སི་ཁྲོན་ཞིང་ཆེན་ནགས་ལས་ཐིང་གི་བྱེ་འགྱུར་ས་ཞིང་བཅོས་སྐྱོང་བྱས་ཚུལ་ཐོག་ནས་གསལ་པོར་མཚོན་དོན། སི་ཁྲོན་ནུབ་རྒྱུད་བོད་ཁུལ་གྱིས་སྐྱེ་ཁམས་སྲུང་སྐྱོང་དང་འཛུགས་སྐྲུན་འཆར་འགོད་ཀྱི་ལས་ཀ་སྤེལ་འགོ་ཚུགས་པ་ནས་བཟུང་། སི་ཁྲོན་ཞིང་ཆེན་གྱིས་རིམ་རྩིས་བྱས་ན་མ་དངུལ་སྒོར་དུང་ཕྱུར10.84གཏོང་འཇོག་བྱས་ཏེ་བྱེ་འགྱུར་ས་ཞིང་ཁྱོན་བསྡོམས་མུའུ་ཁྲི120བཅོས་སྐྱོང་དང་སྲ་བརྟན་བཏང་བའི་ནང་ནས་བྱེ་འགྱུར་ས་ཞིང་མུའུ་ཁྲི65.1ཡོད་པ་རེད།

     ངོ་སྤྲོད་བྱས་པར་གཞིགས་ན། 2013ལོར་སི་ཁྲོན་ནུབ་རྒྱུད་བོད་ཁུལ་གྱིས་སྐྱེ་ཁམས་སྲུང་སྐྱོང་དང་འཛུགས་སྐྲུན་འཆར་འགོད་དངོས་སུ་ལས་གཉེར་བྱེད་འགོ་ཚུགས་པ་རེད། འཆར་འགོད་བྱ་ཡུལ་དེ་སེར་ཤུལ་དང་། གསེར་ཐར། དམར་ཐང། མཛོད་དགེ་སོགས་རྫོང10དང་འབྲེལ་བ་ཡོད་པ་རེད།

     བྱེ་འགོག་བྱེ་བཅོས་བྱ་རྒྱུའི་ཐད་སི་ཁྲོན་ཞིང་ཆེན་གྱིས་བྱེ་ས་ཆགས་ཚུལ་གྱི་རིགས་དབྱེ་བ་དང་། བྱེ་བཅོས་དང་རྩི་ཤིང་འདེམས་གསོ། ཤིང་སྡོང་འཛུགས་པ་སོགས་འགག་རྩའི་ལག་རྩལ་ཞིབ་འཇུག་གསར་གཏོད་བྱས་ཤིང་། སེར་ཤུལ་དུ་འཕྲུལ་འཁོར་གྱིས་བྱེ་བཅོས་རྩ་འདེབས་བྱ་རྒྱུ་དང་། གསེར་ཐར་དུ་བྱེ་བཅོས་དང་ཨབ་ར་ཚོད་འཛིན་བྱ་རྒྱུ། མཛོད་དགེས་ལྕུག་ཕྲན་གྲུ་བཞི་བྱས་ཏེ་བྱེ་བཅོས་བྱ་རྒྱུ། དམར་ཐང་གིས་སྐྱེ་ཁམས་དཔལ་འབྱོར་བྱེ་བཅོས་བྱ་རྒྱུ་སོགས་བྱེ་ས་བཅོས་སྐྱོང་ནུས་ལྡན་བྱེད་ས11འཚོལ་ཞིབ་དང་འཛུགས་སྐྱོང་བྱས་ནས། བྱེ་སའི་སྐྱེ་ཁམས་མངོན་གསལ་ལེགས་བཅོས་བྱུང་ཡོད་པར་མ་ཟད་ཞིང་འབྲོག་མི་དམངས་ཀྱི་ཐོན་སྐྱེད་དང་འཚོ་བ་བྱེད་སྟངས་འཕོ་འགྱུར་ཡོང་བར་སྐུལ་འདེད་བཏང་བ་རེད།

     ཤེས་རྟོགས་བྱུང་བར་གཞིགས་ན། སི་ཁྲོན་ཞིང་ཆེན་བྱེ་འགོག་བྱེ་བཅོས་ལས་ཀའི་སྤྱིའི་དམིགས་ཡུལ་ནི2020ལོར་སླེབས་དུས། ཞིང་ཆེན་ཡོངས་སུ་རིམ་རྩིས་བྱས་ན་བྱེ་འགྱུར་ས་ཞིང་མུའུ་ཁྲི300ལྷག་བཅོས་སྐྱོང་བྱ་རྒྱུ་ཡིན་པ་རེད།།