ཟླ་བ5པའི་ཚེས21ཉིན་ཁུལ་ཨུའི་ཧྲུའུ་ཅི་ཧུའུ་ཁྲུང་ཧྲེང་ཉག་རོང་རྫོང་དུ་ཕེབས་ནས་ཁག་བགོས་ནས་རྫོང་རིམ་པའི་འགོ་ཁྲིད་ལས་བྱེད་མི་སྣ་དང་ཁོ་རིམ་པའི་ལས་བྱེད་མི་སྣ་དང་བཞུགས་མོལ་གནང་ཞིང་ཉག་རོང་རྫོང་གི་དཔལ་འབྱོར་འཕེལ་རྒྱས་ཀྱི་ལམ་བུ་དང་མི་དམངས་འཚོ་བ་ཇེ་བཟང་དུ་གཏོང་བའི་ཐབས་ལམ། ཡུན་རིང་འཆམ་མཐུན་ཡོང་རྒྱུའི་སྐོར་བསམ་འཆར་བརྗེ་རེས་དང་གྲོས་མོལ་མཛད་པ་རེད།

　ཁུལ་ཨུའི་ཧྲུའུ་ཅི་གཞོན་པ། སྲིད་ཁྲིམས་ཨུ་ལྷན་གྱི་ཧྲུའུ་ཅི་བྱང་ཆུབ་ཀྱིས་ཚོགས་འདུའི་གཙོ་འགན་གནང་བ་རེད།

　ཁུལ་ཨུའི་རྒྱུན་ཨུ། ཁུལ་སྲིད་གཞུང་གི་ཁུལ་དཔོན་གཞོན་པ་ཀྲང་ཧའོ་དང་ཁུལ་ཨུའི་རྒྱུན་ཨུ། ཁུལ་ཨུའི་རྩ་འཛུགས་པུའུ་ཡི་པུའུ་ཀྲང་ཀྲའོ་པའོ་ཚོགས་འདུར་ཞུགས།

　ཧུའུ་ཁྲང་ཧྲེང་གིས་ནན་གསུང་གནང་དོན། ཐོན་ལས་ཀྱིས་རྫོང་དར་རྒྱས་གཏོང་བའི་ལམ་བུ་དང་མཐུན་སྦྱོར་འཕེལ་རྒྱས་ཀྱི་ལམ་བུ།གསར་གཏོད་ཀྱི་སྐུལ་འདེད་གཏོང་བའི་ལམ་བུ། གྲོང་ཁྱེར་དང་གྲོང་གསེབ་གཅིག་གྱུར་འཆར་འགོད་ཀྱི་ལམ་བུ་བཅས་ཀྱི་ལམ་བུའི་ཐོག་སྐྱོད་པ་རྒྱུན་འཁྱོངས་བྱས་ནས་ནུས་ཤུགས་བཏོན་ཏེ་ཉག་རོང་རྫོང་དེ་ས་ཁུལ་གཅིག་དང་ས་གནས་གཅིག རྫོང་གཅིག་སྐྲུན་དགོས་པ་དཔེར་ན།ཉག་ཆུ་འབབ་རྒྱུད་ཀྱི་སྐྱེ་ཁམས་དཔལ་འབྱོར་ལྟེ་གནས་ས་ཁུལ་དང་། རྡོ་བརྩིགས་བོད་ཁང་། ཉག་ཆུའི་མཛེས་པའི་ཡུལ་ལྗོངས། ཁམས་པའི་སྐྲ་འཕན་དམར་པོའི་གདོད་མའི་ལྗོངས་རྒྱུ་དམིགས་ཡུལ་ས་གནས་དང་། འཆམ་མཐུན་བདེ་འཇགས་ཀྱི་དཔེ་སྟོན་རྫོང་འཛུགས་སྐྱོང་བྱ་རྒྱུར་ཤུགས་བརྒྱག་དགོས། ཉག་རོང་རྫོང་གི་དཔལ་དབྱོར་འཕེལ་རྒྱས་དང་སྤྱི་ཚོགས་ཡར་ཐོན་ཡོང་བར་མགྱོགས་མྱུར་དུ་སྐུལ་འདེད་བཏང་ནས་དཀར་མཛེས་ཁུལ་གྱི་བྱང་རྒྱུད་ས་ཁུལ་དེ་དཔལ་འབྱོར་དམའ་རིམ་ནས་གཏོར་བརྒལ་ཡོང་ཐབས་བྱེད་པའི་ཁྲོད་དུ་སྔོན་དུ་དར་རྒྱས་ཡོང་བ་བྱ་དགོས།

