ཉེ་ཆར་རང་སྐྱོང་ལྗོངས་སྲིད་གཞུང་གཞུང་དོན་ཐིང་གིས《བོད་བྱང་ཐང་གི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་དུ་རང་བྱུང་སྲུང་སྐྱོབ་ཁུལ་དོ་དམ་སྒྲིག་སྲོལ་ལམ་སྲོལ་གྱི་སྒྱུར་བཅོས་ཚོད་ལྟའི་ལས་དོན་སྤེལ་རྒྱུའི་སྐོར་གྱི་བསམ་འཆར》པར་འགྲེམས་བྱས་པ་རེད།

　《བསམ་འཆར》ནང་བོད་བྱང་ཐང་གི་རྒྱལ་ཁབ་རིམ་པའི་རང་བྱུང་སྲུང་སྐྱོབ་ཁུལ་ནི་འཛམ་གླིང་ཡོངས་ཀྱི་ས་བབ་མཐོ་ཤོས་དང་གཞི་ཁྱོན་ཆེ་ཤོས་ཀྱི་རང་བྱུང་སྲུང་སྐྱོབ་ཁུལ་དང་། གོ་ལ་ཧྲིལ་པོའི་ས་རྒོད་སྣོད་བཅུད་མ་ལག་གི་དཔེ་མཚོན། བོད་ཀྱི་རྒྱལ་ཁབ་ཀྱི་སྣོད་བཅུད་བདེ་འཇགས་སྲུང་ཡོལ་གྱི་གྲུབ་ཆ་གལ་ཆེན་བཅས་ཡིན་ཞིང་། སྣོད་བཅུད་གནས་བབ་གལ་འགངས་ཤིན་ཏུ་ཆེ་བ་དང་། སྣོད་བཅུད་རིན་ཐང་ཤིན་ཏུ་རྩ་ཆེ་བ། སྣོད་བཅུད་ནུས་པ་ཤིན་ཏུ་ཐུན་མོང་མ་ཡིན་པ་བཅས་ཡིན། བོད་བྱང་ཐང་སྲུང་སྐྱོབ་ཁུལ་ཁྲིམས་ལྟར་སྲུང་སྐྱོབ་དང་དོ་དམ་ཡག་པོ་བྱ་རྒྱུ་དེས་ས་མཐོའི་སྐྱེ་དངོས་སྣ་མང་རང་བཞིན་ལ་སྲུང་སྐྱོབ་བྱེད་པ་དང་། གནམ་གཤིས་བརྟན་པོ་ཡོང་རྒྱུར་སྲུང་སྐྱོབ་བྱེད་པ། རྒྱལ་ཁབ་ཀྱི་ཚྭ་མེད་ཆུའི་ཐོན་ཁུངས་བདེ་འཇགས་འགན་ལེན་བྱེད་པ། བོད་ཀྱི་སྣོད་བཅུད་བཟང་པོ་འགན་ལེན་བྱེད་པ། སྣོད་བཅུད་ཤེས་དཔལ་འཛུགས་སྐྱོང་བྱེད་པ་བཅས་ཐད་དོན་སྙིང་གལ་ཆེན་ལྡན་ཡོད་ཅེས་བསྟན་པ་རེད།

　《བསམ་འཆར》ནང་བོད་བྱང་ཐང་སྲུང་སྐྱོབ་ཁུལ་དོ་དམ་སྒྲིག་སྲོལ་ལམ་སྲོལ་གྱི་སྒྱུར་བཅོས་ཚོད་ལྟའི་ལས་དོན་གྱིས་གཏོགས་ཁུལ་དོ་དམ་དང་། རིགས་གཅིག་མཁས་ཅན་དང་མང་ཚོགས་ཟུང་འབྲེལ། ལས་གྲོན་ལས་མི་གྲོན་མི་གཏོང་བ། འགན་དབང་དང་རྒྱུ་ནོར་དབང་ཆ་གཅིག་གྱུར། སྣོད་བཅུད་ཕན་འབྲས་དང་དམངས་འཚོའི་ཕན་འབྲས་གཉིས་ཁེ་བཅས་ཀྱི་རྩ་དོན་མཐའ་འཁྱོངས་བྱེད་དགོས་ཞེས་བསྟན་པ་རེད།

　《བསམ་འཆར》ནང་བོད་བྱང་ཐང་སྲུང་སྐྱོང་ཁུལ་དོ་དམ་སྒྲིག་སྲོལ་ལམ་སྲོལ་གྱི་སྒྱུར་བཅོས་ཚོད་ལྟའི་ལས་དོན་གྱི་གཙོ་གནད་ནི། གཅིག་ནས་རིམ་པ་བཞི་ལྡན་གྱི་དོ་དམ་མ་ལག་འཛུགས་པ་དང་འཐུས་ཚང་དུ་བཏང་སྟེ་བདག་སྐྱོང་སྟོབས་ཤུགས་སྔར་བས་ཆེ་རུ་གཏོང་བ་དང་རིམ་དབྱེ་བདག་སྐྱོང་གི་འགན་འཁྲི་ནན་དུ་གཏོང་དགོས་པ་དང་། གཉིས་ནས་བོད་བྱང་ཐང་སྲུང་སྐྱོབ་ཁུལ་གྱི་བགྲོད་ལམ་གལ་ཆེན་དང་ས་ཁོངས་གལ་ཆེན་དུ་ཆེད་ལས་དོ་དམ་ས་ཚིགས་འཛུགས་དགོས་པ། གསུམ་ནས་སྲིད་གཞུང་གིས་ཉོ་སྒྲུབ་ཞབས་ཞུའི་བྱ་ཐབས་བརྒྱུད་གྲངས་འབོར་དེ་མཚུངས་ཀྱི་ཆེད་ལས་བདག་སྐྱོང་མི་སྣ་འདེམས་བསྐོ་བྱས་ནས་ཆེད་ལས་བདག་སྐྱོང་རུ་ཁག་འཛུགས་དགོས་པ། བཞི་ནས་བདག་སྐྱོང་ཁྲོད་ཀྱི་ཡུལ་དེའི་གཞི་རིམ་རྩ་འཛུགས་དང་གཞི་རིམ་མང་ཚོགས་ཀྱི་ནུས་པ་འདོན་སྤེལ་གང་ལེགས་བྱས་ཏེ་སྲུང་སྐྱོང་ཁུལ་དང་སྤྱི་ཚོགས་ཀྱི་མཉམ་སྐྲུན་དང་མཉམ་དུ་དོ་དམ་གྱི་ལམ་སྲོལ་འཛུགས་པ་དང་འཐུས་ཚང་དུ་གཏོང་དགོས་པ། ལྔ་ནས་བདག་སྐྱོང་ལམ་ལུགས་འཐུས་ཚང་དུ་བཏང་སྟེ་སྲུང་སྐྱོབ་ཁུལ་ཚད་ལྡན་ཅན་དང་། ལམ་ལུགས་ཅན། ཚན་རིག་ཅན་བཅས་ཀྱི་ཆུ་ཚད་ཁྱོན་ཡོངས་ནས་མཐོ་རུ་གཏོང་དགོས་པ་བཅས་ཁ་གསལ་བཟོས་པ་རེད།