ཞིན་ཧྭ་གསར་འགྱུར་ཁང་གི་གློག་འཕྲིན་ལྟར། རྒྱལ་ཡོངས་དམངས་འཐུས་ཚོགས་ཆེན་སྐབས་བཅུ་གཉིས་པའི་རྒྱུན་ལས་ཨུ་ཡོན་ལྷན་ཁང་གི་གྲོས་ཚོགས་ཐེངས་བཅུ་བཞི་བས་ཚེས་བཅུ་གཉིས་ཉིན་གྱི་ཕྱི་དྲོར་པེ་ཅིན་མི་དམངས་ཚོགས་ཁང་ཆེན་མོའི་ནང་ཚང་འཛོམས་གྲོས་ཚོགས་ཐེངས་གཉིས་པ་བསྡུས། ཨུ་ཡོན་ཀྲང་ཀྲང་ཏི་ཅང་གྲོས་ཚོགས་སུ་ཞུགས།

ཨུ་ཡོན་ཀྲང་གཞོན་པ་ཨེ་ལི་ཀུན་དབྱི་མེན་པཱ་ཧེ་ཡིས་གྲོས་ཚོགས་ལ་མགོ་འཛིན་བྱས།

རྒྱལ་སྲིད་སྤྱི་ཁྱབ་ཁང་གི་ཙུང་ལི་གཞོན་པ་ཝང་ཡང་གིས་རྒྱལ་སྲིད་སྤྱི་ཁྱབ་ཁང་གི་ཚབ་བྱས་ཏེ་རང་དབང་ཉོ་ཚོང་ཚོད་ལྟ་ས་ཁུལ་འཛུགས་སྐྲུན་བྱ་བ་བསྒྲུབས་པའི་གནས་ཚུལ་སྐོར་གྱི་སྙན་ཞུ་ཕུལ། ཝང་ཡང་གིས་བཤད་རྒྱུར། བཅོས་བསྒྱུར་མཁྲེགས་གཏོར་གྱི་དུས་སྐབས་དང་། སྒོ་འབྱེད་དུས་རིམ་གསར་བ། འཕེལ་རྒྱས་རྒྱུན་རྣམ་གསར་བ་བཅས་སུ་བསླེབས་པའི་རྒྱབ་ལྗོངས་ཆེན་པོའི་འོག ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གིས་གནས་བབ་དང་བསྟུན་ནས། རྒྱལ་ནང་དང་རྒྱལ་སྤྱིའི་ཁྱོན་ཡོངས་ལ་གཅིག་གྱུར་སྒོས་འཆར་འགོད་བྱེད་པའི་མཐོ་ཚད་ནས། རང་དབང་ཉོ་ཚོང་ས་ཁུལ་འཛུགས་སྐྲུན་བྱེད་པའི་འཐབ་ཇུས་གལ་ཆེན་གཏན་ལ་ཕབ་པས། བཅོས་བསྒྱུར་སྒོ་འབྱེད་དང་དེང་རབས་ཅན་འཛུགས་སྐྲུན་ལ་སྐུལ་འདེད་གཏོང་བའི་ཐད་ལ་དོན་སྙིང་གཏིང་ཟབ་པ་ལྡན།

ཝང་ཡང་གིས་བཤད་རྒྱུར། ཧྲང་ཧེ་རང་དབང་ཉོ་ཚོང་ཚོད་ལྟ་ས་ཁུལ་འཛུགས་སྐྲུན་བྱེད་པའི་བྱ་བའི་ཁྲོད་གནས་པའི་གནད་དོན་སྔར་ལས་ཐག་གཅོད་བཟང་བོ་བྱེད་པ་དང་། བཅོས་བསྒྱུར་སྒོ་འབྱེད་ཀྱི་བྱེད་ཐབས་སྣ་ཚོགས་ལག་བསྟར་བྱས་པའི་ནུས་པར་ཞིབ་བཤེར་བྱེད་པ། ཁྱོན་ཡོངས་ནས་བཅོས་བསྒྱུར་ཟབ་སྤེལ་བྱེད་པ། སྒོ་འབྱེད་རྒྱ་བསྐྱེད་པའི་ཉམས་མྱོང་གསར་བ་གསོག་འཇོག་བྱེད་པ། ཧྲང་ཧེ་རང་དབང་ཉོ་ཚོང་ཚོད་ལྟ་ས་ཁུལ་གྱི་འབྲེལ་ཡོད་བྱ་བར་སྤྱི་བསྡོམས་དང་དཔྱད་འཇོག་བྱེད་པ་བཅས་ཀྱི་རྨང་གཞིའི་སྟེང་། ཀོང་ཏུང་དང་ཐེན་ཅིན། ཧྥུའུ་ཅན་བཅས་རང་དབང་ཉོ་ཚོང་ཚོད་ལྟ་ས་ཁུལ་གསུམ་གསར་དུ་འཛུགས་རྒྱུར་མ་ཟད། ཧྲང་ཧེ་རང་དབང་ཉོ་ཚོང་ཚོད་ལྟ་ས་ཁུལ་རྒྱ་བསྐྱེད་རྒྱུ་ཡིན་ཟེར།

རྒྱལ་སྲིད་སྤྱི་ཁྱབ་ཁང་གི་མངག་བཅོལ་ལྟར། རིག་གནས་པུའུ་ཡི་པུའུ་ཀྲང་ཀི་ཧྲུའུ་ཀང་གིས་སྤྱི་པའི་རིག་གནས་ཞབས་ཞུ་མ་ལག་འཛུགས་སྐྲུན་བྱ་བའི་གནས་ཚུལ་སྐོར་གྱི་སྙན་ཞུ་ཕུལ།  །