　　ཧུའུ་ཁྲང་ཧྲེང་གིས་རྫོང་ཡོངས་ཀྱི་ལས་བྱེད་པས་ཡང་དག་པའི་སྒོ་ནས་རྫོང་གི་གནས་ཚུལ་དངོས་ཁོང་དུ་ཆུད་དགོས་པ་དང་། དཔལ་འབྱོར་འཕེལ་རྒྱས་ཀྱི་ལེགས་ཆ་དང་ཞན་ཆར་ངོས་འཛིན་གསལ་པོ་བྱས་ནས་ཉག་རོང་རྫོང་རང་ཡུལ་གྱི་གནས་ཚུལ་དངོས་དང་མཐུན་པའི་འཕེལ་རྒྱས་བགྲོད་ལམ་ཞིག་འཚོལ་ཞིབ་བྱ་དགོས།ས་ཁུལ་གཅིག་དང་ས་གནས་གཅིག རྫོང་གཅིག་གི་འཕེལ་རྒྱས་ཀྱི་གནས་བབ་ལ་དམིགས་ནས་འགྲིམ་འགྲུལ་ལམ་དྲྭ་དང་གློག་ཤུགས་དྲ་བ། འཕྲིན་སྐྱེལ་དྲ་བ་དང་དཔེ་སྟོན་གྲོང་ཚོ་གསར་བར་མགྱོགས་སུ་འཛུགས་སྐྲུན་བྱེད་པ་དང་། ཞིང་ལས་ཀྱི་རྨང་གཞི་སྲ་བརྟན་དང་ སྐྱེ་ཁམས་ཀྱིས་རྫོང་འཛུགས་སྐྱོང་།གློག་ཤུགས་ཀྱིས་རྫོང་སྟོབས་ལྡན།ལྗོངས་རྒྱུས་མི་དམངས་ཕྱུག་པོ་བཅས་ཡོང་བར་སྐུལ་འདེད་ཧུར་ཐག་བྱ་དགོས།ཤུགས་ཆེན་པོས་གྲོང་རྙིང་ལེགས་བཟོ་དང་གྲོང་གསར་གསར་སྦོལ་དང་འདུས་སྡོད་གྲོང་རྡལ་བཟོ་སྐྲུན་ལག་བསྟར་བྱ་དགོས། སློབ་གསོ་དང་སྨན་བཅོས། སྤྱི་ཚོགས་འགན་སྲུང་།རིག་གནས་སོགས་དམངས་འཚོའི་ལས་དོན་ཐད་ལ་ནུས་ཤུས་ཡོད་དགུ་བཏོན་ཏེ་སྐུལ་འདེད་བཏང་ནས2020ལོར་ཉག་རོང་གི་ས་ཁུལ་ཐོན་སྐྱེད་རིན་ཐང་བསྡོམས་སྒོར་དུང་ཕྱུར23ལ་ཟིན་པ་དང་། ས་གནས་ནོར་སྲིད་ཀྱི་སྔོན་རྩིས་ཡོང་འབབ་སྒོར་དུང་ཕྱུར1.3ལ་ཟིན་པ། གྲོང་ཁྱེར་དང་གྲོང་རྡལ་ཡུལ་མིའི་ཆ་སྙོམས་མི་རེའི་ལག་ཐོག་ཏུ་བཀོལ་སྤྱོད་ཆོག་པའི་ཡོང་འབབ་སྒོར་ཁྲི4.3ལ་ཟིན་པ།ཞིང་འབྲོག་མི་དམངས་ཆ་སྙོམས་མི་རེའི་ཡོང་འབབ་ཁེ་གཙང་སྒོར་ཁྲི2.2ལ་ཟིན་པ་བཅས་ལ་བརྩོན་ལེན་བྱ་དགོས། རྨང་གཞི་སྒྲིག་ཆས་སྔར་ལས་འཐུས་སྒོ་ཚང་བ་དང་། ཐོན་ལས་གསུམ་སྔར་ལས་ལུགས་མཐུན། སྐྱེ་ཁམས་ཁོར་ཡུག་རིམ་བཞིན་ལེགས་བཅོས་བྱུང་བ།སྤྱི་ཚོགས་དང་དཔལ་འབྱོར་མཐུན་འགྲིག་ངང་གོང་དུ་འཕེལ་བ། དམངས་འཚོ་ཁེ་ཕན་མུ་མཐུད་ནས་ཇེ་མང་ཐོབ་པ་བྱས་ཏེ་རྒྱལ་ཡོངས་དང་དུས་མཉམ་དུ་ལྟོ་གོས་འཛོམས་པའི་རྣམ་པ་མངོན་གྱུར་ཡོང་གང་ཐུབ་བྱ་དགོས་ཞེས་ཐུགས་རེ་གནང་བ་རེད།།