ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཚེས་བཅུ་དགུ་ཉིན་གྱི་ཕྱི་དྲོར། ཐེན་ཅིན་གྲོང་ཁྱེར་སྲིད་གཞུང་གསར་འགྱུར་བྱ་བའི་གཞུང་ཁང་གིས་གནས་ཚུལ་སྒྲོག་སྤེལ་ཚོགས་འདུ་ཐེངས་བཅུ་བ་བསྡུས། རྒྱལ་ནང་གི་གསར་འགྱུར་ལས་ཁུངས་མང་པོ་དང་ལུའུ་ཐིག་གསར་འགྱུར་ཁང་སོགས་ཕྱི་རྒྱལ་གྱི་གསར་འགྱུར་ལས་ཁུངས་བརྒྱད་ཀྱི་གསར་འགོད་པ་གནས་ཚུལ་སྒྲོག་སྤེལ་ཚོགས་འདུར་ཞུགས། ཐེན་ཅིན་གྲོང་ཁྱེར་ཏང་ཨུའི་ཧྲུའུ་ཅི་ཚབ་མ། ཧྲི་ཀྲང་ཧོང་ཞིན་གོ་ཡིས་ཐེན་ཅིན་གྲུ་ཁའི་བརྒྱད་པའི་བཅུ་གཉིས་ཉིན་གྱི་འགས་གཏོར་དོན་རྐྱེན་ཚབས་ཆེན་གྱི་ཆེས་གསར་བའི་གནས་ཚུལ་ཁྱབ་སྒྲོག་བྱས། ཚེས་བཅུ་དགུ་ཉིན་གྱི་ཕྱི་དྲོའི་དུས་ཚོད་གཉིས་བར་དུ། འགས་གཏོར་དོན་རྐྱེན་ཁྲོད་མི་བརྒྱ་དང་བཅུ་བཞི་རྐྱེན་ལམ་དུ་ཤོར་བ་དང་། དེའི་ནང་གི་མི་བརྒྱ་དང་གཅིག་གི་ཐོང་ཐང་ངོས་འཛིན་བྱས་པ། མི་རེ་བཞི་གར་སོང་མི་ཤེས།

ཧོང་ཞིན་གོ་ཡིས་བཤད་རྒྱུར། འགས་གཏོར་དོན་རྐྱེན་བྱུང་རྗེས། ཐེན་ཅིན་གྱིས་ཕྱོགས་སོ་སོའི་རྒྱབ་སྐྱོར་ཆེན་པོའི་འོག སྟོབས་ཤུགས་ཡོད་རྒུ་བཏོན་ནས་རྩ་འཛུགས་དང་མགོ་ཁྲིད་ལ་ཤུགས་བསྣན་ཏེ། མེ་གསོད་རྒུད་སྐྱོབ་དང་ཡུལ་དངོས་ཐག་གཅོད་བྱ་བ་ཁྱོན་ཡོངས་ནས་བསྒྲུབས་པ་དང་། གནོད་ཐེབས་མང་ཚོགས་ལ་བཀོད་སྒྲིག་བྱས་པར་མ་ཟད། བཙོག་ཟོག་སྔོན་འགོག་དང་ཚོད་འཛིན་བྱ་བ་གཙིགས་འཛིན་བྱེད་པ་དང་། གནོད་ཐེབས་མང་ཚོགས་བཀོད་སྒྲིག་བཟང་བོ་བྱས་ནས། མི་སྣ་འཚོལ་ཞིབ་བྱེད་པའི་བྱ་བའི་ཁྲོད་ཡང་བསྐྱར་དོན་རྐྱེན་མ་བྱུང་ལ། མི་སྣ་ཤི་རྨས་ཀྱི་དོན་རྐྱེན་གསར་བ་ཡང་མ་བྱུང་ཟེར།

ཧོང་ཞིན་གོ་ཡིས་བཤད་རྒྱུར། གོ་རིམ་རྗེས་མར། མུ་མཐུད་དུ་གར་སོང་མི་ཤེས་པའི་མི་སྣ་འཚོལ་ཞིབ་བྱེད་པ་དང་། སྟོབས་ཤུགས་ཡོད་རྒུ་བཏོན་ནས་རྨས་མ་མྱུར་སྐྱོབ་བྱེད་པ། ཚན་རིག་དང་གོ་རིམ་ཡོད་པའི་སྒོ་ནས་ཡུལ་དངོས་ལ་གཙང་བཤེར་བྱེད་པ། ཁོར་ཡུག་ལྟ་ཞིབ་ཚད་ལེན་དང་ཉེན་ཁ་མེད་པར་གཏོང་བ་བཅས་བྱས་ནས། རྗེས་མཐུད་ཀྱི་བྱ་བ་སྣ་ཚོགས་བཟང་བོར་སྒྲུབ་དགོས་ཟེར།  །