ཅིན་ཕིང་གིས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཐུན་མོང་སློབ་སྦྱོང་ཐེངས་བཅུ་པར།

ཕྱི་རྒྱལ་དང་འབྲེལ་བའི་ཁྲིམས་ལུགས་འཛུགས་སྐྱོང་ལ་ཤུགས་བརྒྱབ་ནས་ཁྲིམས་སྐྱོང་གི་མཐུན་རྐྱེན་དང་ཕྱི་རོལ་གྱི་ཁོར་ཡུག་བཟང་པོ་བསྐྲུན་དགོས་ཞེས་གསུངས།

ཀྲུང་གུང་ཀྲུང་དབྱང་ཆབ་སྲིད་ཅུས་ཀྱིས་ཟླ་བ11ཚེས27ཉིན་གྱི་ཕྱི་དྲོར།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་ལུགས་འཛུགས་སྐྱོང་ལ་ཤུགས་བསྣན་རྒྱུའི་ཐད་ཐུན་མོང་སློབ་སྦྱོང་ཐེངས་བཅུ་པ་བྱས་པ་རེད།　ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སློབ་སྦྱོང་གཙོ་སྐྱོང་གནང་སྐབས།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་འཛུགས་སྐྱོང་ལ་ཤུགས་བསྣན་རྒྱུ་དེ་ནི་ཀྲུང་གོའི་ལུགས་ཀྱི་དེང་རབས་ཅན་ལ་བརྟེན་ནས་རྒྱལ་ཁབ་སྟོབས་ཆེར་གཏོང་བ་དང་མི་རིགས་བསྐྱར་དར་གྱི་བྱ་གཞག་རླབས་ཆེན་ལ་ཁྱོན་ཡོངས་ནས་སྐུལ་འདེད་གཏོང་བའི་ཕུགས་ཀྱི་དགོས་མཁོ་ཞིག་ཡིན་ལ།　ཆུ་ཚད་མཐོན་པོས་ཕྱི་ཕྱོགས་ལ་སྒོ་མོ་དབྱེ་རྒྱུར་སྐུལ་འདེད་གཏོང་བ་དང་ཕྱི་ཕྱོགས་ཀྱི་ཉེན་ཁ་དང་འགྲན་སློང་ལ་ཁ་གཏད་གཅོག་པའི་འཕྲལ་དུ་བསྒྲུབ་དགོས་པའི་ལས་འགན་ཞིག་རེད།　རྒྱལ་ནང་དང་རྒྱལ་སྤྱིའི་ཁྱོན་ཡོངས་གཉིས་ལ་གཅིག་གྱུར་འཆར་འགོད་སྔར་ལས་ལེགས་པར་བྱེད་པ་དང་།　འཕེལ་རྒྱས་དང་བདེ་འཇགས་ལ་གཅིག་གྱུར་འཆར་འགོད་སྔར་ལས་ལེགས་པར་བྱེད་པའི་མཐོ་ཚད་ཀྱི་ཐོག་ནས་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ལས་དོན་ཡག་པོ་སྒྲུབ་པའི་གལ་ཆེ་བའི་རང་བཞིན་དང་ཁ་ཚ་དགོས་གཏུག་རང་བཞིན་ལ་ངོས་འཛིན་གཏིང་ཟབ་བྱེད་པ་དང་།　སྤུས་ཚད་མཐོ་བའི་འཕེལ་རྒྱས་དང་ཆུ་ཚད་མཐོ་བའི་སྒོ་འབྱེད་ཀྱི་བླང་བྱ་དང་འཚམ་པའི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་མ་ལག་དང་ནུས་པ་འཛུགས་སྐྱོང་བྱས་ཏེ།　ཀྲུང་གོའི་ལུགས་ཀྱི་དེང་རབས་ཅན་བརྟན་ཐོག་རྒྱང་བསྐྱོད་ཐུབ་རྒྱུར་ནུས་ལྡན་གྱི་ཁྲིམས་སྐྱོང་གི་ཆ་རྐྱེན་དང་ཕྱི་ཕྱོགས་ཀྱི་ཁོར་ཡུག་གཏོད་དགོས་ཞེས་ནན་སྟོན་གནང་བ་རེད།

