མི་དམངས་དྲ་བ་ནས་གནས་ཚུལ་འབྱོར་གསལ། མི་རིགས་ཡོངས་ཀྱི་རི་འགོག་དམག་འཁྲུག་བྱུང་ནས་ལོ80འཁོར་བར་དྲན་གསོ་ཞུ་བའི་མཛད་སྒོ་དེ་སྤྱི་ཟླ7ཚེས་7ཉིན་གྱི་སྔ་དྲོ་ཀྲུང་གོ་མི་དམངས་རི་འགོག་དམག་འཁྲུག་དྲན་གསོ་ཁང་དུ་འཚོགས་པ་རེད། ཀྲུང་གུང་ཀྲུང་དབྱང་ཆབ་སྲིད་ཅུས་ཀྱི་རྒྱུན་ཨུ། ཀྲུང་དབྱང་ཧྲུའུ་ཅི་ཁྲུའི་ཧྲུའུ་ཅི་ལིའུ་ཡུན་ཧྲན་མཛད་སྒོར་ཕེབས་ནས་གསུང་བཤད་ཀྱང་གནང་བ་རེད།

ལིའུ་ཡུན་ཧྲན་གྱིས་གསུང་བཤད་གནང་སྐབས།1937ལོའི་ཟླ7ཚེས7ཉིན། རི་པིན་བཙན་འཛུལ་པས1931ལོར་རང་རྒྱལ་གྱི་བྱང་ཤར་ལ་བཙན་འཛུལ་བྱེད་པའི“དགུ་པའི་བཅོ་བརྒྱད”ཀྱི་དུས་འགྱུར་བསླངས་རྗེས་སླར་ཡང་རྒྱལ་ཁབ་ཕྱི་ནང་དུ་སྐད་གྲགས་ཁྱབ་པའི་ལུའུ་ཀོའུ་ཟམ་པའི་དུས་འགྱུར་རྐང་བཙུགས་ནས་བསླངས་པ་དང་ཆབས་ཅིག ཕྱོགས་ཡོངས་ནས་ཀྲུང་གོར་བཙན་འཛུལ་བྱེད་པའི་དམག་འཁྲུག་མངོན་སུམ་འཛེམ་མེད་ངང་བསླངས་ནས་ཀྲུང་གོ་ཡོངས་ཁྱུར་མིད་གཏོང་རྒྱུའི་རེ་ངན་བཅངས་ཡོད། ཀྲུང་ཧྭ་མི་རིགས་ལ་ཆགས་འཇིག་གི་ཉེན་ཁ་ཚབས་ཆེན་འཕྲད་པའི་འགག་རྩའི་དུས་སུ་ཀྲུང་གོ་གུང་ཁྲན་ཏང་གིས་མི་རིགས་ཀྱི་བདེན་དོན་ལ་བརྟེན་ནས་མི་རིགས་འཇིག་ཉེན་ལས་སྐྱོབ་པའི་ལོ་རྒྱུས་ཀྱི་འགན་འཁྲི་ལྕི་པོ་ཐེ་ཚོམ་སྤུ་ཙམ་ཡང་མེད་པར་ཕྲག་ཐོག་ཏུ་བླངས་ནས་ཆུ་གཞུང་གི་གཞོམ་མེད་བྲག་རི་ལྟ་བུའི་ནུས་པ་བཏོན་ཡོད་ཅེས་གསུངས་པ་རེད།

ལིའུ་ཡུན་ཧྲན་གྱིས་དུས་ཡུན་ལོ14ལ་དཀའ་སྤྱད་ཚད་མེད་བརྒྱུད་པའི་ཀྲུང་གོ་མི་དམངས་ཀྱི་རི་འགོག་དམག་འཁྲུག་ནི་མི་རིགས་རྨོངས་གཉིད་ལས་སད་པ་དང་མི་རིགས་མཐུན་སྒྲིལ་ལ་སྐུལ་མ་གཏོང་བའི་དམག་འཁྲུག་ཅིག་དང་། རྒྱལ་ཁབ་ཀྱི་གནས་བབ་དང་མི་རིགས་ཀྱི་ལས་དབང་ལ་འགྱུར་ལྡོག་གཏོང་བའི་དམག་འཁྲུག་ཅིག མིའི་རིགས་ཀྱི་དྲང་བདེན་དང་འཛམ་གླིང་ཞི་བདེ་སྲུང་སྐྱོང་བྱེད་པའི་དམག་འཁྲུག་ཅིག་རེད་ཅེས་ནན་གསུང་གནང་བ་རེད།