ཀྲུང་གོ་བོད་ཀྱི་དྲ་བའི་འཕྲིན། གསར་འགོད་པས་ཉིན་ཤས་གོང་ལྷ་ས་གྲོང་ཁྱེར་སྤུས་བཤེར་ཅུའུ་ནས་ཤེས་རྟོགས་བྱུང་བ་ལྟར་ན། 2017ལོའི་ལྷ་སའི་ཚོང་རྟགས་གྲགས་ཅན་གྱི་ཐོན་རྫས་རེ་འདུན་ཞུ་བའི་ལས་ཀ་མིག་སྔར་དངོས་སུ་མགོ་བརྩམས་ཟིན། ལྷ་ས་གྲོང་ཁྱེར་རྒྱལ་ཡོངས་ཀྱི་སྤུས་ཚད་ལེགས་པའི་གྲོང་ཁྱེར་དཔེ་སྟོན་གྲོང་ཁྱེར་བྱེད་སྒོའི་འགོ་ཁྲིད་ཚན་ཆུང་གཞུང་ལས་ཁང་གིས་རྫོང（ཁུལ）མི་དམངས་སྲིད་གཞུང་དང་། གླིང་ཁུལ་དོ་དམ་ཨུ་ལྷན་ཁག གྲོང་ཁྱེར་གྱི་སྤུས་ཚད་ལེགས་པའི་འགོ་ཁྲིད་ཚན་ཆུང་གི་ཁོངས་མིའི་ལས་ཁུངས་ཁག་དང་འབྲེལ་ཡོད་ཁེ་ལས་རྣམས་ལ་རེ་འདུན་ཞུ་བའི་བརྡ་ཐོ་བཏང་ཡོད།

རྒྱལ་སྲིད་སྤྱི་ཁྱབ་ཁང་གི་《སྤུས་ཚད་འཕེལ་རྒྱས་རྩ་གནད》ལག་བསྟར་དོན་འཁྱོལ་བྱེད་པ་དང་། ཚོང་རྟགས་གྲགས་ཅན་གྱི་འཐབ་ཇུས་ལག་བསྟར་ལ་སྐུལ་འདེད་གཏོང་བ། ས་གཙང་བདེ་ཐང་ཐོན་ལས་ལ་སྐུལ་འདེད་བྱེད་པ། དཔལ་འབྱོར་རྒྱུན་མཐུད་དང་བདེ་བླག་ངང་གོང་དུ་སྤེལ་བ་བཅས་ཀྱི་ཆེད་དུ། 《ལྷ་ས་གྲོང་ཁྱེར་གྱི་ཚོང་རྟགས་གྲགས་ཅན་ལ་གདེང་འཇོག་དོ་དམ་བྱེད་ཐབས》(ལྷ་ས་གྲོང་ཁྱེར་གྱི་བྱེད་ཐབས〔2015〕ཡིག་ཆ་ཨང57པ）ཀྱི་བྱེད་ཕྱོགས་ལྟར། ལྷ་ས་གྲོང་ཁྱེར་སྤུས་ལེགས་གྲོང་ཁྱེར་གཞུང་ལས་ཁང་དང་། གྲོང་ཁྱེར་ཚོང་རྟགས་གྲགས་ཅན་ཡར་སྐུལ་ཨུ་ལྷན་གྱིས2017ལོའི་ལྷ་སའི་ཚོང་རྟགས་གྲགས་ཅན་ཐོན་རྫས་ཀྱི་དཔྱད་འདེམ་ལས་ཀ་བསྒྲུབས།

གཏན་འབེབ་ལྟར་ན། 2017ལོའི་ལྷ་སའི་ཚོང་རྟགས་གྲགས་ཅན་གྱི་ཐོན་རྫས་རེ་འདུན་ཞུ་བའི་ཆ་རྐྱེན་ནི། རེ་འདུན་ཞུ་བའི་ཐོན་རྫས་དེ་《ལྷ་ས་གྲོང་ཁྱེར་གྱི་ཚོང་རྟགས་གྲགས་ཅན་དཔྱད་འཇོག་དོ་དམ་བྱ་ཐབས》དང་《ལྷ་སའི་ཚོང་རྟགས་གྲགས་ཅན་ཐོན་རྫས་དཔྱད་འཇོག་ཕྱོགས་སྟོན》གྱི་ཁྲོད་དུ་གཏན་ལ་ཕབ་པའི་ཡིག་ཐོག་གི་ཆ་རྐྱེན་རྣམས་ལ་མཐུན་དགོས།

རེ་འདུན་ཞུ་མཁན་ནི་འབྲེལ་ཡོད་ཐོན་རྫས་ཀྱི་ཐོན་སྐྱེད་ཁེ་ལས་ཡིན་དགོས། རང་འདོད་ཀྱི་རྩ་དོན་གཞིར་བཟུང་ནས་ལྷ་ས་གྲོང་ཁྱེར་ནང་ཁུལ་གྱི་ཞིང་ལས་ཐོན་རྫས་དང་བཟོ་སྐྲུན་ལས་རིགས་ཀྱི་ཐོན་རྫས་དེ་ལྷ་སའི་ཚོང་རྟགས་གྲགས་ཅན་གྱི་ཐོན་རྫས་རེ་འདུན་ཞུ་བའི་ཆ་རྐྱེན་ལོངས་པ་རྣམས་ཀྱིས་རེ་འདུན་ཞུས་ཆོག ད་ལོར་ཞབས་ཞུ་ལས་རིགས་ཀྱི་དཔྱད་འཇོག་ངོས་ལེན་ལས་ཀ་རྣམས་རེ་ཞིག་བསྒྲུབ་རྒྱུ་མིན།

རེ་འདུན་ཞུ་མཁན་གྱི་ཐོན་སྐྱེད་ཁེ་ལས་ཀྱིས2018ལོའི་ཟླ3པའི་ཚེས20ཡི་སྔོན་ལ། ལྷ་སའི་གྲོང་ཁྱེར་སྤུས་འདོན་འགོ་ཁྲིད་ཚན་ཆུང་གཞུང་ལས་ཁང་དང་། གྲོང་ཁྱེར་ཚོང་རྟགས་གྲགས་ཅན་གྱི་འཐབ་ཇུས་ཡར་སྐུལ་ཨུ་ཡོན་ལྷན་ཁང་གི་དྲུང་ཡིག་ཁང་ངམ་ཡང་ན་ལྷ་ས་གྲོང་ཁྱེར་ཉང་བྲན་ལམ་སྒོ་རྟགས་ཨང་16པ་གྲོང་ཁྱེར་སྤུས་ཚད་ལག་རྩལ་ལྟ་སྐུལ་ཅུའུ་ཡི་སྤུས་ཚད་ལྟ་སྐུལ་ཚན་ཁག་ནང་ལ་རེ་འདུན་ཞུ་བའི་རྒྱུ་ཆ་རྣམས་སྐྱེལ་དགོས། འབྲེལ་གཏུག་མི་སྣ། ཉི་ནཱ། ཧོང་ཅཱ་ཆི།  འབྲེལ་གཏུག་ཁ་པར། 0891——6326761

ཤེས་རྟོགས་བྱུང་བར་གཞིགས་ན། ལྷ་ས་གྲོང་ཁྱེར་གྱི་ཚོང་རྟགས་གྲགས་ཅན་སྐུལ་འདེད་ཨུ་ལྷན་གྱིས་རྒྱུ་ཆར་ཞིབ་བཤེར་དང་། ཡུལ་དངོས་རྟོག་དཔྱོད། ཕྱོགས་བསྡུས་གདེང་འཇོག་སོགས་ལ་གཞིགས་ནས། ལྷ་སའི་ཚོང་རྟགས་གྲགས་ཅན་གྲངས་ཀ་ངེས་ཅན་ཞིག་འདེམ་རྒྱུ་མ་ཟད། ད་དུང“ལྷ་སའི་ཚོང་རྟགས་གྲགས་ཅན”ཞེས་པའི་མཚན་སྙན་སྤྲོད་རྒྱུ་ཡིན་ལ། ལྷ་སའི་ཚོང་རྟགས་གྲགས་ཅན་གྱི་དཔང་ཡིག་དང་གཟེངས་བསྟོད་རྟགས་མ་སྤྲོད་པ་ལས་གཞན་ད་དུང་ལྷ་སའི་ཚོང་རྟགས་གྲགས་ཅན་གྱི་བྱ་དགའ་ཐོབ་པའི་ལས་ཁུངས་གང་དེ་གནས་ཡུལ་གྱི་རྫོང་དང་སྲིད་འཛིན་དོ་དམ་སྡེ་ཁག་ལའང་དེ་མཚུངས་ཀྱི་བྱ་དགའ་སྤྲོད་རྒྱུ་ཡིན།

ལྷ་ས་གྲོང་ཁྱེར་སྤུས་བཤེར་ཅུའུ་ཡི་འབྲེལ་ཡོད་འགན་འཁུར་བས་གསུང་དོན། “ངེད་གྲོང་ཁྱེར་གྱིས་2015ལོར་སྐབས་དང་པོའི་ལྷ་སའི་ཚོང་རྟགས་གྲགས་ཅན་གྱི་དཔྱད་འདེམ་ལས་ཀ་བསྒྲུབས་པ་ཡིན་ལ། སྐབས་དང་པོའི་ལྷ་སའི་ཚོང་རྟགས་གྲགས་ཅན་གྱི་དཔྱད་འདེམ་ནང་བོད་ཀྱི་ཁ་གདན་དང་། བོད་སྨན། བོད་སྤོས། ནས་ཆང་། འཐུང་ཆུ་སོགས་ས་གཙང་ལྷད་མེད་ཐོན་ལས་ཁེ་ལས་ཀྱི་ཐོན་རྫས་སྣ་ཁ་6ལྷ་ས་གྲོང་ཁྱེར་གྱི་སྐབས་དང་པོའི་ལྷ་སའི་ཚོང་རྟགས་གྲགས་ཅན་གྱི་ཐོན་རྫས་ནང་དུ་བདམས་ཐོན་བྱུང་ནས་བྱ་དགའི་མ་དངུལ་སྒོར་ཁྲི་30སྤྲད། ལྷ་སའི་ཚོང་རྟགས་གྲགས་ཅན་གྱི་དཔྱད་འདེམ་ལས་ཀ་ནི་ལོ་གཉིས་རེའི་ནང་དུ་ཐེངས་རེར་བསྒྲུབ་ཀྱིན་ཡོད་ལ། ད་ལོ་ནི་སྐབས་གཉིས་པའི་ལྷ་སའི་ཚོང་རྟགས་གྲགས་ཅན་གྱི་དཔྱད་འདེམ་བསྒྲུབ་པ་ཞིག་ཡིན། །