ཝུའུ་ཧན་སློབ་ཆེན་གྱི་དམིགས་བསལ་གདན་ཞུས་དགེ་རྒན་ཆེན་མོ་བ།　བློ་མཐུན་ཧོང་ཧུའེ་ཁང་གིས་གནད་དོན་དེའི་ཐད་འགྲེལ་བཤད་གནང་བ་དང་ལས་དོན་གྱི་གྲོས་འགོ་བཏོན་གནང་བ་རེད།　ཀྲུང་དབྱང་ཆབ་སྲིད་ཅུས་ཀྱི་བློ་མཐུན་ཚོས་འགྲེལ་བཤད་ལ་ནན་ཏན་ངང་གསན་བར་མ་ཟད་གྲོས་བསྡུར་ཡང་གནང་བ་རེད།

ཞི་ཅིན་ཕིང་གིས་འགྲེལ་བཤད་དང་གྲོས་བསྡུར་ལ་གསན་གྲུབ་རྗེས་གསུང་བཤད་གལ་ཆེན་གནང་བ་རེད།　ཁོང་གིས་བཅའ་ཁྲིམས་ནི་སྤྱི་ཚོགས་ཀྱི་འཚོ་བ་དང་རྒྱལ་ཁབ་སྐྱོང་བའི་ཚད་གཞི་ཞིག་རེད།　ཕྱི་ཕྱོགས་དང་འབྲེལ་བ་ཡོད་པའི་བཅའ་ཁྲིམས་ལམ་ལུགས་ནི་རྒྱལ་ཁབ་ཁྲིམས་ལུགས་ཀྱི་གྲུབ་ཆ་གལ་ཆེན་ཞིག་ཡིན་ལ།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་གི་རྨང་གཞི་ཞིག་ཀྱང་ཡིན་པས།　རྩ་བ་བརྟན་འཛུགས་དང་།　སྔོན་དཔག་བརྟན་པོ།　ཕུགས་ལ་ཕན་པ་བཅས་ཀྱི་ནུས་པ་གལ་ཆེན་འདོན་སྤེལ་བྱེད་བཞིན་ཡོད།　རྒྱལ་ཁབ་སྟོབས་ཆེར་གཏོང་བ་དང་མི་རིགས་བསྐྱར་དར་གྱི་ལམ་བུ་གསར་པའི་ཐོག་ངེས་པར་དུ་ཡང་དག་པའི་ཆབ་སྲིད་ཀྱི་ཁ་ཕྱོགས་མཐའ་འཁྱོངས་ཀྱིས་དེ་བས་དགེ་མཚན་ལྡན་པའི་ལོ་རྒྱུས་ཀྱི་འགན་འཁྲི་འཁུར་བ་དང་གསར་གཏོད་ཀྱི་སྙིང་སྟོབས་ལ་བརྟེན་ནས་རང་རྒྱལ་གྱི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་མ་ལག་དང་ནུས་པ་འཛུགས་སྐྱོང་ལ་སྐུལ་འདེད་མགྱོགས་པོ་གཏང་དགོས་ཞེས་བསྟན་གནང་བ་རེད།

ཞི་ཅིན་ཕིང་གིས་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་དེ་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་མ་ལག་གི་གྲུབ་ཆ་གལ་ཆེན་ཞིག་ཡིན་པས།　ཕྱོགས་ཡོངས་ནས་ཁྲིམས་ལྟར་རྒྱལ་ཁབ་སྐྱོང་བ་དང་འབྲེལ་བ་ཡོད་པ་དང་།　