ཉེ་ཆར། སྨྱུག་འཛིན་པས་ལི་ཐང་རྫོང་སློབ་གསོ་ལུས་རྩལ་ཅུས་ནས་ཤེས་རྟོགས་བྱུང་དོན། ད་ལོ་ནས་བཟུང་ཞིན་ཏུའུ་ས་ཁུལ་སློབ་གསོ་ཅུས་ཀྱིས་ལོ་རེར་རྫོང་དེའི་དབུལ་ཕོངས་དགེ་སློབ་ལ་སྒོར་ཁྲི100ཡི་སློབ་ཞུགས་རོགས་སྐྱོར་གྱི་མ་དངུལ་སྟེར་རྒྱུ་ཡིན་པ་རེད།

ན་ལོའི་ཟླ་བ9པར་ཁྲེང་ཏུའུ་གྲོང་ཁྱེར་ཞིན་ཏུའུ་ས་ཁུལ་གྱིས་ལི་ཐང་རྫོང་ལ་ཁ་གཏད་རོགས་སྐྱོར་བྱས་པ་ནས་བཟུང་། ཞིན་ཏུའུ་ས་ཁུལ་སློབ་གསོ་ཅུས་ཀྱིས་དམའ་རིམ་སློབ་མ་དང་མཐོ་འབྲིང་སློབ་མ་གསོ་སྐྱོང་བྱ་རྒྱུ་མངགས་བཅོལ་བྱེད་པ་དང་། དགེ་རྒན་གསོ་སྐྱོང་བྱེད་པ། སློབ་ཞུགས་རོགས་སྐྱོར་དང་སྦྱངས་འབྲས་ལེགས་ཐོན་གྱི་བྱ་དགའི་མ་དངུལ། སློབ་གྲྭ་དང་ཆ་སྒྲིག་མཉམ་འཛུགས་བྱེད་པ། སློབ་གྲྭའི་ཚབ་བྱས་ཏེ་དོ་དམ་བྱེད་པ་སོགས་ཀྱི་བྱེད་ཐབས་སྤྱད་ནས་སློབ་གསོར་རོགས་སྐྱོར་བྱས་པ་རེད།

ཟླ་བ6པའི་ཚེས27ཉིན་ཞིན་ཏུའུ་ས་ཁུལ་སློབ་གསོ་ཅུས་ཀྱི་གསོ་སྦྱོང་ཚོགས་པ་དང་པོ་ལི་ཐང་རྫོང་དུ་ཕྱིན་ནས་དགེ་རྒན་ཆེད་དོན་གསོ་སྦྱོང་བྱེད་པའི་ལས་ཀ་སྤེལ་བ་རེད། གསོ་སྦྱོང་འཛིན་གྲྭའི་འགོ་མ་འཛུགས་སྔོན་དུ་ས་ཁུལ་གཉིས་ཀྱི་སློབ་གསོ་སྡེ་ཁག་གིས《ཞིན་ཏུའུ་ས་ཁུལ་སློབ་གསོ་ཅུས་ཀྱིས་ལི་ཐང་རྫོང་གི་སློབ་གསོ་ལུས་རྩལ་ཅུས་དང་སློབ་ཞུགས་རོགས་སྐྱོར་གྱི་ཁ་གཏད་རོགས་སྐྱོར་བྱེད་པའི་གྲོས་མཐུན་ཡི་གེ》བཞག་པ་རེད། དུས་མཚུངས་སུ་ས་ཁུལ་གཉིས་ཀྱི་ཆ་སྒྲིག་སློབ་གྲྭའི་འཐུས་ཚབ་ཀྱིས་ད་དུང《སློབ་གྲྭས་སློབ་གྲྭར་རོགས་སྐྱོར་བྱེད་པའི་ལས་ཀའི་གྲོས་མཐུན་ཡི་གེ》བཞག་པ་རེད། གྲོས་མཐུན་ཡི་གེའི་ནང་དོན་ལྟར་ན། ཞིན་ཏུའུ་ས་ཁུལ་སློབ་གསོ་ཅུས་ཀྱིས་ལོ་རེར་རིན་པ་མི་དགོས་པར་ལི་ཐང་རྫོང་ལ་དམའ་འབྲིང་གི་ཕུལ་བྱུང་སློབ་མ20དང་མཐོ་འབྲིང་གི་ཕུལ་བྱུང་སློབ་མ20རེ་གསོ་སྐྱོང་བྱེད་རོགས་དང་། ལོ་རེར་རོགས་དངུལ་སྒོར་ཁྲི100སྤྱད་ནས་ལི་ཐང་རྫོང་གི་དབུལ་ཕོངས་དང་ཕུལ་བྱུང་གི་དགེ་སློབ་ལ་སློབ་ཞུགས་རོགས་སྐྱོར་གྱི་ལས་ཀ་སྤེལ། ལོ་རེར་ཁ་གཏད་རོགས་སྐྱོར་དགེ་རྒན་ལྔ་ཡོད་པའི་རྨང་གཞིའི་ཐོག་ཡང་དུ་དགེ་རྒན5མངགས་ནས་སློབ་སྐྱོར་ལས་ཀ་བསྒྲུབས་པ་རེད། སྐབས་དེར་ཞིན་ཏུའུ་ས་ཁུལ་སློབ་གསོ་ཅུས་ཀྱི་ལས་སྒྲུབ་ཚོ་ཆུང་སྔོན་རྗེས་སུ་ད་དུང་ལི་ཐང་རྫོང་གི་མཚོ་འཕགས་ཆེས་མཐོ་བའི་མཆོད་རྟེན་ཤང་གི་སློབ་ཆུང་དུ་ཕྱིན་ནས་བརྟག་ཞིབ་ལས་ཀ་སྤེལ་བ་དང་སྦྲགས་སློབ་གྲྭ་དེའི་དགེ་སློབ་དག་ལ་སློབ་སྦྱོང་གི་སྤྱོད་ཆས་བསྐྱལ་བར་མ་ཟད། ད་དུང་དགའ་བ་གྲོང་རྡལ་གྱི་སློབ་ཆུང་དང་ཞང་པ་ཤང་གི་སློབ་ཆུང་དུ་སློབ་གྲྭའི་བར་ཕན་ཚུན་ཆ་སྒྲིག་རོགས་སྐྱོར་གྱི་ལས་ཀ་སྤེལ་བ་རེད།།