ཟླ་ལྔ་བའི་ཚེས་གསུམ་ཉིན། རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་པེ་ཅིན་མི་དམངས་ཚོགས་ཁང་ཆེན་མོའི་ནང་ཀྲུང་གོར་དངོས་གཞིའི་འཚམས་འདྲིར་ཡོང་བའི་ཏེན་མག་གི་དབུ་བཞུགས་བློན་ཆེན་ལ་སི་མུའུ་སིན་དང་གྲོས་མོལ་མཛད། གྲོས་མོལ་མ་བྱས་གོང་། ལིས་ཁི་ཆང་གིས་པེ་ཅིན་མི་དམངས་ཚོགས་ཁང་ཆེན་མོའི་ཤར་སྒོ་ཕྱི་རོལ་ཐང་ཆེན་ནས་ལ་སི་མུའུ་སིན་ལ་དགའ་བསུ་ཞུ་བའི་མཛད་སྒོ་བསྡུས།

ཞིན་ཧྭ་གསར་འགྱུར་ཁང་གི་གློག་འཕྲིན་ལྟར།  རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་གསུམ་ཉིན་གྱི་ཕྱི་དྲོར་པེ་ཅིན་མི་དམངས་ཚོགས་ཁང་ཆེན་མོའི་ནང་ཀྲུང་གོར་དངོས་གཞིའི་འཚམས་འདྲིར་ཡོང་བའི་ཏེན་མག་གི་དབུ་བཞུགས་བློན་ཆེན་ལ་སི་མུའུ་སིན་དང་གྲོས་མོལ་མཛད།

ལིས་ཁི་ཆང་གིས་གསུངས་རྒྱུར། ཏེན་མག་ནི་ཀྲུང་གོ་གསར་བ་དང་འབྲེལ་བ་བཙུགས་པ་ཆེས་སྔ་བའི་ནུབ་ཕྱོགས་རྒྱལ་ཁབ་ནང་གི་གཅིག་ཡིན་ལ། དུས་ཡུན་རིང་བོར་ཀྲུང་གོ་གཅིག་གི་སྲིད་ཇུས་ལག་བསྟར་བྱས། རྒྱལ་ཁབ་གཉིས་ཀྱི་འབྲེལ་བའི་རྨང་གཞི་བརྟན་ལ། འཕེལ་རྒྱས་ཀྱི་གནས་བབ་ཧ་ཅང་བཟང་ཞིང་། དམངས་ཁྲོད་མཛའ་མཐུན་རྒྱུན་ཆད་མེད་པར་གཏིང་ཟབ་ཏུ་སྤེལ། ཀྲུང་གོ་ཕྱོགས་ཀྱིས་རྒྱལ་ཁབ་གཉིས་བར་ཁྱོན་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་བཙུགས་ནས་ལོ་འཁོར་བཅུ་ལོན་པ་དང་བསྟུན་ནས། ཕན་ཚུན་བར་གྱི་ཡིད་ཆེས་ཇེ་བརྟན་དུ་གཏོང་བ་དང་། མཉམ་ལས་གཏིང་ཟབ་ཏུ་སྤེལ་བ། བརྗེ་རེས་རྒྱ་བསྐྱེད་དེ། ཀྲུང་གོ་དང་ཏེན་མག་གཉིས་ཀྱི་འབྲེལ་བ་དང་མཉམ་ལས་ལ་འཕེལ་རྒྱས་སྔར་ལས་ཆེན་པོ་འབྱུང་བར་སྐུལ་འདེད་གཏོང་འདོད་ཡོད་ཟེར། 

ལིས་ཁི་ཆང་གིས་ནན་གྱིས་གསུངས་རྒྱུར། ཀྲུང་གོ་ཕྱོགས་ཀྱིས་ཏེན་མག་གི་ཀྲུང་གོ་དང་ཡོ་རོབ་གླིང་མནའ་འབྲེལ་དང་། ཀྲུང་གོ་དང་ཡོ་རོབ་གླིང་བྱང་ཕྱོགས་རྒྱལ་ཁབ་བར་གྱི་འབྲེལ་བ་དང་མཉམ་ལས་འཕེལ་རྒྱས་སུ་གཏོང་བའི་ཁྲོད་ཀྱི་ནུས་པ་གལ་ཆེན་ལ་ཧ་ཅང་མཐོང་ཆེན་བྱེད་ཀྱིན་ཡོད་ལ། ཏེན་མག་ཕྱོགས་དང་ཁུལ་ཁོངས་དང་ཁུལ་ཁོངས་ཕལ་བའི་ལས་དོན་དང་རྒྱལ་སྤྱི་དང་ས་ཁུལ་གྱི་གནད་དོན་སོགས་ཐད་ཀྱི་འབྲེལ་འདྲིས་དང་མཐུན་སྦྱོར་ལ་ཤུགས་བསྣན་ཏེ། ཕྱོགས་གཉིས་ཀྱི་གཉིས་ཕན་དངོས་གཉེར་མཉམ་ལས་ལ་སྐུལ་འདེད་གཏོང་བ་དང་། ཉོ་ཚོང་དང་དངུལ་གཏོང་རང་དབང་ཅན་དང་སྟབས་བདེ་ཅན་དུ་སྒྱུར་བར་སྐུལ་འདེད་གཏོང་བ། ཞི་བདེ་དང་བརྟན་འཇགས་ལ་སྲུང་སྐྱོབ་བྱེད་པ། འཕེལ་རྒྱས་དང་དར་རྒྱས་ལ་སྐུལ་འདེད་གཏོང་འདོད་ཡོད་ཟེར།

