ཉེ་ཆར། 《ཞིང་ཆེན་ཡོངས་ཀྱི་གཞུང་ལམ་འགྲིམ་འགྲུལ་ཉེན་མེད་ཡོང་བར་ཕྱོགས་བསྡུས་བདག་སྐྱོང་བྱེད་པའི་ལས་ཀ་ཟབ་སྤེལ་དང་སྲ་བརྟན་གཏོང་བའི་ལོའི་ལས་ཀའི་བརྙན་འཕྲིན་དང་ཁ་པར་གྲོས་ཚོགས》དང་།《འདབ་པ་རྫོང་སྲིད་གཞུང་གིས་ཆུ་རྒྱས་པའི་དུས་སྐབས་ཀྱི་འཕྲལ་མྱུར་གྲོས་ཚོགས》ཀྱི་སྙིང་དོན་དོན་འཁྱོལ་མཐར་ཕྱིན་བྱེད་ཆེད། འདབ་པ་རྫོང་གཞུང་ལམ་ཡན་ལག་ཅུས་ཀྱིས་དེ་མ་ཐག་ཆུ་རྒྱས་པའི་དུས་སྐབས་ཀྱི་ཉེན་མེད་ཀྱི་ཐོན་སྐྱེད་ལས་ཀར་ཤུགས་ཆེ་རུ་གཏོང་བའི་ཚོགས་འདུ་འཚོགས་པ་རེད།

　ཅུས་དེས་ལས་ཀའི་དོན་དངོས་དང་ཟུང་འབྲེལ་བྱས་ནས། རྫོང་ཨུ་དང་རྫོང་སྲིད་གཞུང་གི་ཆུ་ལོག་སྔོན་འགོག་གི་གྲབས་གཤོམ་ཇུས་གཞི་ནང་བཞིན། ཆུ་ལོག་སྔོན་འགོག་གི་དངོས་རྫས་དང་འཕྲུལ་ཆས་ཀྱི་གྲ་སྒྲིག་ལས་ཀ་ཡག་པོ་སྒྲུབ་པ་དང་། བབ་མཚུངས་ཀྱི་ཆུ་ལོག་སྔོན་འགོག་དང་ཉེན་ཁ་མྱུར་སེལ་གྱི་མི་སྣ་སྒྲིག་སྦྱོར་བྱས་ནས། ནམ་ཞིག་གྲབས་གཤོམ་ཇུས་གཞི་སྤེལ་འགོ་ཚུགས་སྐབས་མི་སྣ་དང་། འཕྲུལ་ཆས། དངོས་རྫས་བཅས་ནམ་ཡིན་རུང་འབྱོར་ཐུབ་པར་ཁག་ཐེག་བྱས་ཤིང་། ཕྱོགས་ཡོངས་དང་ཞིབ་ཚགས་ཀྱི་སྒོ་ནས་མངོན་མེད་རྐྱེན་ངན་བདག་སྐྱོང་བྱེད་པའི་ལས་ཀ་ཐེངས་ཤིག་སྤེལ་བ་དང་། ཞིང་ཆེན་རིམ་པའི་ལམ་ཐིགS216པའི་དཔའ་བོ་རིའི་གཞུང་ལམ་དུམ་བུར་ནམ་རྒྱུན་རྡིབ་པ་དང་། ས་གཤིས་གནོད་འཚེ་བྱུང་མང་བའི་གཞུང་ལམ་དུམ་བུ། ལམ་ཀྱོག་རི་གཟར། ཆུ་དང་གཡང་ས་ལ་ཉེ་བ། བྱུར་རྐྱེན་བྱུང་མང་བ་སོགས་ཀྱི་གཞུང་ལམ་གཙོ་བོར་དམིགས་ནས། མངོན་མེད་རྐྱེན་ངན་གྱི་བདག་སྐྱོང་ལས་ཀ་སྤེལ་ཞིང་མངོན་མེད་རྐྱེན་ངན་དུས་ཐོག་ཐག་གཅོད་བྱས། འབྲེལ་ཡོད་ཚན་ཁག་གིས་ཆུ་ལོག་སྔོན་འགོག་གི་ལྟ་སྐུལ་སློབ་སྟོན་དང་ཞིབ་བཤེར་གྱི་ལས་ཀ་དུས་ཐོག་ཏུ་སྤེལ་ཞིང་དོ་དམ་ས་ཚུགས་སོ་སོར་ཕྱིན་ནས་ལྟ་སྐུལ་སློབ་སྟོན་གྱི་ལས་ཀ་གཏིང་ཟབ་སྤེལ་ཞིང་། ཆུ་ལོག་སྔོན་འགོག་གི་ལས་རེས་དང་སྲུང་རེས་བྱེད་ཤུགས་ཆེ་རུ་བཏང་ནས་དུས་ཐོག་ཏུ་ཆ་འཕྲིན་སྣ་ཚོགས་གོང་ལ་ཞུ་དགོས།།