རང་རྒྱལ་གྱི་ཕྱི་ཕྱོགས་སྒོ་དབྱེ་དང་ཕྱི་འབྲེལ་ལས་དོན་གྱི་སྤྱི་ཡོངས་དང་འབྲེལ་བ་ཡོད།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ལས་དོན་ལ་སྐུལ་འདེད་གཏོང་བའི་རྩ་བའི་དམིགས་ཡུལ་ནི་ཁྲིམས་སྐྱོང་བྱ་ཐབས་ལ་བརྟེན་ནས་རྒྱལ་ཁབ་དང་མི་དམངས་ཀྱི་ཁེ་ཕན་སྲུང་སྐྱོང་བྱ་རྒྱུ་དང་།　རྒྱལ་སྤྱིའི་ཁྲིམས་སྐྱོང་ཡར་ཐོན་ལ་སྐུལ་འདེད་གཏང་རྒྱུ།　མིའི་རིགས་ཀྱི་ལས་དབང་གཅིག་མཐུན་མ་ལག་གཏོད་པར་སྐུལ་འདེད་གཏང་རྒྱུ་བཅས་རེད།　ངེས་པར་དུ་བློ་བརྟན་འགྱུར་མེད་ཀྱི་སྒོ་ནས་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་ཁྲིམས་སྐྱོང་ལམ་བུར་བསྐྱོད་དགོས་ཞེས་ནན་གསུང་གནང་བ་རེད།

ཞི་ཅིན་ཕིང་གིས་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ལས་དོན་ནི་ཁྱབ་རྒྱ་ཆེ་ཞིང་མཉམ་འགུལ་རང་བཞིན་ཆེ་བའི་བརྒྱུད་རིམ་ལྡན་པའི་ལས་གྲྭ་ཞིག་ཡིན་པས།　ངེས་པར་དུ་རྒྱལ་ནང་དང་རྒྱལ་སྤྱིར་གཅིག་གྱུར་གྱིས་འཆར་འགོད་བྱེད་པ་དང་།　གོང་འཕེལ་དང་བདེ་འཇགས་ལ་གཅིག་གྱུར་གྱིས་འཆར་འགོད་བྱེད་པ།　རྒྱང་ལྟའི་རང་བཞིན་གྱི་བསམ་གཞིགས་དང་།　ཁྱོན་ཡོངས་ཀྱི་རང་བཞིན་གྱི་འཆར་འགོད།　འཐབ་ཇུས་རང་བཞིན་གྱི་བཀོད་སྒྲིག།　སྤྱི་ཡོངས་རང་བཞིན་གྱི་སྐུལ་འདེད་བཅས་རྒྱུན་འཁྱོངས་པ། རྩེ་རིམ་ཇུས་འགོད་ལ་ཤུགས་བསྣན་པ་བཅས་བྱས་ཏེ།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་འཛུགས་དང་།　ཁྲིམས་བསྟར།　ཁྲིམས་འཛིན།　ཁྲིམས་སྲུང་།　བཅའ་ཁྲིམས་ཞབས་ཞུ་བཅས་ལ་སྐུལ་འདེད་གཏོང་བ་དང་།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ལས་དོན་གྱི་མཐུན་སྦྱོར་ཆེན་པོའི་རྣམ་པ་ཞིག་ཆགས་པ་བྱ་དགོས།　ཁྲིམས་འཛུགས་སྔོན་ལ་སྒྲུབ་པ་དང་།　གསར་འཛུགས་དང་།　བཟོ་བཅོས་རྒྱག་པ།　མེད་པར་བཟོ་བ།　གསལ་འགྲེལ་བྱེད་པ་བཅས་མཉམ་དུ་སྤེལ་རྒྱུ་རྒྱུན་འཁྱོངས་ནས།　རྒྱུད་ཁོངས་ཆ་ཚང་བའི་ཕྱི་ཕྱོགས་དང་འབྲེལ་བ་ཡོད་པའི་བཅའ་ཁྲིམས་དང་ཁྲིམས་སྲོལ་མ་ལག་ཆགས་པ་བྱ་དགོས།　