ཞིན་ཧྭ་གསར་འགྱུར་ཁང་ཀུའེ་དབྱང་ནས་ཟླ་བ8པའི་ཚེས7ཉིན་འབྱོར་བའི་གཏམ་གསར། མིག་སྔར། ཀྲུང་དབྱང་སྲིད་གཞུང་གིས་ཞིང་ཆེན25(ལྗོངས་དང་གྲོང་ཁྱེར།)ལ་མ་དངུལ་རིམ་བརྩིས་དུང་ཕྱུར4056.6བཏང་ནས་རེས་སྐོར་དང་པོའི་ཞིང་བསྐྱུར་ནགས་འཛུགས་ཀྱི་ལས་གྲྭ་བཙུགས་ཏེ་ཞིང་བསྐྱུར་ནགས་འཛུགས་ཁྱོན་བསྡོམས་མུའུ་དུང་ཕྱུར1.39དང་ལེ་ལག་ཆ་ཚང་གི་རི་རྒོད་དང་ཐང་རྒོད་དུ་ནགས་འཛུགས་དང་རི་རྒྱ་ནགས་གསོ་མུའུ་དུང་ཕྱུར3.19ལེགས་གྲུབ་བྱུང་བས་འབྲེལ་ཡོད་ཀྱི་ཞིང་དུད3200དང་ཞིང་པ་དུང་ཕྱུར1.24ཡོད་པ་རེད།

 　རེས་སྐོར་དང་པོའི་ཞིང་བསྐྱུར་ནགས་འཛུགས་ཀྱི་ལས་གྲྭའི་ཁུལ་དུ་ནགས་ཚལ་ཁེབས་ཚད་ཆ་སྙོམས་བརྒྱ་ཆའི་གྲངས3འཕར་ཞིང་། ཤིང་ནགས་ཉར་ཚགས་བྱེད་ཚད་དེ་བརྒྱ་ཆ99ལ་ཟིན། ས་ཆུ་ཤོར་བ་དང་བྱེ་རླུང་གིས་གནོད་འཚེའང་མངོན་གསལ་ཇེ་ཆུང་དུ་བཏང་། ཞིང་བསྐྱུར་དུད་ཚང་གིས་གཞི་རྩའི་བཟའ་འབྲུའི་དམིགས་ཞིང་འཛུགས་སྐྱོང་དང་ནུས་ཤུགས་གཅིག་སྡུད་ཀྱིས་ལེགས་རྨོས་ཞིབ་ལས་བྱས་པར་བརྒྱུད་ནས་འབྲུ་རིགས་མུའུ་རེའི་ཐོན་ཚད་ཇེ་མཐོར་འཕར་སྟབས་ཅུང་ལེགས་པའི་སྒོ་ནས་ཟ་མའི་གནད་དོན་ཐག་གཅོད་བྱས་པ་རེད།

　རྒྱུན་མཐུད་ངང་རང་རྒྱལ་གྱི་སྐྱེ་ཁམས་དཔལ་ཡོན་འཛུགས་སྐྲུན་བྱེད་ཆེད། 2014ལོར། རྒྱལ་ཁབ་ཀྱིས་རེས་སྐོར་གསར་པའི་ཞིང་བསྐྱུར་ནགས་འཛུགས་དང་རྩྭ་གསོའི་ལས་གྲྭ་འགོ་བཙུགས། 2014ལོ་ནས2015ལོར། རྒྱལ་ཡོངས་སུ་ཞིང་བསྐྱུར་ནགས་འཛུགས་དང་རྩྭ་གསོའི་ལས་འགན་རིམ་བརྩིས་བྱས་ན་མུའུ་ཁྲི1500བཀོད་སྒྲིག་བྱས་པས་ཀྲུང་དབྱང་གིས་མ་དངུལ་རིམ་བརྩིས་བྱས་ན་དུང་ཕྱུར120བཏང་ཞིང་། དེའི་ནང་ལག་དངུལ་དུང་ཕྱུར75ཁ་གསབ་རོགས་རམ་བྱས་པ་དང་སོན་མྱུག་དང་ནགས་འཛུགས། རྩྭ་འདེབས་བཅས་བྱེད་པར་སྒོར་དུང་ཕྱུར45བཏང་བ་རེད།།