ཞིན་ཧྭ་གསར་འགྱུར་ཁང་པེ་ཅིང་ནས་གློག་འཕྲིན་འབྱོར་གསལ།ཉེ་ཆར་རྒྱལ་ཡོངས་སྲིད་གྲོས་སྐབས་བཅུ་གཉིས་པའི་ཚོགས་འདུ་ཐེངས་གསུམ་པས་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་གསར་འགྱུར་མགྲིན་ཚབ་པ་ལུའི་ཞིན་ཧྭ་ཡིས་ཀྲུང་གོ་དང་ཕྱི་རྒྱལ་གྱི་གསར་འགོད་པའི་དྲི་བར་ལན་བཏབ་པ་རེད།
   ལུའི་ཞིན་ཧྭ་ཡིས་ན་ནིང་གི་སྲིད་གྲོས་ལས་དོན་སྐོར་གྱི་གསར་འགོད་པའི་དྲི་བར་ལན་འདེབས་སྐབས་བཤད་དོན།ན་ནིང་རྒྱལ་ཡོངས་སྲིད་གྲོས་རྒྱུན་ལས་ཨུ་ལྷན་གྱི་ལས་དོན་ཐད་ཁྱད་ཆོས་ཆེན་པོ་བཞི་ལྡན་པ་སྟེ།གཅིག་ནི་ཀྲུང་གུང་ཀྲུང་དབྱང་གིས་སྲིད་གྲོས་ལས་དོན་ལ་ཚད་མཐོའི་མཐོང་ཆེན་གནང་ནས་ཀྲུང་དབྱང་ཆབ་སྲིད་ཅུས་ཀྱི་རྒྱུན་ལས་ཨུ་ལྷན་གྱིས་སྲིད་གྲོས་ལས་དོན་དང་རྒྱུན་ལས་ཨུ་ལྷན་གྱི་ལས་དོན་སྙན་སྒྲོན་ལ་ཐོག་མར་ཆེད་དོན་ཞིབ་འཇུག་གནང་བ་དང་།གཉིས་ནས་མི་དམངས་སྲིད་གྲོས་བཙུགས་ནས་ལོ་65འཁོར་བར་རྟེན་འབྲེལ་གཟབ་རྒྱས་ཞུས་པ་དང་སྤྱི་ཁྱབ་ཧྲུའུ་ཅི་ཞིས་ཅིན་ཕིང་གིས་ཚོགས་འདུའི་ཐོག་གསུང་བཤད་གལ་ཆེན་གནང་ནས་མི་དམངས་སྲིད་གྲོས་ཀྱི་འོད་སྟོང་འབར་བའི་ལོ་རྒྱུས་ལམ་ཚད་ལ་ཕྱིར་མིག་བལྟས་པ་དང་ལས་དོན་ཡག་པོ་སྒྲུབ་པའི་རྩ་དོན་གལ་ཆེན་ཁག་བཞི་དང་གཞི་རྩའི་བླང་བྱ་ཁག་ལྔ་སྔར་བས་བཏོན་ཡོད།གསུམ་ནས་བཅོས་བསྒྱུར་ཁྱོན་ཡོངས་ནས་གཏིང་ཟབ་ཏུ་གཏོང་བར་དམིགས་ནས་མི་སེམས་རྒྱ་ཁྱབ་ངང་གཅིག་སྡུད་བྱས་པ་དང་ཨུ་ཡོན་གྱི་གཅིག་སྡུད་སློབ་སྦྱོང་དང་།གཟིགས་ཞིབ་བརྟག་ཞིབ།གྲོས་བསྡུར་སྤེལ་རེས་བཅས་སྒྲིག་འཛུགས་བྱས་པ་བརྒྱུད་སྤྱིའི་བགོ་གྲངས་ཆེ་ཤོས་འཚོལ་བ་དང་བཅོས་བསྒྱུར་གྱི་དྲང་ནུས་གཅིག་ཏུ་བསྡུས་ཏེ་འབྲེལ་གཏུག་བྱ་ཡུལ་ཁོངས་མི་དང་ལས་རིགས་ཁག་གི་མང་ཚོགས་ཀྱིས་སྒྱུར་བཅོས་ལ་བསམ་ཤེས་དང་།རྒྱབ་སྐྱོར།དེའི་ནང་ཞུགས་པ་བཅས་བྱ་རྒྱུར་སྐུལ་འདེད་བཏང་བ།བཞི་ནས་སྲིད་གྲོས་ཀྱི་གྲོས་མོལ་དམངས་གཙོའི་རྒྱ་ཁྱོན་དང་གཏིང་ཟབ་ཚད་ཆེ་རུ་བཏང་བ་དཔེར་ན།རྒྱུན་ལས་ཨུ་ལྷན་གྱི་ཚོགས་འདུའི་ཐོག་ཏང་སྲོལ་སྲིད་གཙང་འཛུགས་སྐྱོང་བྱ་རྒྱུ་དེ་གྲོས་གཞིའི་ནང་ཐོག་མར་བཅུག་པ་བཅས་རེད།
　སྲིད་གྲོས་ཀྱིས་ཇི་ལྟར་བྱས་ཏེ་དམངས་གཙོའི་ལྟ་སྐུལ་ནུས་པ་དེ་བས་ལེགས་པའི་ངང་འདོན་སྤེལ་བྱེད་པའི་སྐོར་གྱི་གསར་འགོད་པའི་དྲི་བར་ལན་འདེབས་སྐབས་ལུའི་ཞིན་ཧྭ་ཡིས་འདི་ལོ་ནི་ཁྲིམས་ལྟར་རྒྱལ་ཁབ་སྐྱོང་བར་ཁྱོན་ཡོངས་ནས་སྐུལ་འདེད་གཏོང་བའི་འགོ་འཛུགས་ལོ་གཅིག་ཡིན་པ་དང་།རྒྱལ་ཡོངས་སྲིད་གྲོས་ཀྱིས་དམངས་གཙོའི་ལྟ་སྐུལ་འགན་ནུས་ཤུགས་ཆེར་ཏན་ཏིག་བཏང་སྟེ་ལྟ་སྐུལ་བྱེད་པར་འཆར་གཞི་ཡོད་པ་དང་།འགོ་བརྗོད་ཡོད་པ།འདྲེན་རྟེན་ཡོད་པ།ཕན་འབྲས་ཐོན་པ་བཅས་ཐུབ་པ་དགོས།ས་གནས་ཀྱི་བུ་ལོན་གྱི་ཉེན་ཁ་སེལ་བ་དང་དབུལ་སྐྱོར་མ་དངུལ་དོ་དམ་བཀོལ་སྤྱོད་སོགས་གནད་དོན་ལ་དམིགས་ནས་ལྟ་སྐུལ་བྱེད་པ་དང་གནས་ཚུལ་ཇི་མ་ཇི་བཞིན་ངང་ཤོད་པ་དང་སྐྱོན་བརྗོད་དང་དགེ་མཚན་ལྡན་པའི་བསམ་འཆར་ཐད་ཀར་བཏོན་ཐོག་འབྲེལ་ཡོད་ལས་དོན་ལ་སྐུལ་སྤེལ་དང་དོན་འཁྱོལ་བྱ་རྒྱུར་སྐུལ་འདེད་གཏོང་དགོས་ཞེས་བཤད།
　སྲིད་གྲོས་ཁོངས་གཏོགས་ཀྱི་རུལ་སུངས་ལ་ངོ་རྒོལ་བྱེད་པའི་སྐོར་གྱི་གསར་འགོད་པའི་དྲི་བར་ལན་འདེབས་སྐབས་ལུའི་ཞིན་ཧྭ་ཡིས་སྲིད་གྲོས་ནི་རུལ་སུངས་པ་གབ་ས་ཞིག་མིན་པས་ང་ཚོས་སྒྲིག་ཁྲིམས་ལྟར་ཞིབ་བཤེར་ཐག་གཅོད་ནན་པོ་བྱ་རྒྱུར་བརྩི་བཀུར་དང་རྒྱབ་སྐྱོར་མཐའ་གཅིག་ཏུ་བྱ་དགོས།སྲིད་གྲོས་ཀྱི་སྤྱོད་ཚུལ་འཛུགས་སྐྱོང་དང་རུལ་རྒོལ་གཙང་སྤེལ་ལས་དོན་ལ་སྔར་བས་ཤུགས་སྣོན་རྒྱག་དགོས་ཞེས་བཤད།