མཐུན་སྦྱོར་ལས་ཕྱོད་མཐོ་བའི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ལག་བསྟར་མ་ལག་འཛུགས་པ་དང་།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་འཛིན་གྱི་ཕན་ནུས་ཆེ་རུ་གཏོང་བ།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་འཛིན་འདྲི་གཅོད་སྒྲིག་སྲོལ་དང་ལམ་སྲོལ་བསྒྱུར་བཅོས་ལ་སྐུལ་འདེད་གཏོང་བ།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་འཛིན་ལ་ཀུན་གྱིས་ཡིད་ཆེས་བྱེད་ཚད་ཆེ་རུ་གཏོང་བ་བཅས་བྱ་དགོས།　ཕྱི་ཕྱོགས་དང་འབྲེལ་བ་ཡོད་པའི་བཅའ་ཁྲིམས་ཀྱི་ཞབས་ཞུ་འཕེལ་རྒྱས་ཧུར་ཐག་གཏང་དགོས་པ་དང་།　རྒྱལ་སྤྱིའི་རྩེར་སོན་གྱི་ཁྲུན་གཅོད་ལས་ཁུངས་དང་ཁྲིམས་རོགས་པའི་ལས་གཉེར་ཁང་ཁག་གཅིག་གསར་འཛུགས་བྱ་དགོས།　ཁྲིམས་བསྟར་ཁྲིམས་འཛིན་གྱི་རྒྱལ་སྤྱིའི་མཉམ་ལས་ཇེ་ཆེར་བཏང་ནས་གཞུང་ཚབ་དོན་གཅོད་སྲུང་སྐྱོང་དང་གཞོགས་འདེགས་ལ་ཤུགས་བསྣན་ཏེ།　ཕྱི་རྒྱལ་དུ་ཡོད་པའི་རང་རྒྱལ་གྱི་ཁེ་ཕན་སྲུང་སྐྱོང་བྱེད་པའི་ཁྲིམས་སྐྱོང་གི་བདེ་འཇགས་སྦྲེལ་ཐག་ཅིག་འཛུགས་པ་དང་།　ཁྲིམས་དང་མཐུན་པའི་འདུ་ཤེས་ཆེ་རུ་བཏང་ནས་རང་རྒྱལ་གྱི་སྤྱི་དམངས་དང་ཁེ་ལས“ཕྱིར་བསྐྱོད་པའི”བརྒྱུད་རིམ་ནང་རང་འགུལ་ངང་ས་གནས་དེ་གའི་བཅའ་ཁྲིམས་ཁྲིམས་སྲོལ་དང་ཡུལ་སྲོལ་གོམས་གཤིས་ལ་བརྩི་སྲུང་ཞུ་རྒྱུར་ཁྲིད་སྟོན་བྱེད་པ་དང་།　ཁྲིམས་སྐྱོང་དང་སྒྲིག་སྲོལ་སྤྱད་དེ་རང་ཉིད་ཀྱི་ཁྲིམས་མཐུན་ཁེ་དབང་སྲུང་སྐྱོང་བྱ་དགོས་བསྟན་པ་རེད།

ཞི་ཅིན་ཕིང་གིས་རྒྱལ་སྤྱིའི་བཅའ་ཁྲིམས་རྨང་གཞིར་བྱས་པའི་རྒྱལ་སྤྱིའི་སྒྲིག་ལམ་ལ་བློ་བརྟན་འགྱུར་མེད་ངང་སྲུང་སྐྱོང་བྱེད་པ་དང་།　རང་འགུལ་ངང་རྒྱལ་སྤྱིའི་སྒྲིག་སྲོལ་གཏན་འབེབས་ནང་ཞུགས་ཏེ་རྒྱལ་སྤྱིའི་འབྲེལ་བ་ཁྲིམས་སྐྱོང་ཅན་དུ་སྐུལ་འདེད་གཏང་དགོས།　གོ་ལ་ཧྲིལ་པོའི་བཅོས་སྐྱོང་མ་ལག་བསྒྱུར་བཅོས་དང་འཛུགས་སྐྲུན་ནང་ཧུར་ཐག་ཞུགས་པ་དང་གོ་ལ་ཧྲིལ་པོའི་བཅོས་སྐྱོང་དེ་བས་གཞུང་དྲང་ལུགས་མཐུན་གྱི་ཕྱོགས་སུ་འཕེལ་རྒྱས་འགྲོ་རྒྱུར་སྐུལ་འདེད་གཏོང་བ།　རྒྱལ་སྤྱིའི་ཁྲིམས་བཟང་ལ་བརྟེན་ནས་གོ་ལ་ཧྲིལ་པོ་བཅོས་སྐྱོང་ལ་སྐུལ་འདེད་བཏང་ཐོག།　མིའི་རིགས་ཀྱི་ལས་དབང་གཅིག་མཐུན་མ་ལག་གཏོད་རོགས་བྱ་དགོས་ཞེས་ནན་གསུང་གནང་།

