ཟླ་བ3པའི་ཚེས24ཉིན་སྨྱུག་འཛིན་པས་སི་ཁྲོན་ཞིང་ཆེན་ཏང་ཨུའི་བོད་ཁུལ་གཞུང་ལས་ཁང་དང་ཞིང་ཆེན་འཕེལ་རྒྱས་བཅོས་བསྒྱུར་ཨུ་ཡོན་ལྷན་ཁང་ནས་ཤེས་རྟོགས་བྱུང་དོན།རང་རེའི་ཞིང་ཆེན་གྱིས2013ལོར་ལག་ལེན་བྱེད་འགོ་བཙུགས་པའི་བོད་ཁུལ་གྱི་དམངས་འཚོ་ལས་གྲྭ་ཆེན་པོ་དྲུག་གི་འཆར་གཞིའི་ནང་ད་ལོའི་ལོ་མཇུག་ལ་སླེབས་དུས་ལོ3ལ་རིམ་རྩིས་བྱས་ན་མ་དངུལ་སྒོར་དུང་ཕྱུར170གཏོང་འཇོག་བྱེད་པའི་རྣམ་པ་མངོན་འགྱུར་འབྱུང་རྒྱུ་རེད།
ཉེ་བའི་ལོ་ཤས་རིང་ལ་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་བོད་ཁུལ་གྱི་འཕེལ་རྒྱས་དང་།དམངས་འཚོ།བརྟན་བརླིང་བཅས་ཀྱི་དོན་ཆེན་གསུམ་དམ་འཛིན་བྱས་ཏེ་ལམ་ལུགས་བཀོད་སྒྲིག་བྱས་ནས་དམངས་འཚོ་ལས་ཀ་ཡག་པོ་བསྒྲུབ་རྒྱུར་དེ་བས་མཐོང་ཆེན་བྱས་པར་བརྒྱུད།2013ལོར་དང་ཐོག་བོད་ཁུལ་གྱི་དམངས་འཚོ་ལས་གྲྭ་ཆེན་པོ་དྲུག་ལག་ལེན་བྱེད་འགོ་བཙུགས་པ་འདི་ནི་བོད་ཁུལ་གྱི་ཁྱིམ་གཞིས་གསར་པ་འཛུགས་སྐྲུན་དང་།སློབ་གསོ་འཕེལ་རྒྱས།སྨན་བཅོས་འཕྲོད་བསྟེན་གྱི་ཆ་རྐྱེན་ཇེ་ཡགསྤྱི་ཚོགས་འགན་སྲུང་ལ་སྐུལ་སྤེལ།རིག་གནས་དར་རྒྱས་ཕུན་སུམ་ཚོགས་པ་དང་དབུལ་སྐྱོར་དཀའ་ངལ་སེལ་བའི་བྱ་སྤྱོད་བཅས་ཁྱབ་ཁོངས་ཆེན་པོ་དྲུག་ལ་ཁྱབ་ཡོད་པ་རེད།
རང་རེའི་ཞིང་ཆེན་གྱིས་བོད་ཁུལ་གྱི་དམངས་འཚོ་ལས་གྲྭ་ཆེན་པོ་དྲུག་གི་འཆར་གཞི་ལ་སྐུལ་འདེད་གཏོང་བའི་ཁྲོད་དུ་རྒྱུན་ཆད་མེད་པར་ཉམས་མྱོང་ཕྱོགས་བསྡོམས་དང་།བྱེད་ཐབས་འཐུས་སྒོ་ཚང་དུ་བཏང་ནས་དངོས་གནས་ཀྱི་ཕན་འབྲས་དེ་བས་ཆེན་པོ་ཐོབ་པར་བརྩོན་ལེན་བྱེད་གང་ཐུབ་བྱས་ཡོད།2014ལོར་བོད་ཁུལ་གྱི་དམངས་ཕན་ལས་གྲྭ་ཆེན་པོ་དྲུག་གི་འཆར་གཞིའི་ནང་བོད་