དུས་ཡུན་ཉིན་གསུམ་རིང་ལ་ཚོགས་པའི་ཉིས་སྟོང་བཅོ་ལྔ་ལོའི་མཚོ་སྔོན་ཐོན་རྫས་གྲགས་ཅན་ཝུའུ་ཧན་གྲོང་ཁྱེར་ནས་འགྲེམ་སྟོན་དང་མཚམས་སྦྱོར་བྱས་པའི་ཚོགས་འདུ་ཟླ་ལྔ་བའི་ཚེས་སོ་གཅིག་ཉིན་བདེ་བླག་ངང་མཇུག་རྫོགས།
སྐབས་སྔོན་མའི་མཚམས་སྦྱོར་ཚོགས་འདུ་དང་བསྡུར་ན། སྐབས་འདིའི་མཚམས་སྦྱོར་ཚོགས་འདུའི་ནང་དོན་སྔར་ལས་ཕུན་སུམ་ཚོགས་ཤིང་། ཕན་འབྲས་སྔར་ལས་མངོན་གསལ་ཡིན་པས། གཞི་ཁྱོན་དང་ནང་དོན། ཕན་འབྲས་དང་ཤན་ཤུགས་བཅས་ཀྱི་ཐད་ནས་སྔོན་ཆད་དང་མི་འདྲ་བར་གྲུབ་འབྲས་གསར་བ་བྱུང་། སྐབས་དེར་མཚོ་སྔོན་གྱི་ཁེ་ལས་གྲགས་ཅན་ཉིས་བརྒྱ་དང་བདུན་གྱི་ཚོང་རྫས་སྣ་ཁ་སྟོང་གཉིས་དང་བཞི་བརྒྱ་བཙོངས་ནས་སྒོར་མོ་ས་ཡ་དྲུག་དང་འབུམ་དྲུག་ཁྲི་གཉིས་སུ་བསླེབས་པ་དང་། གཅིག་བསྡུས་ཀྱི་ཚོང་ལས་ཉོ་ཚོང་མིང་འགོད་དང་། མཚོ་སྔོན་ཞིང་ཆེན་དང་ཧུའུ་པེ་ཞིང་ཆེན་གཉིས་ཀྱི་ཚོང་བའི་འབྲེལ་མཐུད་ཚོང་གཏམ་དང་། ཁེ་ལས་གྲགས་ཅན་བར་ལྟ་སྦྱོང་བརྗེ་རེས། གནས་སྐོར་ཐོན་རྫས་མཚམས་སྦྱོར་སོགས་ཆེད་དོན་བྱ་འགུལ་རབ་དང་རིམ་པ་བསྡུས་ནས། ལས་རིགས་སོ་སོའི་མི་སྣས་ཡོངས་ཁྱབ་ཀྱི་དོ་སྣང་ཆེན་པོ་བྱས་ཤིང་། མི་ཕལ་ཆེན་འབུམ་གཅིག་དང་ཁྲི་གཅིག་མཚམས་སྦྱོར་ཚོགས་འདུའི་འགྲེམ་སྟོན་ལ་བལྟས།
བསྡོམས་རྩིས་རག་ཙམ་བྱས་པ་ལྟར་ན། མཚམས་སྦྱོར་ཚོགས་འདུར་ཡོང་བའི་ཧུའུ་པེ་དང་ཧྲང་ཧེ། ཧྥུའུ་ཅན། ཀྲེ་ཅང་། ཨན་ཧོས་སོགས་ཞིང་ཆེན་དང་གྲོང་ཁྱེར་བཅོ་བརྒྱད་ཀྱི་ཚོང་བ་སྟོང་གཉིས་དང་བདུན་བརྒྱ་ལྷག་ཏུ་བསླེབས།