ཀྲུང་གོ་བོད་ཀྱི་དྲ་བའི་འཕྲིན། བོད་ལྗོངས་ཀྱིས་ཉིན་ཤས་གོང་ཐོན་སྐྱེད་འཛུགས་སྐྲུན་རྣམ་གྲངས་གཉེར་བ་དང་ཡང་ན་དེ་མིན་གྱི་ཐོན་སྐྱེད་འཛུགས་སྐྲུན་བྱས་ནས།ས་ཆུ་སྲུང་འཛིན་ལ་སྐྱོན་རྒྱག་མཁན་ཚན་པ་དང་མི་སྒེར་གྱི་ས་ཆུ་སྲུང་འཛིན་གྱི་ཁ་གསབ་གྲོན་དངུལ་ཚད་གཞི་མཐོ་རུ་བཏང་སྟེ་སྐྱེས་ཁམས་སྲུང་སྐྱོབ་ལ་ཤུགས་སྣོན་རྒྱབ་ཡོད་པ་རེད།
རང་ལྗོངས་ཀྱིས་ད་རེས་ས་ཆུ་སྲུང་འཛིན་གྱི་ཁ་གསབ་གྲོན་དངུལ་བསྡུ་བའི་ཐད་བྱ་ཐབས་དང་ཚད་གཞི་བཞི་བཟུང་ཡོད།སྤྱིར་བཏང་རང་བཞིན་གྱི་ཐོན་སྐྱེད་འཛུགས་སྐྲུན་རྣམ་གྲངས་ལ་ས་ཆུ་བཟུང་བའི་རྒྱ་ཁྱོན་ལ་གཞིགས་ནས།སྡེབ་གཅིག་ལ་སྤྱི་ཁྲེ་ངོས་སྙོམས་གྲུ་བཞི་མ་རེར་སྒོར་གཉིས་དང་སྒོར་ཟུར་ལྔ་རེ་བྱས་ནས་བསྡུ་རྒྱུ་དང༌།ཆུ་བེད་ཆུ་གློག་ལས་གཞི་འཛུགས་སྐྲུན་རྣམ་གྲངས་དང་ཆུ་མཛོད་ཀྱིས་སྣུབ་པའི་ཁུལ་ས་ཆུ་སྲུང་འཛིན་ཁ་གསབ་གྲོན་དངུལ་བསྡུ་བའི་ཁྱབ་ཁོངས་ནང་མི་འཇུག་པ།གཏེར་ཁའི་ཐོན་ཁུངས་སྔོག་འདོན་བྱེད་མཁན་ལ་འཛུགས་སྐྲུན་རིང་ས་ཆུ་བཟུང་བའི་རྒྱ་ཁྱོན་ལ་གཞིགས་ནས།སྡེབ་གཅིག་ལ་ཁ་གསབ་གྲོན་དངུལ་བསྡུ་རྒྱུ་དང་སྤྱི་ཁྲེ་ངོས་སྙོམས་གྲུ་བཞི་མ་རེར་སྒོར་གཉིས་དང་སྒོར་ཟུར་ལྔ་རེ་བྱས་ནས་བསྡུ་རྒྱུ་རེད།ས་ལེན་པ་དང་བྱེ་མ་སྔོག་པ།རྡོ་བཤགས་པ་བཅས་དང་སོ་ཕག་དང་རྫ།དཀར་ཡོལ།རྡོ་ཞོ་བཅས་བསྲེག་མཁན་ལ་ས་ལེན་ཚད་དང་བྱེ་མ་སྔོག་ཚད།རྡོ་བཤགས་ཚད་བཅས་ལ་གཞིགས་ནས།སྤྱི་ཁྲེ་རྒྱ་དཔངས་གྲུ་བཞི་མ་རེར་སྒོར་གཉིས་རེ་བྱས་ནས་བསྡུ་རྒྱུ།ས་རོ་རྡོ་རོ་སོགས་དབྱུགས་མཁན་ལ་ས་རོ་རྡོ་རོའི་འབོར་ཚད་ལ་གཞིགས་ནས།སྤྱི་ཁྲེ་རྒྱ་དཔངས་གྲུ་བཞི་མ་རེར་སྒོར་གཉིས་རེ་བྱས་ནས་བསྡུ་རྒྱུ་བཅས་རེད།
 སྤྱིར་བཏང་རང་བཞིན་གྱི་ཐོན་སྐྱེད་འཛུགས་སྐྲུན་རྣམ་གྲངས་གཉེར་མཁན་དང་གཏེར་ཁའི་ཐོན་ཁུངས་སྔོག་འདོན་འཛུགས་སྐྲུན་དུས་རིམ་དུ་སླེབས་སྐབས།འོས་འགན་མི་སྣས་རྣམ་གྲངས་ལས་འགོ་མ་བཙུགས་གོང་སྡེབ་གཅིག་ལ་ས་ཆུ་སྲུང་འཛིན་ཁ་གསབ་གྲོན་དངུལ་འཇལ་དགོས་ཀྱི་ཡོད།གཏེར་ཁའི་ཐོན་ཁུངས་སྔོག་པའི་དུས་འཚམས་དང་དེ་མིན་གྱི་ཐོན་སྐྱེད་འཛུགས་སྐྲུན་བྱེད་སྐབས་འོས་འགན་མི་སྣས།ལོ་རེ་བྱས་ནས་ས་ཆུ་སྲུང་འཛིན་གྱི་ཁ་གསབ་གྲོན་དངུལ་འཇལ་དགོས་ཀྱི་ཡོད་པ་རེད།
རང་སྐྱོང་ལྗོངས་ས་ཆུ་སྲུང་འཛིན་ཅུས་ཀྱི་ཅུས་ཀྲང་དབྱི་ཡུན་ཧྥི་ཡིས་ཚན་པ་དང་མི་སྒེར་གྱིས།གཏན་འབེབས་ལས་འགལ་ཚེ་རྒྱལ་ཁབ་ཀྱི་འབྲེལ་ཡོད་གཏན་འབེབས་ལ་གཞིགས་ནས་ཁྲིམས་ལུགས་ཀྱི་འགན་འཁྲི་རྩད་གཅོད་བྱེད་རྒྱུ་དང༌།ཉེས་གསོག་གི་ཚད་གཞིར་སླེབས་ཚེ་ཁྲིམས་ལྟར་ཁྲིམས་འཛིན་ཚན་པར་ཐག་གཅོད་བྱེད་རྒྱུར་རྩིས་སྤྲོད་རྒྱུ།ས་ཆུ་སྲུང་འཛིན་ཁ་གསབ་གྲོན་དངུལ་ཆ་ཚང་རྒྱལ་ཁབ་མཛོད་ཁང་ལ་རྩིས་ཞུ་བྱེད་པ་དང་།སྲིད་གཞུང་རང་བཞིན་གྱི་ཐེབས་རྩའི་སྔོན་རྩིས་དོ་དམ་བྱེད་ཁོངས་ནང་བཅུག་ནས་ཆེད་དངུལ་ཆེད་སྤྱོད་བྱེད་རྒྱུ་དང་།ལོ་མཇུག་ཏུ་དངུལ་ལྷག་འཕྲོ་རྣམས་ལོ་རྗེས་མར་བེད་སྤྱོད་བྱེད་རྒྱུའི་ནང་འཇུག་རྒྱུ་རེད་ཅེས་ངོ་སྤྲོད་གནང་བ་རེད།  །