ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། ཉེ་བའི་དུས་སྐབས་ཤིག་ལ།རྒྱལ་ཡོངས་ཀྱི་ས་ཁུལ་མང་པོ་ནས་བདེ་འཇགས་ཐོན་སྐྱེད་ཀྱི་དོན་རྐྱེན་ཚབས་ཆེན་བྱུང་བ་དང་།ཁྱད་པར་དུ་བརྒྱད་པའི་བཅུ་གཉིས་ཉིན་ཐེན་ཅིན་གྲུ་ཁའི་རོས་ཧེ་ཀུང་ཟིའི་ཉེན་ཁའི་དངོས་རྫས་བཞག་པའི་མཛོད་ཁང་ཞིག་ཏུ་འགས་གཏོར་དོན་རྐྱེན་ཚབས་ཆེན་བྱུང་སྟེ།མི་སྣར་ཤི་རྨས་དང་རྒྱུ་ནོར་ལ་གྱོང་གུན་ཚབས་ཆེན་བཟོས།ཀྲུང་གུང་ཀྲུང་དབྱང་གི་སྤྱི་ཁྱབ་ཧྲུའུ་ཅི།རྒྱལ་ཁབ་ཀྱི་ཀྲུའུ་ཞི།ཀྲུང་དབྱང་དམག་དོན་ཨུ་ཡོན་ལྷན་ཁང་གི་ཀྲུའུ་ཞི་ཞི་ཅིན་ཕེན་གྱིས་བདེ་འཇགས་ཐོན་སྐྱེད་བྱ་བ་བཟང་བོར་སྒྲུབ་པར་ཧ་ཅང་མཐོང་ཆེན་གནང་སྟེ།ཟླ་བརྒྱད་པའི་ཚེས་བཅོ་ལྔ་ཉིན་ཡང་བསྐྱར་མཛུབ་སྟོན་གལ་ཆེན་གནང་།
ཞི་ཅིན་ཕེན་གྱིས་གསུངས་རྒྱུར།བདེ་འཇགས་ཐོན་སྐྱེད་ལ་དངོས་སུ་ཁག་ཐེག་བྱེད་པ་དང་།སྤྱི་ཚོགས་བདེ་འཇགས་ལ་སྲུང་སྐྱོབ་བྱེད་པ།མི་དམངས་མང་ཚོགས་ཀྱི་བདེ་སྡོད་ལས་བརྩོན་ལ་ཁག་ཐེག་བྱེད་པ་བཅས་ནི་རིམ་པ་སོ་སོའི་ཏང་ཨུ་དང་སྲིད་གཞུང་གིས་ངེས་པར་དུ་ཕྲག་ཏུ་འཁུར་དགོས་པའི་འགན་འཁྲི་གཙོ་བོ་ཞིག་ཡིན།བརྒྱད་པའི་བཅུ་གཉིས་ཉིན་གྱི་ཐེན་ཅིན་གྲུ་ཁའི་རོས་ཧེ་ཀུང་ཟིའི་ཉེན་ཁའི་དངོས་རྫས་བཞག་པའི་མཛོད་ཁང་གི་འགས་གཏོར་དོན་རྐྱེན་ཆེས་ཚབས་ཆེན་དང་།ཉེ་ལམ་ས་ཁུལ་ཁ་ཤས་སུ་སྔ་གཞུག་ཏུ་བྱུང་བའི་བདེ་འཇགས་ཐོན་སྐྱེད་དོན་རྐྱེན་ཚབས་ཆེན་ལས་བདེ་འཇགས་ཐོན་སྐྱེད་ཁྱབ་ཁོངས་སུ་གནས་པའི་གནད་དོན་འབུར་ཐོན་དང་གནས་བབ་ཚབས་ཆེན་ཡང་བསྐྱར་མངོན་པར་བྱས་ཡོད་པས།མི་སྣ་ཤ་རྨས་ཀྱི་བསླབ་བྱ་ངེས་པར་དུ་བསྡུ་ལེན་ཟབ་མོ་བྱེད་དགོས།རིམ་པ་སོ་སོའི་ཏང་ཨུ་དང་སྲིད་གཞུང་གིས་བདེ་འཇགས་འཕེལ་རྒྱས་ཀྱི་འདུ་ཤེས་ཡིད་ལ་དམ་པོར་བཅངས་པ་དང་།མི་དམངས་མང་ཚོགས་ཀྱི་ཁེ་ཕན་གཙོ་བོར་འཛིན་པ་རྒྱུན་འཁྱོངས་བྱས་ནས།དུས་དང་རྣམ་པ་ཀུན་ཏུ་བདེ་འཇགས་ཐོན་སྐྱེད་དེ་གོ་གནས་གལ་ཆེན་ཞིག་ཏུ་བཞག་སྟེ།མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