ཞིན་ཧྭ་གསར་འགྱུར་ཁང་པེ་ཅིན་ནས་ཉེ་ཆར་འབྱོར་བའི་གཏམ་གསར། མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་པུའུ་ཡིས་ཉེ་ཆར་གསར་འགྱུར་ཁྱབ་བསྒྲགས་བྱས་ཏེ་བཤད་དོན། མི་དོན་སྤྱི་ཚོགས་པུའུ་དང་སྤྱི་བདེ་པུའུ་སོགས་སྡེ་ཚན་བཅུ་ལས་གྲུབ་པའི་མཉམ་འབྲེལ་གྱི་ལྟ་སྐུལ་ཚོ་ཆུང5བཙུགས་ཏེ་ཟླ་བ་དང་པོའི་ཟླ་མཇུག་ནས་ཟླ་བ2པའི་ཟླ་གོའི་བར་ཧུའུ་ཅན་སོགས་ཞིང་ཆེན་དང་གྲོང་ཁྱེར6ཏུ་ཕྱིན་ནས་ཞིང་པའི་གླ་པའི་གླ་ཕོགས་གཏོང་སྤྲོད་བྱས་ཚུལ་ལ་ལྟ་སྐུལ་བྱ་རྒྱུ་རེད།　　མི་དོན་སྤྱི་ཚོགས་ངལ་རྩོལ་ལྟ་སྐུལ་ཅུས་ཀྱིས་འབྲེལ་ཡོད་འགན་ཁུར་པས་ངོ་སྤྲོད་བྱས་པ་ལྟར་ན། ཐེངས་འདིའི་ལྟ་སྐུལ་བྱ་རྒྱུའི་ནང་དོན་གཙོ་བོ་ནི་ཞིང་པའི་གླ་པའི་གླ་ཕོགས་གཏོང་སྤྲོད་བྱེད་པར་ཆེད་གཉེར་གྱིས་ཁྲིམས་འཛིན་དང་ཞིབ་བཤེར་བྱས་ཚུལ་དང་། ཞིང་པའི་གླ་པའི་གླ་ཕོགས་གཏོང་སྤྲོད་བྱེད་པར་འགན་སྲུང་བྱ་རྒྱུའི་སྲིད་ཇུས་དང་བྱེད་ཐབས་ཁག་དོན་འཁྱོལ་བྱས་ཚུལ། སྲིད་འཛིན་དང་ཁྲིམས་འཛིན་གྱིས་མཉམ་འགུལ་བྱས་ཏེ་ངལ་རྩོལ་གྱི་ཐོབ་ཆ་མི་སྤྲོད་པའི་ཉེས་བསགས་གནས་ཚུལ་བཅས་ལ་ཞིབ་བཤེར་བྱ་རྒྱུ་རེད།
ལྟ་སྐུལ་བྱས་པར་བརྒྱུད། ས་གནས་ཁག་གིས་ཀྲུང་དབྱང་གཞུང་ལས་ཁང་དང་། རྒྱལ་སྲིད་སྤྱི་ཁྱབ་ཁང་གི་གཞུང་ལས་ཁང་གི《2015ལོའི་གནམ་ལོ་གསར་ཚེས་དང་དཔྱིད་གསར་དུས་ཆེན་དུས་ཀྱི་འབྲེལ་ཡོད་ལས་ཀ་ཡག་པོ་བསྒྲུབ་དགོས་པའི་སྐོར་གྱི་བརྡ་ཐོའི》བླང་བྱ་ནན་ཏན་གྱིས་དོན་འཁྱོལ་བྱས་ཚུལ་ལ་ལྟ་སྐུལ་དང་སྐུལ་འདེད་བཏང་བ་དང་། སྔར་ལས་ལྷག་པའི་བྱེད་ཐབས་ནུས་ལྡན་སྤེལ་ནས་ཞིང་པའི་གླ་པར་དུས་བཀག་ནང་ཐོབ་དགོས་པའི་གླ་ཕོགས་འདང་ངེས། ཐོབ་ཆ་ཐོབ་པར་ཁག་ཐེག་བྱས་ཏེ་རྒྱ་ཆེ་བའི་ཞིང་པར་དགའ་སྐྱིད་འཛོམས་པའི་དཔྱིད་གསར་དུས་ཆེན་ཞིག་རོལ་འཇུག་རྒྱུ་རེད།