ཁུལ་གྱི་དམངས་འཚོ་ལས་ཀའི་ནང་རྐྱེན་གསར་སྐྲུན་བྱ་རྒྱུར་དོ་སྣང་དེ་བས་བྱས་པ་དང་ཆབས་ཅིགདེ་སྔོན་གྱི་བྱ་དགའི་ཁ་གསབ་རོགས་དངུལ་སྟེར་སྟངས་ལེགས་བཅོས་བྱས་པ་དང་།དམངས་ཕན་སྲིད་ཇུས་དང་མ་དངུལ་འདི་དག་གྲོང་སྡེའི་ནོར་དོན་ཡོངས་བསྒྲགས་བྱེད་སའི་ཐོག་ཡོངས་བསྒྲགས་བྱེད་པའི་ལས་ཀ་ཡག་པོ་བསྒྲུབས་ནས་མང་ཚོགས་ཚོས་དུས་ཐོག་ཏུ་ཁོང་དུ་ཆུད་པར་འགན་ལེན་བྱས།སྲིད་གཞུང་གིས་གཏོང་འཇོག་བྱས་པའི་བོད་ཁུལ་གྱི་འཛུགས་སྐྲུན་རྣམ་གྲངས་ནང་བརྒྱ་ཆ10ནས་བརྒྱ་ཆ30ཡི་ལས་གནས་ཐོག་ས་གནས་རང་ཉིད་ཀྱི་མང་ཚོགས་སྐོང་འཐེན་བྱས་ནས་ལས་ཞུགས་བྱེད་དུ་བཅུག་པ་རེད།
ད་ལོར་གཏན་འཁེལ་བྱས་པའི་འཆར་འགོད་འདི་ནི་དུས་བསྟུན་མདུན་སྐྱོད་ཡིན་པས་སྐུལ་འདེད་བྱེད་ཤུགས་དེ་བས་ཆེན་པོ་ཡིན་པ་རེད།བོད་ཁུལ་ལ་ཁ་གཏད་རོགས་སྐྱོར་བྱ་རྒྱུའི་ལས་དོན་བཏོན་པ་དང་འབྲེལ་མཐུད་གང་ལེགས་བྱ་རྒྱུ་དང་།ཀོང་ཏུང་དང་ཀྲེ་ཅང་ཞིང་ཆེན།དེ་བཞིན་དུ་རང་རེའི་ཞིང་ཆེན་ནང་ཁུལ་གྱི་ཁ་གཏད་རོགས་སྐྱོར་མ་དངུལ་གཞི་རིམ་མང་ཚོགས་ལ་གཟིགས་སྐྱོང་བྱ་རྒྱུར་ཁྲིད་སྟོན་དང་།ཀོང་ཏུང་ཞིང་ཆེན་གྱིས་བོད་ཁུལ་དུ་ཁྱིམ་གཞིས་གསར་པ་བསྐྲུན་པའི་ཁྲོད་དུ་དབང་པོ་སྐྱོན་ཅན་གྱི་དབུལ་ཕོངས་ཁྱིམ་ཚང་ཁ་ཤས་ལ་རོགས་སྐྱོར་བྱེད་ཤུགས་ཆེ་རུ་གཏང་རྒྱུ་རེད།དེ་མིན་ད་རུང་འཛུགས་སྐྲུན་རང་བཞིན་གྱི་རྣམ་གྲངས་ལ་ཁུལ་དང་རྫོང་གི་ལེ་ལག་ཆ་ཚང་བསྒྲིག་རྒྱུ་མི་དགོས་པ་བཟོས་པའི་མ་དངུལ་སྒོར་དུང་ཕྱུར2ལ་ཉེ་བ་ཞིག་ཡོད་པ་དེའི་ཐོག་ནས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གིས་བོད་ཁུལ་གྱི་དམངས་འཚོ་ལ་སྔར་ལས་ལྷག་པར་རྒྱབ་སྐྱོར་གནང་བ་མཚོན་བཞིན་ཡོད་པ་རེད།