ཀྲུང་གོ་བོད་ཀྱི་དྲ་བའི་འཕྲིན། ཏང་གི་ཚོགས་ཆེན་བཅུ་དགུ་པར་བསུ་བ་ཞུ་ཆེད་བོད་ལྗོངས་ཀྱི་ས་ཁུལ（གྲོང་ཁྱེར）ཁག་དང་ཚན་པ་ཁག་གིས་ཉིན་ཤས་བསྟུད་མར་ཕུན་སུམ་ཚོགས་པའི་བྱེད་སྒོ་སྤེལ་ཡོད་པ་དང་།  ཚང་མས་གཡུར་ཟའི་གྲུབ་འབྲས་ཐོག་ནས་ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་གི་ཡིན་ཞེས་བཤད་ཡོད།

ཉིན་ཤས་བསྟུད་མར།  གཞིས་རྩེ་གྲོང་ཁྱེར་གྱི་རྒྱ་ཆེའི་ལས་བྱེད་མང་ཚོགས་ཀྱིས་གླུ་ལེན་གར་འཁྲབ་ཐོག་ནས་རྒྱལ་སྟོན་ལ་རྟེན་འབྲེལ་ཞུས་ཏེ་ཚོགས་ཆེན་བཅུ་དགུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུས་ཡོད།  བཞད་མཐོང་སྨོན་རྗོང་རྟ་ནག་མདའ་ཤང་རི་ཁུད་གྲོང་ཚོར་ལས་བྱེད་མང་ཚོགས་མཉམ་འཛོམས་བྱས་ནས་ཏང་གི་བཀའ་དྲིན་གླེང་བ་དང་མེས་རྒྱལ་གྱི་འབྱུང་འགྱུར་དབྱར་མཚོ་རྒྱས་པ་ལྟར་གོང་འཕེལ་ཡོང་རྒྱུའི་སྨོན་འདུན་ཞུས་ཡོད།  རྒྱལ་རྩེ་རྫོང་ན་རོང་ཤང་འཐུ་རུ་གཞུང་གྲོང་ཚོར་གྲོང་ཚོར་བཅའ་སྡོད་ལས་དོན་རུ་ཁག་གིས་འཕྲེད་འགེལ་བྱང་བུ་འགེལ་བ་དང་པར་རིས་འགྲེམས་སྟོན་བྱས་ཏེ།  ཏང་གི་ཚོགས་ཆེན་བཅོ་བརྒྱད་པའི་ཚུན་དུ་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གིས་རྒྱལ་ཡོངས་མི་རིགས་ཁག་གི་མང་ཚོགས་མཐུན་སྒྲིལ་སྣེ་ཁྲིད་བྱས་ནས་འབད་འབུངས་ཡར་བརྩོན་བྱས་པའི་སྐོར་མངོན་པར་བྱས་ཡོད།  ལྷ་རྩེ་རྗོང་མི་དམངས་ཞིབ་དཔྱོད་ཁང་གི་ཏང་ཡོན་ལས་བྱེད་ཉེན་རྟོག་ཡོངས་ཀྱིས་ལུས་སྦྱོང་བྱེད་སྒོ་སྤེལ་ནས་ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུས་ཡོད།

ཉིན་ཤས་གོང་།  མངའ་རིས་ས་ཁུལ་གྱིས་སྣང་ཆེན་བཞི་དང་དགའ་ཞེན་བཞི་ལག་ལེན་བསྟར་ནས་ཏང་གི་ཚོགས་ཆེན་བཅུ་དགུ་པར་བསུ་བ་ཞུ་ཞེས་པའི་ཤེས་བྱའི་འགྲན་བསྡུར་གྱི་བྱེད་སྒོ་སྤེལ་བ་དང་།  འགྲན་ཞུགས་པ་ཚོས་རང་ནུས་འདོན་སྤེལ་གང་ལེགས་བྱས་ཏེ་རྒྱ་ཆེའི་མང་ཚོགས་ཀྱིས་ཏང་གི་དམངས་ཕན་དམངས་བདེའི་སྲིད་ཇུས་ཤེས་རྟོགས་གཏིང་ཟབ་ཡོང་རྒྱུར་ཁྲིད་སྟོན་ཧུར་ཐག་བྱེད་པ་དང་མང་ཚོགས་ཀྱི་རྨང་གཞི་སྔར་བས་བརྟན་དུ་གཏོང་བ།  མི་སེམས་གཅིག་སྒྲིལ་བྱེད་པ་བཅས་བྱས་ནས་ཐུན་མོང་ཐོག་ཏང་གི་ཚོགས་ཆེན་བཅུ་དགུ་པར་བསུ་བ་ཞུ་ཆེད་དགའ་སྤྲོ་འཆམ་མཐུན་གྱི་སྤྱི་ཚོགས་ཁོར་ཡུག་ཞིག་གཏོད་རྒྱུ་ཡིན་ཞེས་བཤད་པ་རེད།

