ཁྲོན་ནུབ་མཐོ་སྒང་དུ་བསྟུད་མ་ཉིན་ཤས་རིང་དྲག་ཆར་བབས་པའི་རྐྱེན་གྱིས། ཟླ་བ6པའི་ཚེས29ཉིན་གྱི་ཕྱི་དྲོར་ལྕགས་ཟམ་རྫོང་གི་སྡེ་ཐོག་དང་བརྒྱ་གྱུར་ཤང་གཉིས་ལ་དྲག་ཆར་ཡུན་རིང་བབས་པའི་རྐྱེན་གྱིས་ཆུ་ལོག་དང་འདམ་རྡོའི་ཆུ་རུད་བྱུང་ནས་ས་གཤིས་ལ་གནོད་སྐྱོན་ཐེབས་པ་རེད། དེའི་ནང་བརྒྱ་གྱུར་ཤང་གི་མངའ་ཁོངས་ཏེS211པའི་ལམ་ཐིག་གི་ཟམ་པ་ཨང་དང་པོའི་ཟུར་གྱི་རི་ཉིལ་ནས་ཉིལ་ཚད་སྨི་གྲུ་བཞི་ལྷམ་པ3000ལྷག་ལ་ཟིན་པས། ཞིང་ཆེན་རིམ་པའི་གཞུང་ལམS211པའི་ལམ་ཐིག་གི་མི་སྣ་དང་འགྲིམ་འགྲུལ་ལ་བཀག་འགོག་ཐེབས་པ་དང་། སྡེ་ཐོག་ཤང་པེ་ཐོའུ་གྲོང་སྡེའི་ཞིང་དུད་གཉིས་ཀྱི་སྡོད་ཁང་གཏོར་བརླག་ཐེབས་ཤིང་། ཞིང་པའི་དུད་ཚང་གཉིས་ཀྱི་སྡོད་ཁང་ལ་ཚད་མི་འདྲ་བའི་གནོད་སྐྱོན་ཐེབས་ཡོད། ཤང་གཉིས་ཀྱི་ཞིང་ལས་སྐྱེ་དངོས་དང་ཞིང་ཆུ་འདྲེན་ས། ཆུ་བེད་སྒྲིག་ཆས་སོགས་ལ་གཞི་ཁྱོན་ཆེ་བའི་གེགས་སྐྱོན་ཐེབས་ཡོད། འཐུང་ཆུའི་འདྲེན་ལམ་མང་པོར་བར་མཚམས་ཆད་པ་དང་གྲོང་བགྲོད་གཞུང་ལམ་མང་པོར་གནོད་སྐྱོན་ཐེབས་པ་རེད།

　གནོད་སྐྱོན་ཐེབས་རྗེས་ལྕགས་ཟམ་རྫོང་སྲིད་གཞུང་གི་འགན་ཁུར་མི་སྣ་དང་འབྲེལ་ཡོད་སྡེ་ཚན་གྱི་འགོ་ཁྲིད་གཙོ་བོ་དུས་ཚོད་དང་པོར་ཡུལ་དངོས་སུ་ཕྱིན་ནས་ཉེན་ཁ་མྱུར་སེལ་གྱི་ལས་ཀར་བཀོད་འདོམས་བྱས་ཤིང་། ལས་བྱེད་པ་དང་མང་ཚོགས་ཀྱིས་མགྱོགས་མྱུར་དུ་ཉེན་ཁ་མྱུར་སེལ་བྱས་པར་བརྒྱུད། ཤང་གཉིས་ཀྱི་གནོད་ཐེབས་མང་ཚོགས་དུས་ཚོད་དང་པོར་གནས་སྤོ་དང་བཀོད་སྒྲིག་ནུས་ལྡན་བྱས་ནས། མི་གྲངས་གཅིག་ཀྱང་ཤི་རྨས་བྱུང་མེད་པ་དང་། བརྒྱ་གྱུར་ཤང་གི་མངའ་ཁོངས་ནང་གིS211པའི་ལམ་ཐིག་ཀྱང་ཉིན་དེའི་ཕྱི་དྲོའི་ཆུ་ཚོད7པའི་ཐོག་ཤར་གཏོང་ཐུབ་པ་བྱུང་ནས། ཡུལ་དེའི་ཏང་ཡོན་ལས་བྱེད་པས་མང་ཚོགས་དང་མཉམ་དུ་དུས་ཐོག་ཏུ་ཆུ་ཡུར་གཙང་བཤེར་དང་མངོན་མེད་རྐྱེན་ངན་སེལ་ཐབས་བྱས་པར་མ་ཟད། ད་དུང་གནོད་ཐེབས་མང་ཚོགས་ལ་འདམ་རྫབ་གཙང་བཤེར་བྱེད་རོགས་བྱས་ཏེ་རང་ཉིད་སྐྱོབ་ཐབས་ལ་ཁྲིད་སྟོན་བྱས་པ་རེད།།