རྒྱལ་སྲིད་སྤྱི་ཁྱབ་ཁང་གི་ཙུང་ལི་ལིས་ཁི་ཆང་གིས་ཚེས་དྲུག་ཉིན་མགོ་འཛིན་མཛད་དེ་རྒྱལ་སྲིད་སྤྱི་ཁྱབ་ཁང་གི་རྒྱུན་ལས་གྲོས་ཚོགས་བསྡུས་ཏེ། སྲིད་བསྡུ་དབང་གཏོང་བྱེད་པ་དང་སྲིད་འཛིན་ཆོག་འཐུས་མ་ཡིན་པའི་ཞིབ་བཤེར་ཆོག་མཆན་གྱི་རིགས་མེད་པར་བཏང་ནས་བཅོས་སྒྱུར་ཟབ་སྤེལ་བྱེད་དགོས་པ་གཏན་ལ་ཕབ་པ་དང་། རྒྱལ་སྤྱིའི་ཐོན་ནུས་དང་སྒྲིག་ཆས་བཟོ་སྐྲུན་མཉམ་ལས་ལ་སྐུལ་འདེད་བཏང་ནས། སྒོ་རྒྱ་བསྐྱེད་པ་དང་འཕེལ་རྒྱས་ཀྱི་རིམ་པ་འཕར་བར་བཀོད་སྒྲིག་བྱས་ཤིང་། ཚོང་ལས་བདེ་ཐང་ཉེན་ཚབ་ཉོ་བར་མི་སྒེར་གྱིས་སྤྲོད་པའི་ཁྲལ་དངུལ་གཟིགས་སྐྱོང་ཚོད་ལྟ་བྱས་ནས་ཐོན་ཁུངས་སྔར་ལས་མང་པོ་བེད་སྤྱད་དེ་དམངས་ཚིས་ལ་འགན་སྲུང་བཟང་བོ་བྱེད་རྒྱུའི་ཐག་བཅད།

ཚོགས་ཐོག་ནས་བསྟན་དོན། ད་ལོར་མུ་མཐུད་དུ་སྲིད་བསྡུ་དབང་གཏོང་བྱེད་པ་དང་དབང་གཏོང་དང་དོ་དམ་ཟུང་འབྲེལ་བྱེད་པར་སྐུལ་འདེད་གཏོང་བ་དང་། སྲིད་གཞུང་གི་འགན་ནུས་མྱུར་དུ་བསྒྱུར་ནས་གསར་སྐྲུན་འཕེལ་རྒྱས་ཀྱི་བཀག་རྒྱ་དང་ལས་སྤེལ་གྱི་ཤུགས་རྐྱེན། ཚོང་རའི་ལྟ་རྟོག་དོ་དམ་གྱི་ཞན་ཆ་བཅས་སེལ་ནས་ལས་སྤེལ་དང་གསར་སྐྲུན་ལ་བཀག་སེལ་ཞབས་ཕྱི་བསྒྲུབ་དགོས་ཟེར།

ཚོགས་ཐོག་ནས་ཁྲིམས་ལྟར་སྲིད་འཛིན་གྱི་རེ་བ་ལྟར། ན་ནིང་སྲིད་འཛིན་ཆོག་འཐུས་མ་ཡིན་པའི་ཞིབ་བཤེར་ཆོག་མཆན་ལས་གཞི་གང་མང་ཇེ་ཉུང་དུ་བཏང་བའི་རྨང་གཞིའི་སྟེང་ཞིབ་བཤེར་ཆོག་མཆན་གྱི་རིགས་དེ་དག་རྩ་བ་ནས་མེད་པར་གཏོང་རྒྱུ་ཐག་བཅད།

ཚོགས་ཐོག་ནས་བསྟན་དོན། ཚོང་ལས་བདེ་ཐང་ཉེན་ཚབ་འཕེལ་རྒྱས་སུ་གཏོང་བ་དེ་གཞི་རྩའི་སྨན་བཅོས་འགན་སྲུང་བྱེད་པ་དང་འབྲེལ་མཐུད་ཁ་གསབ་བྱས་ན། མང་ཚོགས་ཀྱི་སྨན་བཅོས་ཁུར་བོ་ཇེ་ཡང་དུ་གཏོང་བ་དང་སྨན་བཅོས་འགན་སྲུང་ཆུ་ཚད་ཇེ་མཐོར་གཏོང་ཐུབ་ལ། དེ་དེང་རབས་ཞབས་ཕྱིའི་ལས་རིགས་འཕེལ་རྒྱས་དང་ནང་མཁོ་རྒྱ་བསྐྱེད་པ། གྲུབ་ཚུལ་ལེགས་སྒྲིག་བཅས་ལ་ཡར་སྐུལ་གཏོང་བར་ཕན་པ་ཡོད་ཟེར། ཚོགས་ཐོག་ནས་རྒྱལ་སྤྱིའི་ཉམས་མྱོང་དཔྱད་གཞིར་བཟུང་སྟེ་མི་སྒེར་གྱིས་སྤྲོད་པའི་ཁྲལ་དངུལ་གཟིགས་སྐྱོང་སྲིད་ཇུས་ཚོད་ལྟ་བྱེད་པ་དང་མང་ཚོགས་ཀྱི་ཕྱོགས་བསྡུས་རང་བཞིན་གྱི་ཚོང་ལས་བདེ་ཐང་ཉེན་ཚབ་འོས་འཚམ་སྒོས་ཉོ་བར་སྐུལ་མ་གཏོང་རྒྱུ་ཐག་བཅད།