ཉིན་ཤས་གོང་།  རང་སྐྱོང་ལྗོངས་ཀྱི་སྣང་ཆེན་བཞི་དང་དགའ་ཞེན་བཞིའི་བརྗོད་དོན་གཙོ་བོའི་སློབ་གསོ་ལག་ལེན་བྱེད་སྒོའི་རེས་འཁོར་གསུམ་པའི་དཔེ་སྟོན་སྒྲོག་འགྲེལ་དང་ཕུགས་འདུན་སྒྲུབ་མཁན་གྱི་ཀྲུང་གོ་བ་ཞེས་པའི་སྐོར་སྐྱོད་སྒྲོག་འགྲེལ་ཚོགས་པས་ལྷོ་ཁ་གྲོང་ཁྱེར་གྱི་སྣེ་གདོང་ཆུས་དང་མཚོ་སྣ་རྫོང་།  མཚོ་སྨད་རྫོང་།  ལྷོ་བྲག་རྫོང་བཅས་སུ་སྒྲོག་འགྲེལ་བྱས་པ་དང་སྒྲོག་འགྲེལ་པ་ཚོས་རང་ཉིད་ཀྱི་མཐོང་ཐོས་མྱོང་གསུམ་དང་གསོན་ཉམས་དོད་པའི་དཔེ་མཚོན་གྱི་ཐོག་ནས་བོད་ལྗོངས་ཀྱི་འཕོ་འགྱུར་དང་།  ལྷག་པར་དུ་ཏང་གི་ཚོགས་ཆེན་བཅོ་བརྒྱད་པའི་ཚུན་དུ་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་དབུ་ཁྲིད་འོག་བོད་ལ་བྱུང་བའི་འཕོ་འགྱུར་ཆེན་པོ་གླེང་ཡོད།

ཉིན་ཤས་གོང་།  བོད་ལྗོངས་རྩོམ་རིག་སྒྱུ་རྩལ་ལས་རིགས་མཉམ་འབྲེལ་ལྷན་ཚོགས་དང་བོད་ལྗོངས་སློབ་ཆེན་གྱིས་མཉམ་གཉེར་བྱས་པའི་གངས་ལྗོངས་ཀྱི་བརྩེ་སེམས་ཞེས་པའི་བོད་ཀྱི་སྣུམ་ཚོན་རི་མོའི་འགྲེམས་སྟོན་སྐབས་གཉིས་པ་ལྷ་སའི་གཡག་རྟེན་མཛོད་གླིང་དུ་བྱེད་འགོ་ཚུགས་པ་དང་།  ད་རེས་ཀྱི་འགྲེམས་སྟོན་དེ་ནི་བོད་ལྗོངས་རྩོམ་རིག་སྒྱུ་རྩལ་ལས་རིགས་ཀྱིས་ཏང་གི་ཚོགས་ཆེན་བཅུ་དགུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་ཆེད་གཉེར་བའི་སྣུམ་ཚོན་རི་མོའི་འགྲེམས་སྟོན་ཞིག་རེད།

ཉིན་ཤས་གོང་།  དཔལ་འབར་རྫོང་གིས་ཏང་གི་ཚོགས་ཆེན་བཅུ་དགུ་པར་བསུ་བ་ཞུ་བ་དང་གླིང་སྒྲུང་རིག་གནས་ཀྱི་ཆེད་དོན་རིག་རྩལ་འཁྲབ་སྟོན་བྱས་པ་རེད།  དཔལ་འབར་རྫོང་ཨུད་དྲིལ་བསྒྲགས་པུའི་པུའུ་ཀྲང་ཁྲེན་ཀྲེན་གོ་ནས།  སྐད་གྲགས་ཡོད་པའི་སྒྲུང་མཁན་གྲགས་པ་དང་སྲིད་ཐར་རྡོ་རྗེ་གཉིས་ནི་ང་ཚོ་དཔལ་འབར་རྗོང་ནས་རེད།  རྒྱལ་སྟོན་སླེབས་གྲབས་ཡོད་པས་དཔལ་འབར་རྗོང་གིས་གླིང་རྗེ་གེ་སར་གྱི་སྒྲུང་པའི་ཕ་ས་ཞེས་པ་རེ་ཞུ་ཐུབ་པ་དེ་ནི་ང་ཚོས་མེས་རྒྱལ་ལ་ཕུལ་བའི་ཕྱག་རྟགས་ཡག་ཤོས་ཤིག་ཡིན་ཞེས་གསུངས་པ་རེད། །