རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་བཞི་ཉིན་པེ་ཅིན་ནས་བསྡུས་པའི་ཀྲུང་གོ་དང་ཨུ་རུ་སིའི་འགྲིམ་འགྲུལ་སློབ་གྲྭ་ཆེན་མོའི་སློབ་གཙོའི་གླེང་སྟེགས་སྐབས་གཉིས་པར་རྟེན་འབྲེལ་ཞུ་བའི་འཕྲིན་ཡིག་བསྐུར།

ལིས་ཁི་ཆང་གིས་རྟེན་འབྲེལ་ཞུ་བའི་འཕྲིན་ཡིག་ནང་གསུངས་རྒྱུར། དེང་སྐབས་ཀྲུང་གོ་དང་ཨུ་རུ་སིའི་ཁྱོན་ཡོངས་ཀྱི་འཐབ་ཇུས་རོགས་ལས་གྲོགས་པོའི་འབྲེལ་བ་སྔར་ལས་འཕེལ་རྒྱས་སུ་འགྲོ་བཞིན་ཡོད་པ་དང་། འགྲིམ་འགྲུལ་ཁྱབ་ཁོངས་ཀྱི་མཉམ་ལས་དེ་རྒྱལ་ཁབ་གཉིས་ཀྱིས་དངོས་གཉེར་མཉམ་ལས་བྱེད་ས་གཙོ་བོ་ཞིག་ཏུ་གྱུར་ཡོད། ཀྲུང་གོ་དང་ཨུ་རུ་སིའི་རྨང་གཞིའི་སྒྲིག་ཆས་དང་ཕན་ཚུན་མཉམ་འབྲེལ་འཛུགས་སྐྲུན་ཁྱབ་ཁོངས་ཀྱི་མཉམ་ལས་ལ་སྐུལ་འདེད་གཏོང་བ་ནི་དར་གོས་ཚོང་ལམ་གྱི་དཔལ་འབྱོར་ས་ཁུལ་འཛུགས་སྐྲུན་དང་ཡོ་རོབ་གླིང་དང་ཨེ་ཤ་ཡའི་དཔལ་འབྱོར་མནའ་འབྲེལ་འཛུགས་སྐྲུན་འབྲེལ་མཐུད་བྱེད་པའི་ནང་དོན་གཙོ་བོ་ཡིན། སྐབས་འདིའི་གླེང་སྟེགས་སྟེང་ཀྲུང་གོ་དང་ཨུ་རུ་སིའི་མྱུར་བགྲོད་ལྕགས་ལམ་མཉམ་ལས་གནད་ཆེ་སར་བཞག་པ་ནི་རྒྱལ་ཁབ་གཉིས་ཀྱི་འཐབ་ཇུས་དགོས་མཁོ་དང་མཐུན་པ་དང་དེ་ལ་དོན་སྙིང་གལ་ཆེན་ཡོད་ཟེར།

ལིས་ཁི་ཆང་གིས་འགྲིམ་འགྲུལ་ཕྱོགས་ཀྱི་མཐོ་རིམ་སློབ་གྲྭ་ཆེན་མོས་ཕན་ཚུན་ལ་སློབ་སྦྱོང་དང་དཔྱད་གཞིར་འཛིན་པ་དང་། ཤེས་ལྡན་མི་སྣ་སྐྱེད་སྲིང་དང་ཚན་རིག་ཞིབ་འཇུག སྤྱི་ཚོགས་ཞབས་ཕྱི་སོགས་ཕྱོགས་སུ་མཉམ་ལས་ཁྱབ་ཁོངས་སྔར་ལས་རྒྱ་བསྐྱེད་ཅིང་མཉམ་ལས་ཆུ་ཚད་ཇེ་མཐོར་བཏང་ནས། རྒྱལ་ཁབ་གཉིས་ཀྱི་མཉམ་ལས་ལ་སྐུལ་འདེད་གཏོང་བ་དང་དམངས་ཁྲོད་མཛའ་མཐུན་ཇེ་ཟབ་ཏུ་གཏོང་བའི་ཐད་ལ་བྱས་རྗེས་གསར་བ་འཇོག་དགོས་པའི་སྐུལ་མ་བཏང་།