ཀྲུང་གོ་བོད་ཀྱི་དྲ་བའི་འཕྲིན། ཟླ12པའི་ཚེས25ཉིན། མཚོ་སྔོན་ཞིང་ཆེན་བོད་སྨན་སློབ་ཚོགས་དང་ཞིང་ཆེན་བོད་སྨན་ཞིབ་འཇུག་ཁང་གཉིས་ཀྱིས་མཉམ་འབྲེལ་སྒོས་བསྒྲུབས་པའི། ཞིང་ཆེན་ཡོངས་ཀྱི་བོད་སོག་སྨན་ཁང་གི་ཡོན་ཀྲང་གླེང་སྟེགས་སྐབས་བཞི་བ་དང་ཀྲུང་གོའི་བོད་ཀྱི་གསོ་བ་རིག་པ་ཞེས་པའི་དུས་དེབ་བསྒྲུབས་ནས་ལོ་འཁོར་བཅུ་ལོན་པའི་བཞུགས་མོལ་ཚོགས་འདུ་ཟི་ལིང་ནས་བསྡུས།

ཉེ་བའི་ལོ་འདི་འགར། མཚོ་སྔོན་གྱིས་མ་ལག་རིག་ཚན་འཛུགས་སྐྲུན་ལ་བརྟེན་ནས། བོད་སྨན་རྒྱུན་འཛིན་དང་འཕེལ་རྒྱས་ཐད་གྲུབ་འབྲས་ཆེན་པོ་བླངས་ཡོད། བར་མ་ཆད་པའི་སྒོ་ནས་བོད་སྨན་གྱི་ཞབས་ཞུའི་མ་ལག་འཛུགས་སྐྲུན་བྱེད་ཤུགས་ཇེ་དྲག་ཏུ་བཏང་ནས། གཞི་རིམ་བོད་སྨན་གྱི་ཞབས་ཞུའི་ནུས་པ་མཐོར་འདེགས་གཏོང་བའི་ལས་དོན་ནན་ཏན་སྒོས་བསྒྲུབས་ཡོད།

མིག་སྔའི་བར་དུ་ཞིང་ཆེན་ཡོངས་ན་གཞུང་གཉེར་བོད་སོག་སྨན་ཁང་ཉེར་བརྒྱད་ཡོད་ཅིང་། དེའི་ཁྲོད་དུ་བོད་སྨན་ཁང་ཉེར་བཞི་དང་བོད་སོག་སྨན་ཁང་གསུམ། སོག་སྨན་ཁང་གཅིག་བཅས་ཡོད་ལ། དེས་ཞིང་ཆེན་ཡོངས་ཀྱི་སྨན་ཁང་སྤྱིའི་བརྒྱ་ཆའི་ཉེར་བདུན་ཟིན། མི་རིགས་རང་སྐྱོང་ཁུལ་དྲུག་དང་ཁུལ་མངའ་འོག་གི་རྫོང་ཁག་སོ་སོ་ན་ཧ་ལམ་གཞུང་གཉེར་བོད་སྨན་ཁང་རེ་ཡོད། ཞིང་ཆེན་ཡོངས་ན་གཞིས་ཁུལ་ཞབས་ཞུ་ལྟེ་གནས་དང་། ཞང་དང་གྲོང་རྡལ་གྱི་འཕྲོད་བསྟེན་ཁང་བཞི་བརྒྱ་སོ་ལྔའི་ཁྲོད་དུ། བོད་སྨན་ཁང་བརྒྱ་དང་ང་བརྒྱད་བཙུགས་ཡོད། 
གླེང་སྟེགས་དང་བཞུགས་མོལ་ཚོགས་འདུ་སྟེང་དུ། ཚོགས་ཞུགས་མི་སྣ་རྣམས་ཀྱིས་རང་མོས་བགྲོ་གླེང་དང་རང་གི་བསམ་ཚུལ་འཛེམ་ཟོན་མེད་པར་འདོན་པའི་རྣམ་པ་བརྒྱུད་དེ། སྨན་ཁང་གི་སྨན་རྫས་ལས་སྣོན་སྒོ་འབྱེད་དང་དོ་དམ་སྐོར་ནས་གྲོས་སྡུར་བྱས་པ་དང་། སྨན་ཁང་གཉེར་བའི་ཉམས་མྱོང་སྐོར་ནས་བསམ་ཚུལ་བརྗེ་རེས་བྱས་པར་མ་ཟད། མི་རིགས་སྨན་རྫས་རྒྱལ་ཡོངས་ཅན་དང་འཛམ་གླིང་ཅན་དུ་ཕྱོགས་པའི་ཐད་ནས་མཉམ་དུ་གྲོས་སྡུར་བྱས་པ་ལས་གཞན། ཅིན་ཁི་རྟགས་མའི་ཀྲུང་གོའི་བོད་ཀྱི་གསོ་བ་རིག་པའི་དུས་དེབ་ཀྱི་ཕུལ་བྱུང་དཔྱད་རྩོམ་ལ་བྱ་དགའ་སྟེར་བའི་བྱ་འགུལ་ཐོག་མའང་སྤེལ།   །