ཟླ་བ5པའི་ཚེས16ཉིན་གྱི་སྔ་དྲོར། ཁུལ་ཨུའི་ཧྲུའུ་ཅི་གཞོན་པ། ཁུལ་དཔོན་ཡེ་ཤེས་ཟླ་བས་རང་ཁུལ་གྱི་ཏང་སྲིད་རྟོག་ཞིབ་ཚོགས་པ་སྣེ་ཁྲིད་མཛད་དེ། རང་ཁུལ་གྱི་སེར་ཤུལ་དང་སྡེ་དགེ དཀར་མཛེས་རྫོང་ལ་ཁ་གཏད་རོགས་སྐྱོར་བྱེད་མཁན་ཧྲེང་ཀྲེན་ལ་ཕྱིན་ནས་ཁ་གཏད་རོགས་ཀྱི་འབྲེལ་མཐུད་ལས་དོན་སྤེལ། ཀོང་ཏུང་ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཧྲེང་ཀྲེན་གྲོང་ཁྱེར་ཏང་ཨུའི་ཧྲུའུ་ཅི་མར་ཞིན་རུན་དང་ཧྲི་ཀྲང་ཞུས་ཆིན་རྣམ་པ་གཉིས་ཀྱིས་རྟོག་ཞིབ་ཚོགས་པར་མཇལ་འཕྲད་གནང་བ་རེད། ཕྱོགས་གཉིས་ཀས་བསྟན་དོན། ཀྲུང་དབྱང་དང་ཞིང་ཆེན་གཉིས་ཀྱི་འཐབ་ཇུས་བཀོད་སྒྲིག་ལྟར། སྔར་ལས་ལྷག་པར་ཕྱོགས་གཉིས་ཀྱིས་ཕན་ཚུན་བརྗེ་རེས་དང་རོགས་སྐྱོར་མཉམ་ལས་ལ་ཤུགས་སྣོན་བརྒྱབ་སྟེ་ དངོས་སྒྲུབ་དང་རྒྱུན་ཆད་མེད་པར་ཁ་གཏད་རོགས་སྐྱོར་གྱི་ལས་ཀའི་རྣམ་པ་གསར་པ་ཞིག་བསྐྲུན་དགོས་པའི་བསམ་ཚུལ་བཏོན་པ་རེད།

　མཇལ་འཕྲད་གནང་སྐབས་མར་ཞིན་རེན་གྱིས་ཡེ་ཤེས་ཟླ་བ་ལྷན་ཕེབས་ཧྲེང་ཀྲེན་ལ་ཕེབས་པར་དགའ་བསུ་ཞུ་རྗེས། ཁ་གཏད་རོགས་སྐྱོར་ལས་དོན་དེ་དོན་འཁྱོལ་མཐར་ཕྱིན་ཡོང་རྒྱུའི་ཐུགས་རེ་གནང་། ཁོང་གིས་སློབ་གསོ་སོགས་ཡུལ་དེ་གའི་མང་ཚོགས་ཀྱི་རྨང་གཞིའི་དམངས་འཚོ་གནད་དོན་ཐག་གཅོད་བྱ་དགོས་པ་དང་ཡུལ་དེའི་དགོས་མཁོ་ལ་དམིགས་ནས་ཁྱད་ཆོས་ལྡན་པའི་ཐོན་ལས་འཕེལ་རྒྱས་གཏོང་བ་དང་མགྱོགས་མྱུར་དུ་ཕན་ཡུན་རིང་བའི་ལམ་ལུགས་ལེགས་བཟོ་བྱས་ནས་ཧུར་ཐག་གིས་ཁ་གཏད་རོགས་སྐྱོར་ལས་དོན་མཐའ་དག་ལེགས་པོ་བསྒྲུབ་དགོས་ཚུལ་དགོངས་འཆར་བཏོན་པ་རེད།

　ཡེ་ཤེས་ཟླ་བས་རང་ཁུལ་གྱི་སྤྱི་ཚོགས་དང་དཔལ་འབྱོར་གྱི་འཕེལ་རྒྱས་ཐད་ཀྱི་གནས་ཚུལ་དངོས་ངོ་སྤྲོད་མཛད་པར་མ་ཟད། ཧྲེང་ཀྲེན་གྲོང་ཁྱེར་གྱིས་རང་ཁུལ་ལ་ཁ་གཏད་རོགས་སྐྱོར་བྱས་པར་ཐུགས་རྗེ་ཆེ་ཞུས།

　ཧྲེང་ཀྲེན་ཡོད་པའི་སྐབས་སུ། རྟོག་ཞིབ་ཚོགས་པས་དྲི་མེད་དྭངས་གཙང་གི་དཀར་མཛེས་ཁུལ་ཞེས་པའི་གངས་ལྗོངས་ཀྱི་ལག་བཟོས་བརྗོད་བྱ་གཙོ་བོ་བྱས་པའི་དཀར་མཛེས་ཁུལ་གྱི་དངོས་མིན་ཤུལ་བཞག་རིག་གནས་ཀྱི་དངོས་མང་བཤམས་སྟོན་ཁང་གི་མཛད་སྒོ་ལ་ཞུགས་པ་རེད།