ཞི་ཅིན་ཕིང་གིས་ཁྲིམས་སྐྱོང་དེ་སྒོ་དབྱེ་དང་མཉམ་དུ་སྤེལ་བ་དང་ཕྱི་ཕྱོགས་ལ་སྒོ་མོ་འབྱེད་པར་སྐུལ་འདེད་སྔར་ལས་ལྷག་པ་གཏོང་བ།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་འཛུགས་སྐྱོང་ལ་ཤུགས་སྔར་ལས་ལྷག་པ་བསྣན་དགོས།　ཁྲིམས་སྐྱོང་གི་རྨང་གཞིའི་ཐོག་ཆུ་ཚད་མཐོ་བའི་ཕྱི་ཕྱོགས་སྒོ་དབྱེར་སྐུལ་འདེད་གཏོང་བ་རྒྱུན་འཁྱོངས་པ་དང་།　སྒོ་མོ་འབྱེད་རྒྱ་ཆེ་རུ་གཏོང་བའི་ཁྲོད་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་འཛུགས་སྐྱོང་ལ་སྐུལ་འདེད་བཏང་སྟེ་ཆུ་ཚད་མཐོ་བའི་སྒོ་དབྱེའི་ཁྲིམས་སྐྱོང་གི་རྨང་གཞི་རྒྱུན་མི་ཆད་པར་བརྟན་དུ་གཏང་དགོས།　ཁྲིམས་སྐྱོང་ནི་ཚོང་གཉེར་ཁོར་ཡུག་ཡག་ཤོས་ཤིག་ཡིན་པས།　ཕྱི་གསལ་ནང་གསལ་གྱི་ཕྱི་འབྲེལ་བཅའ་ཁྲིམས་མ་ལག་འཐུས་ཚང་དུ་གཏོང་བ་དང་།　ཤེས་བྱའི་ཐོན་དབང་སྲུང་སྐྱོང་ལ་ཤུགས་བསྣན་པ།　ཕྱི་རྒྱལ་གྱི་མ་རྩའི་ཁེ་ལས་ཀྱི་ཁྲིམས་མཐུན་ཁེ་དབང་སྲུང་སྐྱོང་བྱེད་པ།　རྒྱལ་ནང་དང་རྒྱལ་སྤྱིའི་སྒྲིག་སྲོལ་རིགས་གཉིས་བེད་སྤྱོད་ཡག་པོ་བྱེད་པ་བཅས་ཀྱི་སྒོ་ནས་ཁྲོམ་ར་ཅན་དང་།　ཁྲིམས་སྐྱོང་ཅན།　རྒྱལ་སྤྱི་ཅན་བཅས་ཀྱི་ཚོང་གཉེར་ཁོར་ཡུག་རྩེ་གྲ་གཏོད་དགོས།　རང་འགུལ་ངང་སྦྲེལ་མཐུད་དང་ཚད་གཞི་མཐོ་བའི་རྒྱལ་སྤྱིའི་དཔལ་འབྱོར་ཉོ་ཚོང་སྒྲིག་སྲོལ་བསྡུ་ལེན་ཧུར་ཐག་བྱེད་པ་དང་།　ལམ་ལུགས་རྣམ་པའི་སྒོ་དབྱེ་བརྟན་པོའི་ངང་རྒྱ་ཆེར་གཏོང་བ།　ཉོ་ཚོང་དང་མ་འཇོག་རང་མོས་ཅན་དང་སྟབས་བདེ་ཅན་གྱི་ཆུ་ཚད་མཐོ་རུ་གཏོང་བ་བཅས་བྱས་ཏེ།　ཆུ་ཚད་དེ་བས་མཐོ་བའི་སྒོ་དབྱེའི་རྣམ་པའི་དཔལ་འབྱོར་ལམ་སྲོལ་གསར་པ་འཛུགས་པ་དང་།　