ཟླ་བ7པའི་ཚེས12ཉིན་ལ་ཞིང་ཆེན་ཡོངས་ཀྱི་ཞིང་ལས་དང་གྲོང་གསེབ་བཅོས་བསྒྱུར་གྱི་ཉམས་མྱོང་སྤེལ་རེས་དང་ལས་ཀར་སྐུལ་འདེད་གཏོང་བའི་ཚོགས་འདུ་ཁྲེང་ཏུའུ་རུ་འཚོགས་པ་རེད། ཞིང་ཆེན་ཏང་ཨུའི་ཧྲུའུ་ཅི་ཝང་ཏུང་མིང་གྲོས་ཚོགས་ནང་ཞུགས་ནས་གསུང་བཤད་གནང་ཞིང་། ཞིང་ཆེན་ཏང་ཨུའི་ཧྲུའུ་ཅི་གཞོན་པ་ཏེང་ཞའོ་ཀང་གིས་གྲོས་ཚོགས་ཀྱི་གཙོ་འགན་བཞེས་པས་མ་ཚད། གྲོས་ཚོགས་སྙིང་དོན་ལག་བསྟར་བྱ་རྒྱུའི་ཐད་ཐུགས་རེ་གནང་བ་རེད།

སྔ་དྲོར་འཚོགས་པའི་ཚོ་ཆུང་སྤེལ་རེས་ཚོགས་འདུའི་དེ་ཏེང་ཞའོ་ཀང་དང་ཞིང་ཆེན་གྱི་འགོ་ཁྲིད་ཆུས་མུའུ་ཧྲི་ཧྭ་དང་ཧང་ཡན་རུང་། ཀྲའེ་ཀྲེན་དབྱི་སོགས་ཀྱིས་ཁག་དབྱེ་ནས་གཙོ་སྐྱོང་གནང་བ་རེད། གྲོང་ཁྱེར（ཁུལ）དང་རྫོང（གྲོང་ཁྱེར་དང་ས་ཁུལ）གྱི་འགན་ཁུར་པས་ཉམས་མྱོང་སྤེལ་རེས་ཀྱི་གསུང་བཤད་གནང་བ་རེད།

ཕྱི་དྲོར་འཚོགས་པའི་ཚོགས་ཆེན་ཐོག་ཝང་ཏུང་མིང་གིས་གསུང་བཤད་གནང་བ་རེད། ཁོང་གིས་བསྟན་དོན། ཉེ་ལོར་ཞིང་ཆེན་ཏང་ཨུས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་དགོངས་དོན་དང་ཀྲུང་དབྱང་གི་ཐབས་ཇུས་བཀོད་སྒྲིག་ལག་བསྟར་ནན་ཏན་བྱས་ནས་ཞིང་ལས་ཀྱི་ཞིང་ཆེན་ཆེན་པོའི་གནས་ཚུལ་དངོས་ནས་འགོ་བཙུགས་པར་རྒྱུན་འཁྱོངས་བྱས་ཤིང་། ཞིང་ལས་དང་གྲོང་གསེབ་བཅོས་བསྒྱུར་དེ་ཞིང་ཆེན་ཡོངས་ཀྱི་ཞིང་གསུམ་ལས་ཀའི་མངོན་གསལ་གྱི་གནས་སུ་བཞག་པ་དང་། ཁྱོན་ཡོངས་ནས་བཅོས་བསྒྱུར་ཟབ་སྤེལ་གྱི་འགག་གནད་སྒྲོལ་སར་བརྩིས་ནས་ཇུས་འགོད་དང་སྐུལ་འདེད་གཏང་དགོས། ཞིང་ཆེན་ཡོངས་ཀྱི་ཞིང་ལས་དང་གྲོང་གསེབ་བཅོས་བསྒྱུར་ལ་དུས་རིམ་རང་བཞིན་གྱི་གྲུབ་འབྲས་ཐོབ་ཡོད་ལ། ཉམས་མྱོང་དང་ལས་སྟངས་ཀྱང་ཡག་མོ་ཆགས་ཡོད། ཞིང་ལས་དང་གྲོང་གསེབ་བཅོས་བསྒྱུར་རྒྱུན་ཆད་མེད་པར་ཟབ་མོ་སྤེལ་བ་དང་བསྟུན་ནས་ཞིང་ལས་དང་གྲོང་གསེབ་འཕེལ་རྒྱས་ཀྱི་ནང་གནས་སྒུལ་ཤུགས་དང་ཕྱི་རོལ་གྱི་ཁོར་ཡུག་ལ་འགྱུར་ལྡོག་གལ་ཆེ་ཞིང་གཏིང་ཟབ་པོ་བྱུང་ནས། ལོ་རྒྱུས་ཀྱི་དུས་རིམ་གསར་པར་སླེབས་པ་རེད། རིམ་པ་ཁག་དང་སྡེ་ཁག་སོ་སོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་གསུང་བཤད་གལ་ཆེན་རབ་དང་རིམ་པའི་སྙིང་དོན་དང་རྒྱལ་སྐྱོང་སྲིད་སྐྱོང་གི་འདུ་ཤེས་གསར་པ་དང་དགོངས་དོན་གསར་པ། འཐབ་ཇུས་གསར་པ་བཅས་སློབ་སྦྱོང་དང་ལག་བསྟར་ནན་ཏན་བྱེད་པ་དང་། ཁྱོན་ཡོངས་ནས་ཀྲུང་དབྱང་གི་ཞིང་གསུམ་ལས་ཀའི་ཇུས་ཆེན་བྱེད་ཕྱོགས་དང་ཞིང་ཆེན་གྱི་ཏང་གི་འཐུས་མི་ཚོགས་འདུ་ཐེངས་བཅུ་གཅིག་པའི་བཀོད་སྒྲིག་དོན་འཁྱོལ་བྱེད་པ། ཞིང་ལས་དང་གྲོང་གསེབ་བཅོས་བསྒྱུར་གྱི་གཙོ་འཛིན་བྱེད་ཕྱོགས་རྒྱུན་འཁྱོངས་བྱ་རྒྱུ་གཡོ་འགུལ་མི་བྱེད་པ། ཞིང་ལས་མཁོ་སྤྲོད་ཕྱོགས་ཀྱི་གྲུབ་ཚུལ་རང་བཞིན་བཅོས་བསྒྱུར་གྱིས་གཙོ་བོ་བྱས་ནས་ཞིང་ལས་དང་གྲོང་གསེབ་འཕེལ་རྒྱས་ཀྱི་སྒུལ་ཤུགས་གསར་པ་གསོ་སྐྱོང་བྱ་རྒྱུར་བརྩོན་དགོས། ཞིང་ལས་ཀྱི་རྨང་གཞི་སྲ་ཞིང་བརྟན་པ་དང་གྲོང་གསེབ་འཆམ་མཐུན་བརྟན་བརླིང་། ཞིང་པ་བདེ་སྡོད་ལས་བརྩོན་བཅས་ལ་སྐུལ་འདེད་གཏོང་ཞིང་། སི་ཁྲོན་དེ་ཞིང་ལས་ཀྱི་ཞིང་ཆེན་ཆེན་པོ་ནས་ཞིང་ལས་ཀྱི་ཞིང་ཆེན་སྟོབས་ལྡན་དུ་མཆོང་བརྒལ་ཡོང་བར་བྱས་ནས་རང་རེའི་ཞིང་ཆེན་གྱི་ཞིང་གསུམ་ལས་ཀ་དེ་སྐས་རིམ་གསར་པ་ཞིག་གི་ཐོག་སླེབས་པར་བྱ་དགོས།

