ཀྲུང་གོ་བོད་ཀྱི་དྲ་བའི་འཕྲིན། ཟླ8པའི་ཚེས11ཉིན་སློབ་དུས་གསར་པ་འགོ་ཚུགས་པས། རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་ལྗོངས་སློབ་གསོ་ལས་དོན་ཨུ་ཡོན་ལྷན་ཁང་གི་ཧྲུའུ་ཅི་ཧྥང་ལིང་མིན་གྱིས་རུ་ཁྲིད་དེ་ལྷ་ས་གྲོང་ཁྱེར་སློབ་གསོ་གྲོང་དུ་ཕེབས་ནས་སྟོན་དུས་སློབ་འགོ་ཚུགས་པའི་ལས་དོན་ལ་ཞིབ་བཤེར་གནང་བ་རེད།
བརྟག་དཔྱད་ཚོགས་ཆུང་གིས་ད་ལོ་ལྗོངས་ཡོངས་ལ་དོན་ཆེན་མང་བ་དང་བཀྲ་ཤིས་པའི་དོན་མང་བས་རིམ་པ་ཁག་དང་རིགས་ཁག་གི་སློབ་གྲྭས་རང་སྐྱོང་ལྗོངས་ཏང་ཨུད་དང་སྲིད་གཞུང་གི་ཐབས་ཇུས་བཀོད་སྒྲིག་ལྟར་སློབ་གསོའི་ཁོངས་གཏོགས་ཀྱི་ཞི་མཐུན་བརྟན་ལྷིང་སྲུང་སྐྱོང་བྱ་རྒྱུ་དེ་ཐོག་མཐའ་བར་གསུམ་དུ་ཆབ་སྲིད་ཀྱི་ལས་འགན་ཨང་དང་པོར་བརྩིས་ནས་དོ་དམ་ལ་དམ་འཛིན་བྱེད་པ་དང་། སྒྱུར་བཅོས་ལ་སྐུལ་འདེད་གཏོང་བ། སྤུས་ཚད་མཐོ་རུ་གཏོང་བ་བཅས་ལ་ཤུགས་སྣོན་ཏན་ཏིག་བརྒྱབ་སྟེ་སློབ་གྲྭའི་རྒྱུན་གཏན་གྱི་སློབ་ཁྲིད་སྒྲིག་ལམ་ལ་འགན་ལེན་བྱས་ནས་ཞི་མཐུན་བརྟན་ལྷིང་གི་སློབ་གྲྭའི་རྣམ་པ་ཧུར་ཐག་གཏོད་དགོས། ལྗོངས་ཡོངས་ཀྱི་སློབ་གསོའི་ཁོངས་གཏོགས་ཀྱིས་ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་ཟླ7པའི་ཚེས30ཉིན་གྱི་ཚོགས་འདུའི་དགོངས་དོན་ལག་བསྟར་དོན་འཁྱོལ་བྱས་ནས་མེས་རྒྱལ་གཅིག་གྱུར་ལ་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་པའི་རྨང་གཞི་བརྟན་དུ་གཏོང་བ་དང་། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་བསམ་བློའི་རྨང་གཞི་བརྟན་དུ་གཏོང་བ། སློབ་མ་སྐྱོན་བྲལ་ངང་འཚར་ལོངས་དང་སློབ་གསོའི་ཞི་མཐུན་ཡར་རྒྱས་ཀྱི་རྨང་གཞི་བརྟན་དུ་གཏོང་བ་བཅས་བྱས་ཏེ་མཐུན་སྒྲིལ་རྡོག་རྩ་གཅིག་སྒྲིལ་དང་དངོས་འཛིན་དངོས་སྒྲུབ་ཀྱིས་སྤྲོ་སེམས་ཆེན་པོ་དང་ཕུལ་བྱུང་གྲུབ་འབྲས་ཀྱི་ཐོག་ནས་རང་སྐྱོང་ལྗོངས་དབུ་བརྙེས་ནས་ལོ50འཁོར་བར་བསུ་བ་ཞུ་དགོས་ཞེས་བསྟན་པ་རེད།