　ལུའི་ཤིན་ཧྭ་ཡིས་འདས་ཟིན་པའི་ལོ་གཅིག་ནང་ཏང་ཀྲུང་དབྱང་གིས་བཀག་སྡོམ་ཁུལ་མེད་པ་དང་།ཁྱོན་ཡོངས་ལ་ཁྱབ་པ།བཟོད་བསྲན་མི་བྱེད་པ་བཅས་མཐའ་འཁྱོངས་བྱས་ནས་རུལ་སུངས་པ་ཞིབ་བཤེར་ཐག་གཅོད་ནན་པོ་བྱས་ཏེ་རུལ་སུངས་བྱེད་མི་ཕོད་པ་དང་།བྱེད་མི་ཐུབ་པ།བྱེད་མི་བསམ་པ་བཅས་ཀྱི་ཆབ་སྲིད་ཁོར་ཡུག་ཧུར་ཐག་བཏོད་པར་ཕན་འབྲས་མངོན་གསལ་དོད་པོ་ཐོབ་ཡོད།རུལ་སུངས་ལ་ངོ་རྒོལ་བྱེད་པའི་འཐབ་རྩོད་ཁྲོད་ཤེས་རྟོགས་གཅིག་ཐུབ་མ་ཐག་ཞིབ་བཤེར་ཐག་གཅོད་བྱེད་པ་དང་།ཤེས་རྟོགས་ཇི་ཙམ་ཐུབ་པ་དེ་ཙམ་གྱིས་ཞིབ་བཤེར་ཐག་གཅོད་བྱེད་པ་ལས་ཚོད་འཛིན་གཏན་ནས་མི་བྱེད་པ་དང་ཞིབ་བཤེར་ཐག་གཅོད་མི་ཐུབ་པའི“དཔོན་པོ”གཅིག་ཀྱང་མེད་ཅེས་བཤད།
 “ལོ་རྒྱུས་ལ་མནོ་བསམ་ཟབ་མོ་གཏོང་བའི་དུས་སུ་སླེབས་ཡོད”འདི་ལོ་ནི་འཛམ་གླིང་གི་ཧྥ་ཤིས་སིར་ངོ་རྒོལ་བྱེད་པའི་དམག་འཁྲུག་དང་ཀྲུང་གོ་མི་དམངས་ཀྱི་རི་འགོག་དམག་འཁྲུག་ལ་རྒྱལ་ཁ་ཐོབ་ནས་ལོ་70འཁོར་བའི་ལོ་ཞིག་ཡིན་ཞིང་།ཉི་ཧོང་སྲིད་གཞུང་གི་འགོ་ཁྲིད་པའི་རྣམ་འགྱུར་སྟོན་སྟངས་སྐོར་གྱི་གསར་འགོད་པའི་དྲི་བར་ལན་འདེབས་སྐབས་ལུའི་ཞིན་ཧྭ་ཡིས་སྤྱི་ཡོངས་ནས་བཤད་ན་ཉི་ཧོང་གི་ད་ལྟའི་སྲིད་གཞུང་གི་འགོ་ཁྲིད་པ་ཚུད་པའི་སྲིད་ཕྱོགས་མི་སྣ་མང་པོས་འཇར་མན་གྱི་འགོ་ཁྲིད་པས་ན་ཙི་བཙན་རྒྱལ་སྐབས་ཡིའུ་ཐེ་བ་དམར་གསོད་བཏང་བར་རང་སྐྱོན་རང་བརྟགས་ཟབ་མོ་དང་ལྷག་བསམ་ཟོལ་མེད་ངང་དགོངས་སེལ་ཞུས་པར་རྒྱལ་སྤྱིའི་སྤྱི་ཚོགས་ཀྱི་ཡིད་ཆེས་ཐོབ་པ་དང་མི་འདྲ་བར་དེ་ལས་ལྡོག་སྟེ་སློབ་གཞི་དང་།རྒྱལ་བདེ་ལྷ་ཁང་།འདོད་སྐོང་མ།ནན་ཅིང་དམར་གསོད་ཆེན་མོ་སོགས་གནད་དོན་