་ལ་སྲུང་སྐྱོབ་བཟང་བོ་བྱེད་དགོས་ལ།ཐོན་སྐྱེད་སྡེ་ཁག་སོ་སོས་བདེ་འཇགས་ཐོན་སྐྱེད་དང་པོ་ཡིན་པའི་འདུ་ཤེས་ཇེ་ཆེར་གཏོང་བ་དང་།བདེ་འཇགས་ཐོན་སྐྱེད་ཀྱི་འགན་འཁྲི་གཙོ་བོ་དོན་ཐོག་ཏུ་འཁྱོལ་བར་བྱས་ཏེ།བདེ་འཇགས་ཐོན་སྐྱེད་ཀྱི་རྨང་གཞི་ནུས་པ་ཇེ་ཆེར་བཏང་ནས།བདེ་འཇགས་ཐོན་སྐྱེད་ཀྱི་དོན་རྐྱེན་ཚབས་ཆེན་འབྱུང་བར་རྦད་ཆོད་སྒོས་སྔོན་འགོག་བྱེད་དགོས་ཟེར།
ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་རྒྱུན་ལས་ཨུ་ཡོན།རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་བདེ་འཇགས་ཐོན་སྐྱེད་ཐད་ལ་མཆན་བཀོད་མཛུབ་སྟོན་གལ་ཆེན་གནང་སྟེ།བདེ་འཇགས་ཐོན་སྐྱེད་ནི་མི་དམངས་མང་ཚོགས་ཀྱི་ཚེ་སྲོག་དང་རྒྱུ་ནོར་གྱི་བདེ་འཇགས་དང་འབྲེལ་བ་ཡོད་ལ།དཔལ་འབྱོར་འཕེལ་རྒྱས་དང་སྤྱི་ཚོགས་བརྟན་འཇགས་ཀྱི་ཁྱོན་ཡོངས་དང་འབྲེལ་བ་ཡོད།ཉེ་ལམ།ས་ཁུལ་ཁ་ཤས་སུ་སྔ་གཞུག་ཏུ་བདེ་འཇགས་ཐོན་སྐྱེད་ཀྱི་དོན་རྐྱེན་ཚབས་ཆེན་བྱུང་བ་དང་།ཁྱད་པར་དུ་བརྒྱད་པའི་བཅུ་གཉིས་ཉིན་ཐེན་ཅིན་གྲུ་ཁའི་རོས་ཧེ་ཀུང་ཟིའི་ཉེན་ཁའི་དངོས་རྫས་བཞག་པའི་མཛོད་ཁང་ཞིག་ཏུ་འགས་གཏོར་དོན་རྐྱེན་ཆེས་ཚབས་ཆེན་བྱུང་སྟེ།མི་སྣར་ཤི་རྨས་ཚབས་ཆེན་བཟོས་པ་དང་རྒྱུ་ནོར་ལ་གྱོང་གུན་ཧ་ཅང་ཆེན་པོ་ཐེབས་པས།བསླབ་བྱ་གཏིང་ཟབ་པ་དང་ཉེན་བརྡ་ཚབས་ཆེ།ས་གནས་སོ་སོ་དང་ལས་ཁུངས་སོ་སོས་མི་དམངས་མང་ཚོགས་ཀྱི་ཚེ་སྲོག་ལ་ཧ་ཅང་འགན་འཁུར་བའི་བསམ་པ་བཅངས་ཏེ།བདེ་འཇགས་ཐོན་སྐྱེད་ཀྱི་འགན་འཁྲི་གཙོ་བོ་དངོས་འབེབ་དང་གཙིགས་འཛིན་བྱས་ནས།ཉེན་ཁ་སྣ་ཚོགས་ལ་ཁྱོན་ཡོངས་ནས་ཞིབ་བཤེར་བྱེད་དགོས་པར་མ་ཟད།ཉེན་ཁའི་དངོས་རྫས་དང་འབར་སླ་བ་དང་གས་སླ་བའི་དངོས་རྫས་སོགས་བདེ་འཇགས་ཆེད་དོན་དག་ཐེར་བྱ་བ་ཧུར་ཐག་སྒོས་བཟང་བོར་སྒྲུབ་སྟེ།ཡུན་རིང་ལ་གོ་ཆོད་པའི་ལམ་ལུགས་ཆགས་པར་བྱས་ནས།དོན་རྐྱེན་ཚབས་ཆེན་སྣ་ཚོགས་འབྱུང་བར་དངོས་སུ་དོགས་ཟོན་བྱེད་དགོས་ཞེས་བསྟན།ཟླ་བརྒྱད་པའི་ཚེས་བཅོ་ལྔ་ཉིན།རྒྱལ་སྲིད་སྤྱི་ཁྱབ་ཁང་གིས་རྒྱལ་ཡོངས་བདེ་འཇགས་ཐོན་སྐྱེད་ཀྱི་བརྙན་འཕྲིན་ཁ་པར་གྲོས་ཚོགས་བསྡུས་ནས།ཞི་ཅིན་ཕེན་དང་ལིས་ཁི་ཆང་རྣམ་གཉིས་ཀྱི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་བརྒྱུད་སྒྲོག་དང་ལག་ལེན་མཐར་ཕྱིན་བྱས་པ་དང་།རྒྱལ་ཡོངས་སུ་བདེ་འཇགས་ཐོན་སྐྱེད་ལ་ཞིབ་བཤེར་ཆེན་པོ་བྱས་ནས།ཁྲིམས་འགལ་ལུགས་འགལ་དང་ཆེད་དོན་དག་ཐེར་བཅོས་སྐྱོང་བྱ་བ་སྔར་ལས་བཟང་བོར་སྒྲུབ་པར་བཀོད་སྒྲིག་བྱས།　ཀྲུང་གུང་ཀྲུང་དབྱང་ཆབ་སྲིད་ཅུའུ་ཡི་ཨུ་ཡོན།རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ།རྒྱལ་སྲིད་སྤྱི་ཁྱབ་ཁང་བདེ་འཇགས་བྱ་བའི་ཨུ་ཡོན་ལྷན་ཁང་གི་ཀྲུའུ་རིན་མཱ་ཁེ་ཡིས་ཚོགས་ཐོག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕེན་དང་ཙུང་ལི་ལིས་ཁི་ཆང་གི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལས་བདེ་འཇགས་ཐོན་སྐྱེད་བྱ་བའི་ཧ་ཅང་གལ་ཆེན་རང་བཞིན་རྒྱས་བཤད་ཟབ་མོ་བྱས་པ་དང་།བདེ་འཇགས་ཐོན་སྐྱེད་ཐད་ལ་རེ་བ་སྔར་ལས་གསལ་བོ་བཏོན་པས།དེང་སྐབས་དང་ཕྱིན་ཆད་ཀྱི་བྱ་བ་བཟང་བོར་སྒྲུབ་པར་མཛུབ་སྟོན་གྱི་དོན་སྙིང་གལ་ཆེན་ལྡན་ལ།ས་གནས་སོ་སོ་དང་ལས་ཁུངས་སོ་སོས་དོན་རྐྱེན་ཚབས་ཆེན་གྱི་བསླབ་བྱ་བསྡུ་ལེན་ཟབ་མོ་བྱས་ནས།བདེ་འཇགས་ཐོན་སྐྱེད་བྱ་བར་དངོས་སུ་གཙིགས་འཛིན་བྱེད་དགོས་ཞེས་ནན་གྱིས་བསྟན།རྒྱལ་སྲིད་ཨུ་ཡོན།རྒྱལ་སྲིད་སྤྱི་ཁྱབ་ཁང་བདེ་འཇགས་བྱ་བའི་ཨུ་ཡོན་ལྷན་ཁང་གི་ཀྲུའུ་རིན་གཞོན་པ་ཝང་ཡུང་གིས་གྲོས་ཚོགས་ལ་མགོ་འཛིན་བྱས།ཀྲུང་དབྱང་འབྲེལ་ཡོད་ལས་ཁུངས་དང་ཀྲུང་དབྱང་ཁེ་ལས་ཁ་ཤས་ཀྱི་འགན་ཁུར་བློ་མཐུན་གྲོས་ཚོགས་སུ་ཞུགས།ཞིང་ལྗོངས་དང་གྲོང་ཁྱེར་སོ་སོ་དང་འབྲེལ་ཡོད་ལས་ཁུངས་ཀྱི་འགན་ཁུར་བློ་མཐུན་ཡན་ལག་ཚོགས་རའི་གྲོས་ཚོགས་སུ་ཞུགས།བདེ་འཇགས་ལྟ་སྐུལ་དོ་དམ་སྤྱི་ཁྱབ་ཅུའུ་ཡི་འགན་ཁུར་བློ་མཐུན་གྱིས་འབྲེལ་ཡོད་གནས་ཚུལ་ཡར་ཞུ་བྱས།  །