སྤྱི་ཟླ10པའི་ཚེས13ཉིན་གྱི་ཆུ་ཚོད15དང་སྐར་མ10ལ། ཀྲུང་གོ་གུང་ཁྲན་ཏང་རྒྱལ་ཡོངས་འཐུས་མི་ཚོགས་ཆེན་དུ་ཞུགས་མཁན་སི་ཁྲོན་ཞིང་ཆེན་འཐུས་མི་ཚོགས་པའི་འཐུས་མི་ཚོ་པེ་ཅིང་རྒྱལ་སྤྱིའི་གནམ་ཐང་དུ་སླེབས།

     ཏང་གི་ཚོགས་ཆེན་ཉི་ཤུ་པ་ནི་ཏང་ཡོངས་དང་རྒྱལ་ཡོངས་མི་རིགས་ཁག་གི་མི་དམངས་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་སྐྲུན་པའི་རྒྱང་སྐྱོད་གསར་པར་སྐྱོད་པ་དང་ལོ་བརྒྱ་གཉིས་པའི་འབད་འཐབ་དམིགས་འབེན་དུ་སྐྱོད་པའི་གནད་འགག་གི་དུས་སུ་འཚོག་པའི་ཚོགས་ཆེན་ཧ་ཅང་གལ་ཆེན་ཞིག་ཡིན་ཞིང་། སི་ཁྲོན་ཞིང་ཆེན་འཐུས་མི་ཚོགས་པའི་ཏང་གི་འཐུས་མི72ནི་ལས་རིགས་ཁག་དང་ཁྱབ་ཁོངས་ཁག། འཐབ་ཕྱོགས་ཁག་ནས་བྱུང་བའི་འཐུས་མི་ཕུལ་བྱུང་བ་ཤ་སྟག་ཡིན།

     གནམ་གྲུའི་ཐོག་ཀྲུང་གོ་སྦྲག་སྲིད་ཚོགས་པ་ཚད་ཡོད་འགན་འཁྲི་སྤྱི་གཉེར་ཁང་སི་ཁྲོན་ཞིང་ཆེན་དཀར་མཛེས་རྫོང་ཡན་ལག་སྤྱི་གཉེར་ཁང་སྦྲག་སྐྱེལ་ཁ་ལོ་བའི་ཚོ་ཆུང་གི་ཚོ་དཔོན་འཆི་མེད་རྡོ་རྗེས་མི་སེར་ཚོས་ང་ཚོའི་གངས་ལྗོངས་སྦྲག་ལམ་གྱིས་ཡུལ་སྡེ་ཁྲི་སྟོང་མང་པོ་སྦྲེལ་ཡོད་ལ་གངས་རི་དང་པེ་ཅིང་གི་གསེར་རི་ཡང་སྦྲེལ་ཡོད་ཅེས་བཤད་དང་འཆད་བཞིན་ཡོད། པེ་ཅིང་དུ་ཐེངས་མང་སོང་མྱོང་མོད། འོན་ཀྱང་ཐེངས་འདིར་པེ་ཅིང་དུ་འགྲོ་བའི་དོན་སྙིང་ལྷག་པར་ཆེ་ཞིང་འགན་འཁྲི་ལྷག་པར་ལྕི་ཞེས་བཤད་པ་རེད།

     ཐེངས་འདིར་མི་འདྲ་ས་དང་ཁྱད་པར་བ་གང་ཞིག་ཡིན་མིན་ནི་འཆི་མེད་རྡོ་རྗེ་དང་འཐུས་མི་ཚོས་དྲིས་ལན་འདི་ལྟར་བཏབ་པ་སྟེ། འབྱུང་འགྱུར་ལོ5དང་ཐ་ན་དུས་ཡུན་དེ་བས་རིང་བའི་ཏང་དང་རྒྱལ་ཁབ་ཀྱི་བྱ་གཞག་འཕེལ་རྒྱས་ཀྱི་དམིགས་འབེན་ལས་འགན་དང་སྲིད་ཆེན་བྱེད་ཕྱོགས་འཆར་འགོད་ཚན་རིག་དང་མཐུན་པ་བྱ་དགོས་པས། ཏང་དང་རྒྱལ་ཁབ་ཀྱི་བྱ་གཞག་སྔར་འཛིན་ཕྱིར་གཏོད་དང་འབྲེལ་བ་ཡོད་ཅིང་། ཀྲུང་གོ་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་མདུན་ལམ་ལས་དབང་དང་འབྲེལ་བ་ཡོད་ལ། ཀྲུང་ཧྭ་མི་རིགས་བསྐྱར་དར་རླབས་པོ་ཡོང་བ་དང་འབྲེལ་བ་ཡོད་པ་ཡིན་ཞེས་པ་དེ་རེད།

     འཐུས་མི་ཚོས་རང་གི་ཕྲག་ཐོག་ལ་ཏང་མི་ས་ཡ་ལྔ་དང་འབུམ་གཅིག་ལྷག་དང་ཞིང་ཆེན་ཡོངས་ཀྱི་མི་རིགས་ཁག་གི་མི་དམངས་བྱེ་བ་དགུ་དང་ས་ཡ་བརྒྱ་ལྷག་གི་མངགས་བཅོལ་དང་ཡིད་ཆེས་འཁུར་བཞིན་ཡོད་པ་ཤེས་ཡོད། ཁོ་ཚོས“གཏན་འཁེལ་གཉིས”ཀྱི་ཐག་གཅོད་རང་བཞིན་གྱི་དོན་སྙིང་ཁོང་དུ་ཟབ་མོ་ཆུད་པ་དང་། “འདུ་ཤེས་བཞི”ཇེ་དྲག་ཏུ་གཏོང་བ། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”བྱེད་ཐུབ་པ་བཅས་བྱས་ཏེ། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་སྐོར་དུ་མཐུན་སྒྲིལ་དེ་བས་དམ་ཟབ་བྱེད་ཅིང་། ཆབ་སྲིད་ཀྱི་ཚུགས་གནས་སྤར་བ་དང་། སེམས་སུ་རྒྱལ་ཁབ་ཀྱི་དོན་ཆེན་དང་ཇུས་ཆེན་འཆང་ཞིང་། ཆབ་སྲིད་ཀྱི་བརྡ་གཅོད་ནུས་པ་དང་གོ་རྟོགས་ནུས་པ། ལག་བསྟར་ནུས་པ་བཅས་ཆེ་རུ་གཏོང་བ་དང་། གྲོས་རིམ་ཁག་ཏུ་ནན་ཏིག་གིས་ཞུགས་ཤིང་འཐུས་མིའི་དབང་ཆ་བེད་སྤྱོད་ཡག་པོ་བྱས་ཏེ། ཚོགས་ཆེན་གྱི་ལས་འགན་ཁག་ཕུན་སུམ་ཚོགས་པའི་ངང་བསྒྲུབས་ནས་ཏང་ཀྲུང་དབྱང་གི་རེ་སྒུག་དང་ཞིང་ཆེན་ཡོངས་ཀྱི་མི་དམངས་ཀྱི་རེ་སྒུག་ཆུད་ཟོས་སུ་གཏང་རྒྱུ་མིན་ཞེས་བཤད་པ་རེད།།