རྒྱལ་སྤྱིའི་སྔོན་ཐོན་ཆུ་ཚད་ལ་དཔེ་བལྟས་ཏེ་རང་མོས་ཉོ་ཚོང་ཚོད་ལྟའི་ཁུལ་སོགས་ཆུ་ཚད་མཐོ་བའི་ཕྱི་ཕྱོགས་སྒོ་དབྱེའི་བྱ་ཐབས་ནུས་ལྡན་དང་བྱང་ཆུབ་པའི་ཉམས་མྱོང་དུས་ཐོག་ཏུ་བཅའ་ཁྲིམས་སུ་བསྒྱུར་ཏེ།　སྒོ་དབྱེའི་བང་རིམ་སྔར་ལས་མཐོ་བ་དང་།　ཚོང་གཉེར་ཁོར་ཡུག་སྔར་ལས་ལེགས་པ།　ཁྱབ་འགྱེད་ནུས་པ་སྔར་ལས་ཆེ་བ་བཅས་ཀྱི་ཕྱི་ཕྱོགས་སྒོ་དབྱེའི་མཐོ་ས་གཏོད་དགོས།　སྒོ་དབྱེའི་བདེ་འཇགས་ནུས་པར་ཁྲིམས་ལྟར་སྲུང་སྐྱོང་བྱེད་ཤུགས་ཁྱོན་ཡོངས་ནས་ཆེ་རུ་གཏང་དགོས།　ཕྱི་རྒྱལ་བ་ཀྲུང་གོར་འཚོ་བ་སྐྱེལ་བའི་སྟབས་བདེའི་ཞབས་ཞུ་བྱ་ཐབས་དང་འབྲེལ་ཡོད་བཅའ་ཁྲིམས་ཁྲིམས་སྲོལ་འཐུས་ཚང་དུ་གཏང་དགོས་ཞེས་བསྟན།

ཞི་ཅིན་ཕིང་གིས་ཆེད་ལས་ཀྱི་ཤེས་ལྡན་མི་སྣ་གསོ་སྐྱོང་དང་དཔུང་ཁག་འཛུགས་སྐྱོང་ལ་ཤུགས་བསྣན་དགོས།　ཀུན་སྤྱོད་བཟང་པོར་བརྟེན་ནས་མི་གསོ་སྐྱོང་དང་།　ཀུན་སྤྱོད་དང་བཅའ་ཁྲིམས་གལ་ཆེ་མཉམ་འཛིན་བྱ་རྒྱུ་རྒྱུན་འཁྱོངས།　རིག་ཚན་འཛུགས་སྐྱོང་བྱེད་ཤུགས་ཆེ་རུ་གཏོང་བ།　ཁྲིམས་ལུགས་རིག་པའི་སློབ་གསོ་ལེགས་པར་གཉེར་བ།　ལག་ལེན་ཁྲིད་ཕྱོགས་སུ་འཛིན་པའི་གསོ་སྐྱོང་ལམ་སྲོལ་འཐུས་སྒོ་ཚང་དུ་གཏོང་བ་བཅས་བྱས་ཏེ།　ཆབ་སྲིད་ཀྱི་ལངས་ཕྱོགས་བརྟན་པ་དང་།　ཆེད་ལས་ཀྱི་བྱང་ཚད་མཐོ་བ།　རྒྱལ་སྤྱིའི་སྒྲིག་སྲོལ་ཁོང་དུ་ཆུད་པ།　ཕྱི་ཕྱོགས་དང་འབྲེལ་བ་ཡོད་པའི་བཅའ་ཁྲིམས་ཀྱི་ལས་དོན་བྱང་ཆུབ་པའི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ཤེས་ལྡན་མི་སྣ་ཁག་ཅིག་སྔ་ཙམ་ནས་གསོ་སྐྱོང་བྱ་དགོས།　ཤེས་ལྡན་མི་སྣ་ནང་འདྲེན་དང་།　གདམ་གསེས།　བཀོལ་སྤྱོད།　དོ་དམ་བཅས་ཀྱི་ལམ་སྲོལ་འཐུས་ཚང་དུ་གཏོང་བ་དང་།　ཕྱི་རྒྱལ་དང་འབྲེལ་བ་ཡོད་པའི་ཤེས་ལྡན་མི་སྣ་རྩེ་གྲ་གསོ་སྐྱོང་དང་གསོག་འཇོག་ཡག་པོ་བྱ་དགོས།　ཕྱི་ཕྱོགས་དང་འབྲེལ་བ་ཡོད་པའི་ལས་བྱེད་པའི་དཔུང་ཁག་གི་ཁྲིམས་སྐྱོང་ནུས་པ་འཛུགས་སྐྱོང་བྱེད་ཤུགས་ཆེ་རུ་བཏང་ནས།　བྱང་ཚད་མཐོ་ལ་ཆེད་ལས་ཅན་གྱི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་ལས་ཀའི་དཔུང་ཁག་ཅིག་གཏོད་དགོས།　