ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་བཅུ་དགུ་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ཏེ། དེང་རབས་འཁོར་རྒྱུག་ལས་རིགས་འཛུགས་སྐྲུན་ཁྲིམས་སྐྱོང་ཅན་གྱི་ཚོང་གཉེར་ཁོར་ཡུག་འཕེལ་རྒྱས་སུ་བཏང་ནས། རྒྱལ་ཡོངས་གཅིག་གྱུར་ཚོང་ར་ཆེན་པོ་བཙུགས་ནས་འཛད་སྤྱོད་འཕེལ་རྒྱས་ལ་སྐུལ་འདེད་གཏོང་བར་བཀོད་སྒྲིག་བྱས་པ་དང་། གཞི་གྲངས་ཆེན་པོའི་འཕེལ་རྒྱས་ལ་སྐུལ་འདེད་གཏོང་བའི་སྐོར་གྱི་འགུལ་སྐྱོད་རྩ་གནད་ལ་གྲོས་འཆམ་བྱུང་སྟེ་ལས་སྤེལ་གསར་སྐྲུན་གསོན་ཤུགས་དང་སྤྱི་ཚོགས་བཅོས་སྐྱོང་ཆུ་ཚད་ཇེ་མཐོར་གཏོང་དགོས་ཞེས་བསྟན་པར་མ་ཟད། ཁེ་ལས་ཆུང་བའི་ཁྲལ་བསྡུའི་གཟིགས་སྐྱོང་ལ་སྔར་ལས་ཤུགས་སྣོན་རྒྱུ་ཐག་བཅད།

ཚོགས་ཐོག་ནས་བསྟན་དོན། དེང་རབས་འཁོར་རྒྱུག་ལས་རིགས་ཀྱི་རྒྱལ་དམངས་དཔལ་འབྱོར་ཐོན་ལས་ཆེན་པོ་འཕེལ་རྒྱས་སུ་བཏང་སྟེ་ཐོན་སྐྱེད་དང་འཛད་སྤྱོད་འབྲེལ་མཐུད་སྔར་ལས་བཟང་བོ་བྱས་ནས། གྲུབ་ཚུལ་ལེགས་སྒྱུར་དང་འཕེལ་རྒྱས་ཀྱི་རྣམ་པ་བསྒྱུར་བར་སྐུལ་འདེད་གཏོང་དགོས། གཅིག རྒྱལ་ཡོངས་གཅིག་གྱུར་ཚོང་ར་ཆེན་པོ་འཛུགས་སྐྲུན་བྱེད་པར་བར་ཆད་བཟོ་བའི་བཀག་རྒྱ་སྣ་ཚོགས་མེད་པར་གཏོང་དགོས། གཉིས། གློག་རྡུལ་ཚོང་དོན་སོགས་གསར་དར་འཁོར་རྒྱུག་རྣམ་པ་རྒྱ་བསྐྱེད་དགོས། གསུམ། འཁོར་རྒྱུག་མངའ་ཁོངས་ཚོང་རའི་ལྟ་རྟོག་དོ་དམ་བྱ་བ་བཟང་བོར་བསྒྲུབ་དགོས། བཞི། འཁོར་རྒྱུག་སྒྲིག་ཆས་འཛུགས་སྐྲུན་གྱི་དོ་དམ་ལམ་ལུགས་འཐུས་ཚང་དུ་གཏོང་དགོས་ཟེར།

ཚོགས་ཐོག་ནས་བསྟན་དོན། ཁེ་ལས་ཆུང་བ་ནི་ལས་ཞུགས་ཀྱི་ཐབས་ལམ་གཙོ་བོ་དང་འཕེལ་རྒྱས་ཀྱི་སྟོབས་ཤུགས་ཆེན་པོ་ཡིན་པས། ཁ་ཕྱོགས་གཏན་འཁེལ་བྱས་ཏེ་ཚོད་འཛིན་དང་སྙོམས་སྒྲིག་བྱེད་རྒྱུ་མུ་མཐུད་ནས་ལག་བསྟར་བྱེད་པ་དང་། ཁེ་ལས་ཆུང་བའི་ཁྲལ་བསྡུའི་རྒྱབ་སྐྱོར་ལ་སྔར་ལས་ཤུགས་བསྣན་ཏེ་ནོར་སྲིད་སྲིད་ཇུས་ལ་སྔར་ལས་ཤུགས་འདོན་དུ་འཇུག་པ་དང་། ལས་སྤེལ་གསར་སྐྲུན་གྱི་ཁུར་བོ་ཇེ་ཡང་དུ་གཏོང་བར་མ་ཟད་མ་འོངས་པར་ཁེ་ལས་ཆུང་བ་སྔར་ལས་འཕེལ་རྒྱས་སུ་གཏོང་དགོས་ཟེར།

ཚོགས་ཐོག་ནས་ད་དུང་དོན་དག་གཞན་དག་ལ་ཞིབ་འཇུག་བྱས།  །