ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་བོད་ལྗོངས་ཉིང་ཁྲི་གྲོང་ཁྱེར་གྱི་དཔེ་མཛོད་ཁང་ནས་རྒྱུས་ལོན་བྱུང་བ་ལྟར་ན། བོད་ལྗོངས་ཀྱི་ཆུ་ཚོད24རིང་ལ་འཁོར་སྐྱོད་བྱེད་པའི་སྟབས་བདེ་དཔེ་མཛོད་ཁང་ཐོག་མ་དེ་ཉེ་ལམ་ཉིང་ཁྲི་གྲོང་ཁྱེར་གྱི་ན་གཞོན་བྱ་འགུལ་ལྟེ་གནས་སུ་དངོས་སུ་བེད་སྤྱོད་གཏོང་འགོ་ཚུགས། དེ་ལས་ཉིང་ཁྲི་གྲོང་ཁྱེར་གྱི་གྲོང་མི་རྣམས་ཀྱིས་དཔེ་ཆ་ལྟ་ཀློག་བྱེད་པར་སྟབས་བདེ་ཆེན་པོ་བསྐྲུན་ཡོད་པ་རེད།
ཉིང་ཁྲི་གྲོང་ཁྱེར་དཔེ་མཛོད་ཁང་གི་འགན་འཁུར་མི་སྣས་ངོ་སྤྲོད་བྱས་པ་ལྟར་ན། སྟབས་བདེ་དཔེ་མཛོད་ཁང་འདིར་བསྡོམས་པས་མ་དངུལ་སྒོར་ཁྲི67བཏང་ཡོད་ཅིང་། ཐེངས་གཅིག་ལ་དཔེ་དེབ500ཉེར་ཚགས་བྱེད་ཐུབ་པ་དང་། ཀློག་པ་པས་དཔེ་ཆ་གཡར་བའི་རིགས་དང་གྲངས་ཀ་ལྟར་ལེགས་སྒྲིག་བྱས་ཆོག་ཟེར།
དཔེ་མཛོད་ཁང་གི་དཔེ་དེབ་དུས་ལྟར་གསར་སྒྱུར་བྱེད་བཞིན་ཡོད་པ་དང་། ཀློག་པ་པོས་བསམ་འཆར་འདོན་སའང་ཡོད་དེ། ཀློག་པ་པོ་མི་འདྲ་བའི་དགོས་མཁོ་ལྟར་ཞབས་ཞུ་སྒྲུབ་ཆོག འཆར་གཞི་ལྟར་ན་ཆུ་ཚོད24རིང་ལ་འཁོར་སྐྱོད་བྱེད་པའི་སྟབས་བདེ་དཔེ་མཛོད་ཁང་གིས་ལོ་ཧྲིལ་བོ་དང་ཉིན་གང་བོར་དཔེ་ཆ་གཡོར་བའི་དམིགས་འབེན་མངོན་འགྱུར་བྱེད་རྒྱུ་རེད།
ཉེ་བའི་ལོ་འགའི་རིང་ལ། བོད་ལྗོངས་ཀྱི་རིག་གནས་སྡེ་ཁག་གིས་དཔེ་མཛོད་ཁང་གི་འཛུགས་སྐྲུན་བྱ་བར་ཤུགས་བསྣན་ཏེ། རྒྱ་ཆེའི་གྲོང་མི་རྣམས་ལ་རིག་གནས་ཞབས་ཞུ་སྤུས་ལེགས་མཁོ་འདོན་བྱེད་པར་འབད་བརྩོན་བྱས་ཏེ། དཔེ་མཛོད་ཁང་རེ་རེའི་དཔེ་དེབ་གསར་སྒྱུར་བྱེད་པ་ལས་གཞན། དུས་རྒྱུན་དུ་ཆེད་མཁས་པ་དང་རིག་གནས་བ་གདན་དྲངས་ནས་འཆད་ཁྲིད་བྱ་འགུལ་སྤེལ་བ་བརྒྱུད་དེ། ཀློག་པ་པོར་མཐུན་རྐྱེན་མང་པོ་བསྐྲུན་པ་རེད།  །