ཞིན་ཧྭ་གསར་འགྱུར་ཁང་པེ་ཅིན་ནས་འབྱོར་བའི་གཏམ་གསར།  རྒྱལ་ཁབ་འཕྲོད་བསྟེན་དང་འཆར་ལྡན་བུ་བཙའ་ཨུ་ལྷན་གྱིས《བཟའ་བཅའི་བདེ་འཇགས་ཚད་གཞི་དང་ལྟ་དཔྱད་ཚད་ལེན་ཚོད་སྐོར་གྱི་ལོ་ལྔའི་འཆར་གཞི་བཅུ་གསུམ་པའི་འཆར་འགོད（2016ལོ་ནས་2020ལོ་བར）》བཀྲམ་སྟེ་ལོ་ལྔའི་འཆར་གཞི་བཅུ་གསུམ་པའི་རིང་བཟའ་བཅའི་བདེ་འཇགས་ཚད་གཞི་དང་ལྟ་དཔྱད་ཚད་ལེན་ཚོད་སྐོར་གྱི་ལས་ཀའི་མ་ལག་སྔར་བས་འཐུས་སྒོ་ཚང་དུ་བཏང་ནས་བཟའ་བཅའི་བདེ་འཇགས་ཀྱི་རྒྱལ་ཁབ་ཚད་གཞི་ཁག300གཏན་འབེབས་དང་བཟོ་བཅོས་རྒྱག་རྒྱུ་ཡིན་ལུགས་བཏོན་ཡོད།

བཟའ་བཅའི་བདེ་འཇགས་ཚད་གཞི་དང་ལྟ་དཔྱད་ཚད་ལེན་ཚོད་སྐོར་གྱི་ལོ་ལྔའི་འཆར་གཞི་བཅུ་གསུམ་པའི་འཆར་འགོད་ཡོངས་བསྒྲགས་བྱས་པ།

འཆར་འགོད་ནང་ཁ་གསལ་བཏོན་དོན། བཟའ་བཅའི་བདེ་འཇགས་ཀྱི་ཉེན་ཁ་ཚོད་སྐོར་ལས་དོན་ལ་ཁྱོན་ཡོངས་ནས་སྐུལ་མ་གཏང་རྒྱུ། ཅུང་འཐུས་སྒོ་ཚང་བའི་ཉེན་ཁ་ཚོད་སྐོར་དོ་དམ་ཚད་ལྡན་དང་ལག་རྩལ་ཕྱོགས་སྟོན་མ་ལག་ཅིག་ཆགས་པ་བྱ་རྒྱུ། རྒྱལ་ཡོངས་ཀྱི་ཡོངས་ཁྱབ་བཟའ་བཅའ་ཞིབ་འཇུག་ཐེངས་དྲུག་པ་ལེགས་སྒྲུབ་བྱས་ཏེ་བཟའ་བཅའ་རིགས་ཆེ་གྲས24ལ་ཁྱབ་པའི་ཟད་གྲོན་བྱེད་འབོར་དང་དུག་གནོད་གནས་ལུགས་རིག་པའི་གྲངས་གཞིའི་མཛོད་བསྐྲུན་རྒྱུ།  བཟའ་བཅའི་གནོད་ཡོད་གཞི་རྒྱུ25ཡི་ཉེན་ཁ་ཚོད་སྐོར་ལེགས་སྒྲུབ་བྱས་ཏེ་དུས་བཀག་ནང་བཟའ་བཅའི་བདེ་འཇགས་མཚམས་བཅད་ཚད་གཞིའི་ནང་གི་གཙོ་གནད་དངོས་པོར་བསྐྱར་དུ་ཚོད་སྐོར་བྱ་རྒྱུ། བཟའ་བཅའི་བདེ་འཇགས་ཀྱི་ཉེན་ཁ་ལྟ་དཔྱད་ཚད་ལེན་ཐད། འཆར་འགོད་ནང་བཏོན་དོན། བཟའ་བཅའི་བདེ་འཇགས་ཀྱི་ཉེན་ཁ་ལྟ་དཔྱད་ཚད་ལེན་བྱེད་ནུས་སྔར་བས་ཆེ་རུ་གཏང་རྒྱུ། ཉེན་ཁ་ལྟ་དཔྱད་ཚད་ལེན་བྱེད་པའི་ནང་རྫོང་རིམ་པའི་སྲིད་འཛིན་ས་ཁོངས་ཚང་མ་ཚུད་པ་མ་ཟད་ཤང་གྲོང་གྲོང་གསེབ་ཏུའང་བྱ་རྒྱུ་ཡིན་པ་དང་། ཞིང་ཆེན་དང་། ས་ཁུལ་དང་གྲོང་ཁྱེར། རྫོང་བཅས་ཀྱི་རིམ་པའི་ནད་ཡམས་སྔོན་འགོག་ཚོད་འཛིན་སྒྲིག་གཞིར་དེ་མཚུངས་ཀྱི་ལྟ་དཔྱད་ཚད་ལེན་ནུས་པ་འཛུགས་སྐྱོང་གི་ཚད་གཞིའི་བླང་བྱ་ལོན་པ་བྱ་རྒྱུ།

དབུས་ནུབ་རྒྱུད་ཀྱི་ས་ཁུལ་དང་ལྷག་དོན་དུ་ས་ཁུལ་དབུལ་པོའི་ལྟ་དཔྱད་ཚད་ལེན་དཔུང་ཁག་སྟོབས་ཆེར་བཏང་ནས་ལྟ་དཔྱད་ཚད་ལེན་བྱེད་ནུས་མངོན་གསལ་དོད་པོས་ཆེ་རུ་གཏང་རྒྱུ།