ཝང་ཏུང་མིང་གིས་ནན་གསུང་གནང་དོན། ཞིང་ལས་མཁོ་སྤྲོད་ཕྱོགས་ཀྱི་གྲུབ་ཚུལ་རང་བཞིན་གྱི་བཅོས་བསྒྱུར་ལ་སྐུལ་འདེད་གཏིང་ཟབ་བཏང་སྟེ་རྒྱུན་ཆད་མེད་པར་ཞིང་ལས་ཀྱི་མཁོ་སྤྲོད་སྤུས་ཚད་དང་ཁེ་ཕན་ཇེ་ཆེར་གཏང་དགོས། གཅིག་གྱུར་གྱིས་གཞི་ཁྱོན་འཚང་བའི་གཉེར་སྐྱོང་དང་ཁྱིམ་ཚང་བདག་གཉེར་ཡག་མོ་བཟུང་སྟེ་ཞིང་ལས་དེང་རབས་ཅན་མངོན་འགྱུར་ཐུབ་པར་རྨང་གཞི་སྲ་ཞིང་བརྟན་པ་ཞིག་འདིང་དགོས། ཁེ་ཕན་མཉམ་འབྲེལ་གྱི་ལམ་ལུགས་འཐུས་སྒོ་ཚང་དུ་བཏང་སྟེ་དབུལ་ཐར་འགག་སྒྲོལ་ལས་ཀ་ལེགས་འགྲུབ་བྱ་དགོས། བཅོས་བསྒྱུར་ཇེ་ཟབ་གཏོང་བ་དེས་བདེ་སྐྱིད་མཛེས་སྡུག་ལྡན་པའི་གྲོང་སྡེ་གསར་པ་འཛུགས་སྐྲུན་བྱེད་པར་སྐུལ་འདེད་བཏང་སྟེ་ཁྱོན་ཡོངས་ནས་གྲོང་གསེབ་ཧྲིལ་པོར་འཕེལ་རྒྱས་ཆུ་ཚད་མཐོར་འདེགས་གཏང་དགོས། བཅོས་བསྒྱུར་གྱི་སྙིང་སྟོབས་དར་སྤེལ་གཏོང་ཞིང་འགན་འཁྲི་ཁུར་ཤུགས་ཆེ་རུ་བཏང་སྟེ་རྒྱུན་ཆད་མེད་པར་ཞིང་ལས་དང་གྲོང་གསེབ་ཀྱི་བཅོས་བསྒྱུར་ཐད་འགག་སྒྲོལ་གསར་པ་དེ་བས་ཆེན་པོ་ཐོབ་པར་སྐུལ་འདེད་གཏང་དགོས།

ཞིང་ཆེན་གྱི་འགོ་ཁྲིད་ཧྥན་རུའེ་ཕིང་དང་ཝང་ཉིང་། ལིའུ་ཙའོ་མིང་སོགས་དང་གྲོང་ཁྱེར（ཁུལ）གྱི་ཏང་ཨུའི་ཧྲུའུ་ཅི། ཞིང་ཆེན་ཏང་ཨུའི་གྲོང་གསེབ་ལས་ཀའི་འགོ་ཁྲིད་ཚོ་ཆུང་གི་གྲུབ་མི་སྡེ་ཚན་གྱི་འགན་ཁུར་པ་དང་རྫོང་（གྲོང་ཁྱེར་དང་ས་ཁུལ ）གི་ཏང་ཨུའི་ཧྲུའུ་ཅི་སོགས་ཚོགས་ཆེན་ནང་ཞུགས་ཡོད།།