ཐད་གནས་ཚུལ་ངོ་མ་འགེབས་སྲུང་བྱས་ཏེ་ལོ་རྒྱུས་ཀྱི་དྲང་བདེན་དང་མིའི་རིགས་ཀྱི་སེམས་རྒྱུད་ལ་འགྲན་སློང་བྱས་ཡོད།ང་ཚོས་ཉི་ཧོང་སྲིད་གཞུང་གི་ད་ལྟ་འགན་ཁུར་བཞིན་པའི་འགོ་ཁྲིད་པར་འཛམ་གླིང་དམག་ཆེན་གཉིས་པ་ལངས་ནས་ལོ་70སོང་ཟིན་པས་ད་ནི་ལོ་རྒྱུས་ལ་མནོ་བསམ་ཟབ་མོ་གཏོང་བའི་དུས་སུ་སླེབས་ཡོད་ཅེས་ཁ་ཏ་བྱས་ཡོད།ང་ཚོས་ཉི་ཧོང་སྲིད་གཞུང་ལ་ལོ་རྒྱུས་ལ་འགན་འཁུར་བའི་རྣམ་འགྱུར་འཛིན་རྒྱུའི་སྐུལ་འདེབས་བྱས་པ་དང་དམག་འཁྲུག་གི་ངོ་བོ་གསལ་རྟོགས་ཐུབ་པ་བྱས་ཏེ་ཞི་བདེའི་འཕེལ་རྒྱས་ཀྱི་འགྲོ་ལམ་ཐོག་བསྐྱོད་རྒྱུའི་སྐུལ་མ་གཏོང་གི་ཡོད་ཅེས་བཤད།“ཨོ་ལིམ་ཕིག་གི་ཨ་སྔོན་སྤྲིན་དཀར”གཏན་གནས་ཐུབ་པའི་རེ་སྒུག་བྱེད་པ།
　2022ལོའི་དགུན་དུས་ཨོ་ལིམ་ཕིག་ལུས་རྩལ་འགྲན་ཚོགས་གཉེར་རྒྱུའི་སྙན་འབུལ་ཞུ་བ་དེས་པེ་ཅིང་གི་རླུང་ཁམས་ཆེན་མོའི་སྦགས་བཙོག་བཅོས་སྐྱོང་ཐད་རོགས་རམ་གང་དག་ཡོད་པའི་སྐོར་གྱི་དྲི་བར་ལན་འདེབས་སྐབས་ལུའི་ཞིན་ཧྭ་ཡིས་ད་ལྟ་ནས་བརྩིས་བརྒྱབ་སྟེ་2022ལོ་བར་ད་དུང་ལོ་7ཡོད།གལ་ཏེ་པེ་ཅིང་གྲོང་ཁྱེར་གྱི་མཁའ་རླུང་གཙང་མའི་བྱ་སྤྱོད་འཆར་གཞིར་སྐུལ་འདེད་མགྱོགས་མྱུར་བཏང་ཚེ་2030ལོར་ཨ་སྔོན་སྤྲིན་དཀར་གྱི་དམིགས་ཚད་མངོན་འགྱུར་ཐུབ་པའི་གཏན་འཁེལ་བྱས་པ་དེ་སྔ་སྣུར་དུ་མངོན་འགྱུར་ཐུབ་སྲིད་ཅེས་བཤད།ཁོང་གིས“ངའི་བསམ་པར་རྒྱལ་སྤྱིའི་ཨོ་རྩལ་འགྲན་ཚོགས་ཨུ་ལྷན་གྱིས་ཀྱང་གོང་གསལ་གྱི་རྒྱུ་རྐྱེན་ལ་བསམ་གཞིག་གང་ལེགས་བྱས་ཏེ་ད་ཐེངས་ཀྱི་དགུན་དུས་ཨོ་རྩལ་འགྲན་ཚོགས་དེ་པེ་ཅིང་དང་ཀྲང་ཅ་ཁའུ་རུ་གཉེར་ནས‘ཨོ་ལིམ་ཕིག་གི་ཨ་སྔོན་སྤྲིན་དཀར’གཏན་གནས་ཐུབ་པ་བྱེད་པར་ང་ཚོར་རེ་སྒུག་ཆེན་པོ་བྱེད་ཀྱི་ཡོད”ཅེས་བཤད།