ཞིན་ཧྭ་གསར་འགྱུར་ཁང་པེ་ཅིན་ནས་ཟླ་བ7པའི་ཚེས29ཉིན་འབྱོར་བའི་གཏམ་གསར། ནོར་སྲིད་པུའུ་ཡིས་གོང་ཚེས་ཉིན་གནས་ཚུལ་བསྒྲགས་དོན། ཀྲུང་དབྱང་ནོར་སྲིད་ཀྱིས་མ་དངུལ་སྒོར་དུང་ཕྱུར20བཏང་ནས་ཞིང་པའི་ཆེད་ལས་མཉམ་ལས་རྩ་འཛུགས་འཕེལ་རྒྱས་གཏོང་བའི་ཆེད་གཉེར་ལས་གཞི་ཐོག་སྤྱད་ཅིང་། རྣམ་པ་གསར་པའི་ཞིང་ལས་བདག་གཉེར་གྱི་མ་ལག་ཇེ་མགྱོགས་འཛུགས་པར་སྐུལ་འདེད་བཏང་ནས་མུ་མཐུད་ནས་ཞིང་པའི་རྩ་འཛུགས་ཅན་གྱི་ཆུ་ཚད་ཇེ་མཐོར་གཏང་རྒྱུ་རེད།

　ངོ་སྤྲོད་བྱས་པར་གཞིགས་ན། ལས་གཞི་དེའི་མ་དངུལ་དེ་ཀྲུང་དབྱང་གིས་མཛུབ་སྟོན་དང་ས་གནས་ཀྱིས་དོན་འཁྱོལ་བྱེད་པའི་དོ་དམ་བྱེད་སྟངས་སྤྱད་ནས་ཞིབ་བཤེར་ཆོག་མཆན་གྱི་དབང་མཚམས་དེ་ས་གནས་སོ་སོར་སྤྲད་རྒྱུ་དང་ས་གནས་སོ་སོས་ཡུལ་བབ་དང་བསྟུན་ནས་འབྲུ་རིགས་དང་ཞིང་ལས་འཕྲུལ་ཆས། ཆུ་ཐོན་དངོས་རིགས་སོགས་ཞིང་པའི་ཆེད་ལས་མཉམ་ལས་ཀྱི་རྩ་འཛུགས་འཕེལ་རྒྱས་གཏོང་བར་རྒྱབ་སྐྱོར་ཤུགས་ཆེན་པོ་བྱ་དགོས། དེ་དང་དུས་མཚུངས་སུ་སྔར་ལྷག་གིས་ཚོད་ལྟ་བྱེད་པའི་ནང་དོན་ཕུན་སུམ་ཚོགས་པར་བཏང་ཞིང་། རྣམ་པ་འདྲ་མིན་གྱི་ཞིང་ལས་གཞི་ཁྱོན་འོས་འཚམ་ལྡན་པའི་སྒོས་བདག་གཉེར་བྱེད་པར་རྒྱབ་སྐྱོར་ཧུར་ཐག་བྱས་པ་དང་། འབྲུ་རིགས་གཞི་ཁྱོན་ཅན་ཐོན་སྐྱེད་བྱེད་མཁན་གྱི་ཞིང་པའི་མཉམ་ལས་ཁང་དེ་རྒྱབ་སྐྱོར་བྱེད་ཡུལ་གཙོ་བོར་བཞག་ཐོག་ཞིང་པས་འགན་གཙང་ལེན་གྱི་ས་ཞིང་དེ་མ་རྐང་བཞག་སྟེ་ས་ཞིང་གི་མ་རྐང་མཉམ་ལས་ཁང་འགྲུབ་པར་སྣེ་ཁྲིད་བྱས་ཏེ། མུ་མཐུད་ནས་ཞིང་སྡེའི་ཐུན་མོང་བདག་གཉེར་ཕན་ནུས་ལྡན་པའི་སྒོ་ནས་མངོན་འགྱུར་ཡོང་བའི་རྣམ་པ་འཚོལ་ཞིབ་བྱ་རྒྱུ་རེད།

　ནོར་སྲིད་པུའུའི་ཞིང་ལས་སིའི་འགན་ཁུར་པས་ནན་གསུངས་གནང་དོན། ཕྱིན་ཆད་ཀྲུང་དབྱང་ནོར་སྲིད་ཀྱིས་རྒྱུན་མཐུད་ནས་བཅོས་བསྒྱུར་དང་གསར་སྐྲུན་བྱེད་ཤུགས་ཆེ་རུ་བཏང་ནས་མ་དངུལ་ལ་ལྟ་སྐུལ་དོ་དམ་དམ་འཛིན་བྱས་ནས་ནོར་སྲིད་ཀྱིས་ཞིང་པའི་ཆེད་ལས་མཉམ་ལས་རྩ་འཛུགས་འཕེལ་རྒྱས་གཏོང་བར་ཡུན་རིང་ཕན་ཐོགས་པའི་ནང་རྐྱེན་བསྐྲུན་པར་འཛུགས་སྐྱོང་ཤུགས་ཆེན་པོ་བྱ་རྒྱུའོ།།