ལ་སི་མུའུ་སིན་གྱིས་བཤད་རྒྱུར། ཏེན་མག་དང་ཀྲུང་གོ་གཉིས་ཀྱི་ཁྱོན་ཡོངས་ཀྱི་འཐབ་ཇུས་གྲོགས་པོའི་འབྲེལ་བ་འཕེལ་རྒྱས་སུ་གཏོང་བ་ནི་ཏེན་མག་གི་ཕྱི་འབྲེལ་གཙོ་བོ་ཡིན། ཏེན་མག་ཕྱོགས་ཀྱིས་རྒྱལ་ཁབ་གཉིས་བར་ཁྱོན་ཡོངས་ཀྱི་འཐབ་ཇུས་མཉམ་ལས་གྲོགས་པོའི་འབྲེལ་བ་བཙུགས་ནས་ལོ་འཁོར་བཅུ་ལོན་པའི་གོ་སྐབས་གསར་བ་དང་བསྟུན་ནས། 2017ལོ་ནས་2020ལོའི་བར་གྱི་ཏེན་མག་དང་ཀྲུང་གོའི་མཉམ་འབྲེལ་བྱ་བའི་ཇུས་གཞི་ལག་བསྟར་བཟང་བོ་བྱས་ནས། ཏེན་མག་དང་ཀྲུང་གོའི་གནས་སྐོར་ལོ་བཟང་བོར་སྒྲུབ་པ་དང་། ཚན་རྩལ་གསར་གཏོད་དང་ནུས་ཁུངས་གྲོན་ཆུང་། ཁོར་ཡུག་སྲུང་སྐྱོབ། ཆ་འཕྲིན་དང་འཕྲིན་གཏོང་། ཞིང་ལས། ཉ་ལས། ཟས་རིགས་བདེ་འཇགས། སྨན་རྫས་འཕྲོད་བསྟེན། གནས་སྐོར། ས་ཁུལ་སོགས་ཁྱབ་ཁོངས་སོ་སོའི་དངོས་གཉེར་མཉམ་ལས་གཏིང་ཟབ་ཏུ་སྤེལ་འདོད་ཡོད་ཟེར།

གྲོས་མོལ་མ་བྱས་གོང་། ལིས་ཁི་ཆང་གིས་པེ་ཅིན་མི་དམངས་ཚོགས་ཁང་ཆེན་མོའི་ཤར་སྒོ་ཕྱི་རོལ་ཐང་ཆེན་ནས་ལ་སི་མུའུ་སིན་ལ་དགའ་བསུ་ཞུ་བའི་མཛད་སྒོ་བསྡུས། རྒྱལ་ཡོངས་སྲིད་གྲོས་ཀྱི་ཀྲུའུ་ཞི་གཞོན་པ་མཱ་ཕེས་ཧྭ་སོགས་མཛད་སྒོར་ཞུགས།

གྲོས་མོལ་བྱས་རྗེས། རྒྱལ་ཁབ་གཉིས་ཀྱི་སྲིད་གཞུང་གིས་2017ལོ་ནས་2020ལོའི་བར་གྱི་ཀྲུང་གོ་དང་ཏེན་མག་གཉིས་ཀྱི་མཉམ་འབྲེལ་བྱ་བའི་ཇུས་གཞི་བཀོད། ལིས་ཁི་ཆང་དང་ལ་སི་མུའུ་སིན་གཉིས་ཀྲུང་གོ་དང་ཏེན་མག་གཉིས་ཀྱི་མི་གཞུང་བརྗེ་རེས་དང་ཟས་རིགས་སྨན་རྫས། སྲོག་ཆགས་སྲུང་སྐྱོབ་སོགས་ཁྱབ་ཁོངས་ཀྱི་མཉམ་ལས་ཡིག་ཆ་མང་པོ་འགོད་པའི་ཁྲོད་ཞུགས།