རིམ་ཁག་མགོ་ཁྲིད་ལས་བྱེད་པས་སྣེ་ཁྲིད་དེ་བཅའ་ཁྲིམས་ལ་བརྩི་འཇོག་དང་།　བཅའ་ཁྲིམས་སློབ་སྦྱོང་།　བཅའ་ཁྲིམས་སྲུང་བ།　བཅའ་ཁྲིམས་བེད་སྤྱོད་བཅས་བྱས་ནས།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་བསམ་བློ་དང་ཁྲིམས་ལྟར་ལས་དོན་སྒྲུབ་པའི་ནུས་པ་ཆེ་རུ་ཏན་ཏིག་གཏང་དགོས་ཞེས་ནན་གསུང་གནང་བ་རེད།

ཞི་ཅིན་ཕིང་གིས་ཁྲིམས་སྐྱོང་གི་བློ་སྤོབས་བརྟན་དུ་གཏོང་བ་དང་།　ཀྲུང་གོའི་ཁྱད་ཆོས་ལྡན་པའི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་འདུ་ཤེས་དང་།　འདོད་ཚུལ་དང་ལེགས་གྲུབ་ལྡན་པའི་ལག་ལེན་ལ་གསལ་འགྲེལ་ཡག་པོ་བརྒྱབ་ནས།　དུས་རབས་གསར་པའི་ཀྲུང་གོའི་ཁྲིམས་སྐྱོང་གཏམ་རྒྱུད་ཡག་པོ་བརྗོད་དགོས།　ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་གཞུང་ལུགས་དང་ལག་ལེན་མདུན་གྲལ་གྱི་ཞིབ་འཇུག་བྱ་གཞིར་ཤུགས་བསྣན་དང་།　ཀྲུང་གོའི་ཁྱད་ཆོས་ཀྱི་རྒྱལ་ཁབ་ཕྱི་ནང་ཀུན་ཏུ་ཁྱབ་པའི་ཕྱི་ཕྱོགས་དང་འབྲེལ་བ་ཡོད་པའི་ཁྲིམས་སྐྱོང་གཞུང་ལུགས་ཀྱི་མ་ལག་དང་གཏམ་བཤད་མ་ལག་བཙུགས་ཏེ།　རང་རྒྱལ་གྱི་ཁྲིམས་སྐྱོང་རྒྱལ་ཁབ་ཆེན་པོ་དང་ཤེས་དཔལ་ལྡན་པའི་རྒྱལ་ཁབ་ཆེན་པོའི་གཟུགས་བརྙན་མངོན་པར་བྱ་དགོས།　ཀྲུང་ཧྭའི་བཅའ་ཁྲིམས་མ་ལག་ལ་ལོ་རྒྱུས་རིང་པོ་ལྡན་པ་དང་།　ཀྲུང་ཧྭའི་སྲོལ་རྒྱུན་བཅའ་ཁྲིམས་རིག་གནས་ཕུལ་བྱུང་ལ་ཁྲིམས་སྐྱོང་བསམ་བློ་ཕུན་སུམ་ཚོགས་པོ་དང་ཆབ་སྲིད་ཀྱི་བློ་གྲོས་ཆེན་མོ་ལྡན་ཡོད་པས།　ཀྲུང་ཧྭའི་རིག་གནས་ཀྱི་མཆོག་ནོར་ཞིག་རེད།　ཀྲུང་ཧྭའི་སྲོལ་རྒྱུན་བཅའ་ཁྲིམས་རིག་གནས་གསར་གཏོད་རང་བཞིན་གྱི་བརྗེ་སྒྱུར་དང་གསར་གཏོད་རང་བཞིན་གྱི་འཕེལ་རྒྱས་ལ་སྐུལ་འདེད་ཧུར་ཐག་གཏོང་བ་དང་།　ཀྲུང་ཧྭའི་ཁྲིམས་སྐྱོང་ཤེས་དཔལ་ལ་དུས་རབས་ཀྱི་ནང་དོན་གསར་པ་བསྣན་ཏེ།　དབྱར་མཚོ་རྒྱས་པ་བཞིན་འཕེལ་རྒྱས་ཡོང་བ་བྱ་དགོས་ཞེས་བསྟན་པ་རེད།།

ཀྲུང་དབྱང་བོད་སྐད་རླུང་འཕྲིན་ནས་དྲངས།