འཛད་སྤྱོད་བྱེད་ཚད་རྒྱུན་མཐུད་སླར་གསོ་དང་འཕར་བཞིན་ཡོད།

▲ ཟླ་བ་དང་པོ་ནས་བཅུ་པའི་བར་སྤྱི་ཚོགས་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་རིམ་རྩིས་བརྒྱབ་ན་སྒོར་དུང་ཕྱུར་ཁྲི38.54ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ6.9འཕར་ཡོད།

▲ ཟླ་བ་བཅུ་པར་རང་རྒྱལ་གྱི་སྤྱི་ཚོགས་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་སྒོར་དུང་ཕྱུར་ཁྲི་4.3ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ7.6འཕར་ཡོད།

གྲོང་ཁྱེར་དང་གྲོང་རྡལ་གྱི་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་སྒོར་དུང་ཕྱུར་ཁྲི3.7ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ7.4འཕར་བ་དང་། གྲོང་གསེབ་ཀྱི་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་སྒོར་དུང་ཕྱུར5854ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ8.9འཕར་ཡོད།

པེ་ཅིང་ནས་སྤྱི་ཟླ11པའི་ཚེས26ཉིན་གློག་འཕྲིན་འབྱོར་གསལ། གསར་འགོད་པས་ཉེ་ཆར་ཚོང་དོན་པུའུ་ནས་ཤེས་རྟོགས་བྱས་པ་ལྟར་ན། ཟླ་བ་བཅུ་པར་རང་རྒྱལ་གྱི་སྤྱི་ཚོགས་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་སྒོར་དུང་ཕྱུར་ཁྲི་4.3ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ7.6འཕར་ནས་འཕར་ཚད་ཟླ་དགུ་པ་དང་བསྡུར་ན་བརྒྱ་ཆའི་གྲངས2.1གིས་མགྱོགས་པ་དང་བསྟུད་མར་ཟླ་བ3འཕར་ཡོད། ཟླ་བ་དང་པོ་ནས་བཅུ་པའི་རིང་སྤྱི་ཚོགས་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་རིམ་རྩིས་བརྒྱབ་ན་སྒོར་དུང་ཕྱུར་ཁྲི38.54ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ6.9འཕར་ཡོད། ཚོང་ཟོག་འཛད་སྤྱོད་ཀྱི་འཕར་ཚད་མགྱོགས་སུ་སོང་ཞིང་། ཟླ་བ་བཅུ་པར་ཚོང་ཟོག་སིལ་ཚོང་དངུལ་འབོར་ན་ལོའི་དུས་མཚུངས་ལས་བརྒྱ་ཆ6.5འཕར་ནས་འཕར་ཚད་ཟླ་དགུ་པ་དང་བསྡུར་ན་བརྒྱ་ཆའི་གྲངས1.9ཡིས་མགྱོགས་པ་ཡོད། ཕྱི་རོལ་ལུས་སྦྱོང་དང་། གློག་རྡུལ་ཐོན་རྫས་གསར་པ། ནུས་རྒྱུ་གསར་པའི་རླངས་འཁོར། རིག་ནུས་ཁྱིམ་སྤྱོད་གློག་ཆས་སོགས་རིམ་འཕར་རིགས་ཀྱི་ཚོང་ཟོག་འཕར་སྟངས་ཅུང་ཡག་པོ་ཡོད། བཅད་གྲངས་ཡན་གྱི་ཚན་པའི་ལུས་རྩལ་དང་རོལ་རྩེད་ཀྱི་མཁོ་ཆས་དང་། འཕྲིན་གཏོང་ཡོ་བྱད། རླངས་འཁོར། ཁྱིམ་སྤྱོད་གློག་ཆས་བཅས་སིལ་ཚོང་དངུལ་འབོར་དེ་ན་ལོའི་དུས་མཚུངས་ལས་བརྒྱ་ཆ25.7དང་།14.6དང་། 11.4དང་། 9.6བཅས་སོ་སོར་འཕར་ནས་ཟླ་བ་དགུ་པ་ལས་བརྒྱ་ཆའི་གྲངས15.0དང་། 14.2 དང་། 8.6དང་། 11.9བཅས་སོ་སོར་མགྱོགས་མྱུར་འཕར་ཡོད། ནུས་རྒྱུ་གསར་པའི་རླངས་འཁོར་འཚོང་ཚད་ན་ལོའི་དུས་མཚུངས་ལས་བརྒྱ་ཆ33.5འཕར་བ་དེས་རླངས་འཁོར་གསར་པ་འཚོང་ཚད་ཀྱི་བསྡུར་ཚད་ནང་བརྒྱ་ཆ33.5བཟུང་ཡོད།

ཞབས་ཞུའི་འཛད་སྤྱོད་བྱེད་ཚད་མགྱོགས་ཙམ་འཕར་ཡོད་ཅིང་། ཟླ་བ་དང་པོ་ནས་བཅུ་པའི་བར་ཞབས་ཞུའི་སིལ་ཚོང་དངུལ་འབོར་ན་ལོའི་དུས་མཚུངས་ལས་བརྒྱ་ཆ19འཕར་ཡོད། དུས་ཆེན་གྱི་ཕན་འབྲས་སོགས་རྒྱུ་རྐྱེན་གྱི་སྐུལ་ཁྲིད་འོག་ཞག་སྡོད་བཟའ་བཏུང་དང་། རིག་གནས་ཡུལ་སྐོར། འགྲིམ་འགྲུལ་འགྲུལ་བཞུད་སོགས་ཞབས་ཞུའི་འཛད་སྤྱོད་དགོས་མཁོ་གཅིག་སྡུད་ཐོག་ཆེ་རུ་ཕྱིན་ཡོད། ཟླ་བ་བཅུ་པར་བཟའ་བཏུང་གི་ཡོང་འབབ་སྒོར་དུང་ཕྱུར4800ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ17.1འཕར་བ་དང་། གློག་བརྙན་གྱི་སྤ་སེ་བཙོངས་པའི་ཡོང་འབབ་སྒོར་དུང་ཕྱུར་36ཡན་ཟིན་པ་དེ་འཕར་ཚད་བཅུ་ཆ་བདུན་ཙམ་ཟིན་ཡོད།

དྲྭ་ཐོག་གི་སིལ་ཚོང་འཕར་ཚད་ཅུང་བཟང་ཞིང་། ཟླ་བ་དང་པོ་ནས་བཅུ་པའི་བར་དྲྭ་ཐོག་གི་སིལ་འཚོང་དངུལ་འབོར་སྒོར་དུང་ཕྱུར་ཁྲི12.3ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ11.2འཕར་བའི་ནང་ཅ་དངོས་ཚོང་ཟོག་དྲྭ་ཐོག་ནས་སིལ་ཚོང་བྱས་པའི་དངུལ་འབོར་སྒོར་དུང་ཕྱུར་ཁྲི་10.3ཟིན་པ་དེ་ན་ལོའི་དུས་མཚུངས་ལས་བརྒྱ་ཆ8.4འཕར་བ་དེས་སྤྱི་ཚོགས་ཀྱི་འཛད་སྤྱོད་དངོས་རྫས་སིལ་འཚོང་དངུལ་འབོར་གྱི་བསྡུར་ཚད་ནང་བརྒྱ་ཆ26.7བཟུང་ཡོད།

དངོས་ཚན་ཚོང་ཁང་གི་སིལ་ཚོང་རྒྱུན་མཐུད་ངང་སླར་གསོ་བྱུང་ཞིང་། ཟླ་བ་དང་པོ་ནས་བཅུ་པའི་རིང་བཅད་གྲངས་ཡན་གྱི་ཚོང་ཁང་གི་སིལ་ཚོང་དངུལ་འབོར་དེ་ན་ལོའི་དུས་མཚུངས་ལས་བརྒྱ་ཆ4.3འཕར་བ་དང་འཕར་ཚད་ཟླ་བ་དང་པོ་ནས་དགུ་པའི་བར་ལས་བརྒྱ་ཆའི་གྲངས0.3གྱིས་མགྱོགས་ཡོད། དེའི་ནང་སྟབས་བདེའི་ཚོང་ཁང་དང་། བརྒྱ་ཟོག་ཚོང་ཁང་། ཆེད་ལས་ཚོང་ཁང་། སྤུས་རྟགས་ཆེད་ཚོང་ཁང་བཅས་ཀྱི་སིལ་ཚོང་དངུལ་འབོར་དུས་མཚུངས་ལས་བརྒྱ་ཆ7.3དང་། 7.2དང་། 4.7དང་། 3.6བཅས་སོ་སོར་འཕར་ཡོད་པ་རེད།

གྲོང་ཁྱེར་དང་གྲོང་གསེབ་ཀྱི་འཛད་སྤྱོད་བརྟན་པོའི་ངང་འཕར་སྣོན་བྱུང་ཞིང་། ཟླ་བ་བཅུ་པར་གྲོང་ཁྱེར་དང་གྲོང་རྡལ་གྱི་འཛད་སྤྱོད་དངོས་རྫས་སིལ་ཚོང་དངུལ་འབོར་སྒོར་དུང་ཕྱུར་ཁྲི3.7ལ་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ7.4འཕར་བ་དང་། གྲོང་གསེབ་ཀྱི་འཛད་སྤྱོད་དངོས་ཟོག་གི་སིལ་ཚོང་དངུལ་འབོར་སྒོར་དུང་ཕྱུར5854ཟིན་པ་དེ་ན་ལོའི་དུས་མཚུངས་ལས་བརྒྱ་ཆ8.9འཕར་ཡོད། ཟླ་བ་དང་པོ་ནས་བཅུ་པའི་བར་གྲོང་ཁྱེར་དང་། གྲོང་རྡལ། གྲོང་གསེབ་བཅས་ཀྱི་འཛད་སྤྱོད་དངོས་རྫས་སིལ་ཚོང་དངུལ་འབོར་སྒོར་དུང་ཕྱུར་ཁྲི33.39དང་སྒོར་དུང་ཕྱུར་ཁྲི5.16སོ་སོར་ཟིན་པ་དེ་ན་ལོའི་དུས་མཚུངས་ལས་བརྒྱ་ཆ6.8དང་བརྒྱ་ཆ7.6སོ་སོར་འཕར་ཡོད་པ་རེད།།